13 May 2016, 13:18
ކޯޓުތަކުގައި ހުރި ބައެއް ކަންކަން ރަނގަޅުކުރުމަށް ޕްރޮސިކިއުޓަ ޖެނެރަލް އާއިޝަތު ބިސާމް އެދިވަޑައިގެންފި އެވެ.
ފަނޑިޔާރުންގެ މަހާސިންތާގައި ޕީޖީ ބިޝާމް އާ އެކު ކުރިއަށް ގެންދިޔަ ޝެޝަންގައި ޕީޖީ އޮފީހުގެ ފަރާތުން ހުރި ކަންބޮޑުވުން ތަކަކީ ކޮބާތޯ މެޖިސްޓްރޭޓުން ސުވާލު ކުރުމުން ބިޝާމް ވިދާޅުވީ ކްރިމިނަލް ކޯޓުގައި ބައެއް ފަހަރު އެއްމައްސަލައަށް ވުރެ ގިނަ މައްސަލަ އެއް ސެކްޝަނެއްގައި ތާވަލުކޮށް އޭގެތެރެއިން ކެންސަލްވަނީ ކޮން މައްސަލައެއް ކަން ނާންގާ ހުންނަ ކަމަށެވެ. އެހެންވުމުގެ ސަބަބުން ޕީޖީގެ ލޯޔަރުންނަށް ތައްޔާރުވާންވީ ކޮން މައްސަލައަކަށްކަން ނޭނގޭ ފަހަރު ދާކަމަށް ބިޝާމް ވިދާޅުވި އެވެ.
"ބައެއް ފަހަރު އަޅުގަނޑުމެންނަށް ދިމާވާ މައްސަލައެއް އެއީ ކްރިމިނަލް ކޯޓުގައި އެއްމައްސަލައަށްވުރެ ގިނަ މައްސަލަ އެއްގަޑިއަކަށް ކްރިމިނަލް ކޯޓުން އެއްސެކްޝަނެއްގައި އެބަ ތާވަލު ކުރެވޭ މައްސަލަ. އޭގެތެރެއިންވެސް ކެންސަލްވަނީ ކޮންމައްސަލައެއްކަން ނޭންގިގެން ދިމާވާ ދައްޗެއް މިދައްޗަކީ،" ޕީޖީ ބިޝާމް ވިދާޅުވި އެވެ.
އޭގެއިތުރުންވެސް ކްރިމިނަލް ކޯޓުގައި މިހާރު މަސައްކަތް ނުކުރައްވާ ގާޒީންގެ ނަންފުޅުގައި މައްސަލަތައް ޝެޑިއުލް ކުރަމުންދާ ކަމަށާއި އެހެންވުމުގެ ސަބަބުން މައްސަލަ ބަލާނީ ކޮން ގާޒީއެއްކަން ނޭނގިދާ ކަމަށް ބިޝާމް ވިދާޅުވި އެވެ. އެމައްސަލައަށް ހައްލެއް ހޯއްދަވައިދެއްވުމަށް ޕީޖީ ބިޝާމް ވަނީ އެދިވަޑައިގެންފަ އެވެ.
މައްސަލަތައް އަވަސްކޮށް ތާވަލުކުރާ މައްސަލަތައް ކެންސަލްވުމުގެ މައްސަލައަށް ހައްލެއް ހޯދުމަށް ހެކިން ހާޒިރުކުރެވޭކަން ޔަގީން ކުރުމަށް ފަހު ތާވަލުކުރެއްވުމަށް ޕީޖީ ބިޝާމް އެދިވަޑައިގެންނެވި އެވެ.
"ބައެއް ފަހަރު ކޯޓުތަކުގައި ހަމަ ދިމާވާ މައްސަލައެއް އެއީ ދައުވާ ލިބޭމީހުންނަށް ހެކިވެރިން ރަށުގަ ތިއްބެވިކަން ނޭންގި މައްސަލަ ޝެޑިއުލް ކުރެއްވުން. އެހެންވެ މިވާގޮތަކީ މިސާލަކަށް އެދުވަހަކީ ހެކިބަސް ނަގަން އޮންނަ ދުވަސް ކަމަށްވަންޏާ ދައުވާ ލިބޭ މީހާ ގެންދެވުނަސް އަދި ދައުވާ ކުރާ ފަރާތް ގެންދެވުނަސް ހެކިވެރިން ހާޒިރު ނުކުރެވެންޏާ މައްސަލަ ކެންސަލްވެގެންދާނީ،" ޕީޖީ ބިޝާމް ވިދާޅުވި އެވެ.
މައްސަލައެއް ތާވަލުކޮށްފައި އޮވެއްޖެނަމަ ޕީޖީގެ ވަކީލުން އެއަށް އެޓެންޑްކުރައްވާނެ ކަމަށާއި އެކަމުގެ ޔަގީންކަން ހުރިހާ ކޯޓުތަކަށްވެސް އަރުވާކަމަށް ބިޝާމް ވަނީ ވިދާޅުވެފަ އެވެ.
"ކޮންމެ ގަޑިއަކަށް މައްސަލަތައް ޝެޑިއުލް ކުރެވުނު ނަމަވެސް އަޅުގަނޑުމެންގެ ވަކީލުން ހަމަ ދަތުރުކޮށްފައި ވަޑައިގަންނަވާނެ. އެ ޔަގީންކަން އަޅުގަނޑު އަރުވަން ބޭނުން،" ޕީޖީ ވިދާޅުވި އެވެ.
އޭގެއިތުރުން ރަށްރަށުގައި މައްސަލަތައް ޝެޑިއުލް ކުރާއިރު ވެސް އެއްވަގުތެއްގައި ކުރިއަށްގެންދެވެން ހުންނަ ހުރިހާ މައްސަލަތައް ޖެހިޖެހިގެން ކުރިއަށް ގެންދެވޭނެ ގޮތަކަށް ތާވަލުކުރެއްވުމުން ދަތުރަށް ދާ ޚަރަދު ކުޑަވެގެންދާނެ ކަމަށް ޕީޖީ ވަނީ ވިދާޅުވެފަ އެވެ.