26 May 2016, 20:24
މޯބައިލް ފޯނު ބޭނުންކޮށްގެން ފައިސާގެ ގިނަ މުއާމަލާތް ކުރެވޭ ގޮތަށް އުރީދޫ އިން ފަށާފައިވާ މޯބައިލް މަނީގެ ހިދުމަތް ދިނުމަށް އެވްރީތިން ރެޑް އާއެކު އެއްބަސްވުމެއްގައި ސޮއިކޮށްފިއެވެ.
މޯބައިލް ފޯނު މެދުވެރިކޮށް ފައިސާ ދެއްކުން އަދި ޓްރާންސްފާ ފަދަ ފައިސާގެ މުއާމަލާތްތައް ކުރެވިގެންދާ މޯބައިލް މަނީގެ ހިދުމަތް ދިނުމަށް އެވްރީތިން ރެޑުން އެއްބަސްވެފައިވާއިރު، އެ އެއްބަސްވުމުގެ ދަށުން އެ ކުންފުނިން ދޭ ހުރިހާ ހިދުމަތްތަކަށް އުރީދޫ މޯބައިލް މަނީގެ ހިދުމަތް ބޭނުންކޮށްގެން ފައިސާ ދެއްކޭނެ އެވެ.
އެވްރީތިން ރެޑްގެ މެނޭޖިން މާކެޓިން އެންޑް ޕީއާރު ނާވީ އާދަމް ވިދާޅުވީ، މޯބައިލް މަނީގެ ހިދުމަތް އުރީދޫ އިން ފެށިހާ އަވަހަށް އެ ހިދުމަތް އެ ކުންފުނިން ލިބިގެންދާނެ ކަމަށެވެ.
"އެވްރިތިން ރެޑް" ކުންފުނީގެ ދަށުން ހިންގާ "ފުޑްހަބް" އަކީ ކާތަކެއްޗަށް އޯޑަރު ދެވޭގޮތަށް ރާއްޖޭގައި މޮބައިލް އެޕެއް ތައާރަފުކުރި ފުރަތަމަ ކުންފުންޏެވެ. އަދި މޯބައިލް މަނީގެ ހިދުމަތް ފެށުމުން ފުޑްހަބް މޯބައިލް އެޕްގައި ހުރި 70 އަށްވުރެ ގިނަ ރެސްޓޯރެންޓުން ކާތަކެތި އޯޑާކޮށް، ބިލް ޕޭކުރެވޭނެ އެވެ.
މޯލްޑިވްސް މަނިޓަރީ އޮތޯރިޓީން ހުއްދަ ލިބިފައިވާ އުރީދޫ އިން ފަށާ މޮބައިލް މަނީ ޚިދުމަތަކީ އެ ކުންފުނިން ރާއްޖެ އަށް މުޅިން އަލަށް ތައާރަފު ކުރި ޚިދުމަތެކެވެ.
އެ ޚިދުމަތުގެ ޕައިލެޓް ސްޓޭޖު ފަށާފައިވާ އިރު، އުރީދޫ އިން ބުނަނީ އެކުންފުނީގެ މޯބައިލް މަނީ ޚިދުމަތާ އެކު ކަސްޓަމަރުންނަށް އިތުރު ފަސޭހަކަން ލިބި، ރައްކާތެރިކަމާ އެކު ފައިސާގެ މުއާމަލާތްތައް ކުރިޔަށް ގެންދިއުމުގެ ފުރުސަތު ލިބޭނެ ކަމަށެވެ.
މޯބައިލް މަނީ ޚިދުމަތުގައި ހިމެނޭ ވާޗުއަލް "އެމް ވޮލެޓް" މެދުވެރިކޮށް ކަސްޓަމަރުންނަށް މޯބައިލް ފޯނު ބޭނުންކޮށްގެން ފައިސާ ޓްރާންސްފާ ކުރުމާއި އުރީދޫ ޕްރީޕެއިޑް އެކައުންޓް ރީޗާޖު ކުރުމާއި ބިލު ދެއްކުމުގެ އިތުރުން ވިޔަފާރި ވެސް ކުރެވޭނެ ކަމަށް އުރީދޫ އިން ބުންޏެވެ.
ރާއްޖޭގެ ހުރިހާ ރަށެއްގައި ހުރި އެސްޓީއޯގެ ފާމަސީތައް މެދުވެރިކޮށް އުރީދޫ މޯބައިލް މަނީގެ ޚިދުމަތް ބޭނުންކުރެވޭ ގޮތް ހަމަޖެއްސުމަށް އެސްޓީއޯ އާއި އުރީދޫއާއެކު ވެސް ވަނީ މިމަހުގެ 10 ވަނަ ދުވަހު އެއްބަސްވެފައެވެ.