27 May 2016, 18:18
އަސްކަރީ ހަތިޔާރާއި ތަމްރީންތަކަށާއި ސަވަލަޔަންސް އަށް ބޭނުންކުރެވޭނެ ދެ މަތިންދާ ބޯޓުގެ އިތުރުން މީހުންނާއި ތަކެތި އުފުލުމަށް އުޅަނދުތައް ރާއްޖެއަށް ގަތުމަށް 10 މިިލިއަން ޑޮލަރުގެ ލޯނެއް ދޭން ޕާކިސްތާނުން ނިންމައިފި އެވެ.
އެފަދަ ލޯނެއް ރާއްޖެއަށް ދިނުމަށް ނިންމާފައިވާކަން ހާމަކުރެއްވީ ޑިފެންސް މިނިސްޓަރު އާދަމް ޝަރީފު އުމަރު ޕާކިސްތާނަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު މާލެ ވަޑައިގެން އިބްރާހިމް ނާސިރު އިންޓަނޭޝަނަލް އެއާޕޯޓު (އައިއެންއައިއޭ)ގައި ނޫސްވެރިންނަށް މައުލޫމާތު ދެއްވަމުންނެވެ.
ޕާކިސްތާނުގެ ސަރުކާރުން ރާއްޖޭގެ އަސްކަރިއްޔާއަށް ދޭން ނިންމާފައިވާ އެ ކްރެޑިޓް ލައިން ފެސިލިޓީގެ އެއްބަސްވުމުގައި އަންނަ ޖުލައި މަސްތެރޭގައި ސޮއި ކުރާނެ ކަމަށް މިނިސްޓަރު އާދަމް ޝަރީފް ވިދާޅުވި އެވެ.
އޭނާ ވިދާޅުވީ، ޕާކިސްތާނަށް ކުރެއްވި ދަތުރުފުޅުގެ ސަބަބުން ދިވެހި އަސްކަރިއްޔާއަށް ބޮޑެތި ކުރިއެރުންތަކެއް ލިބިގެންދާނެ ކަމަށެވެ.
އެގޮތުން، ރައީސް ޔާމީން މިދިޔަ އަހަރުގެ މެއި މަހުގެ ތެރޭގައި ޕާކިސްތާނަށް ކުރެއްވި ރަސްމީ ދަތުރުފުޅުގައި އެ ގައުމުން ރާއްޖޭގެ އަސްކަރިއްޔާއަށް ދެއްވަން ނިންމާފައިވާ 10 މިލިއަން ޑޮލަރުގެ ކުރެޑިޓް ލައިން ފެސިލިޓީގެ އެއްބަސްވުމުގައި ޖުލައި މަހުގެ ތެރޭގައި ސޮއިކުރެވޭނެ ކަމަށް ވިދާޅުވި އެވެ.
ޕާކިސްތާނަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު ޑިފެންސް މިނިސްޓަރު އާދަމް ޝަރީފް އުމަރު އެއާޕޯޓްގައި --- ސަން ފޮޓޯ/ ޔޫސުފް ސޮފްވާން ރަޝީދު
ޕާކިސްތާނުން ރާއްޖެއަށް ދޭ ލޯނުގެ ދަށުން މިއަހަރު ނިމުމުގެ ކުރިން ރާއްޖެއަށް ބޭނުންވާ އަސްކަރީ ހަތިޔާރާއި ތަމްރީންތަކަށާއި ސަވަލަޔަންސް އަށް ބޭނުންކުރެވޭނެ ދެ މަތިންދާ ބޯޓުގެ އިތުރުން މީހުންނާއި ތަކެތި އުފުލުމަށް އުޅަނދުތަކެއް ގެނެވޭނެ ކަމަށް ޑިފެންސް މިނިސްޓަރު ވިދާޅުވި އެވެ.
މީގެ އިތުރުން، ދިވެހި އަސްކަރިއްޔާއަށް ބޭނުންވާ އިންސާނީ ވަސީލަތްތަކަށް ވެސް އެ ލޯނު ބޭނުންކުރެވޭނެ ކަމަށް ވިދާޅުވި އެވެ. ނަމަވެސް އެ ލޯން އަނބުރާ ދައްކަންޖެހޭނީ ކިތައް އަހަރުގެ ތެރޭގައި ކަމެއް މިނިސްޓަރު ވިދާޅެއްނުވެ އެވެ.
ޑިފެންސް މިނިސްޓަރު އާދަމް ޝަރީފު ޕާކިސްތާނަށް ކުރެއްވި ރަސްމީ ދަތުރުފުޅަކީ އެގައުމުގެ ޑިފެންސް މިނިސްޓަރު ހަވާޖާ މުހައްމަދު އާސިފް ދައުވަތަކަށް އެ ގައުމަށް ކުރެއްވި ދަތުރުފުޅެކެވެ. އެ ދަތުރުފުޅުގައި ޕާކިސްތާނުގެ ރައީސް މަމްނޫން ހުސެއިންގެ އިތުރުން އެގައުމުގެ އަސްކަރިއްޔާގެ އެންމެ އިސް ޗީފުންނާ ބައްދަލުކުރައްވާފައިވެ އެވެ.
ޕާކިސްތާނަށް ކުރެއްވި ރަސްމީ ދަތުރުފުޅު ނިންމަވާލެއްވުމަށްފަހު ޑިފެންސް މިނިސްޓަރު އާދަމް ޝަރީފް އުމަރު ނޫސްވެރިންނަށް މައުލޫމާތު ދެއްވަނީ --- ސަން ފޮޓޯ/ ޔޫސުފް ސޮފްވާން ރަޝީދު
މީގެ އިތުރުން، އަސްކަރިއްޔާ ހަތިޔާރު އުފައްދާ ބައެއް ފެކްޓަރީ ތަކަށާއި މަތިންދާބޯޓު އުފައްދާ ކުންފުނިތަކަށް ޒިޔާރަތްކޮށްފައިވެ އެވެ. އަދި ޓެރަރިޒަމް އިން އެ ގައުމުން ކުރަމުންދާ މަސައްކަތްތައް ވެސް ޑިފެންސް މިނިސްޓަރު ވަނީ ބައްލަވާލައްވާފައިވެ އެވެ.
ޕާކިސްތާނަށް ކުރެއްވި ދަތުރުފުޅުގެ އަމާޒަށް ވާސިލް ކުރެވުނު ކަމަށް ފާހަގަކުރައްވައި ޑިފެންސް މިނިސްޓަރު އާދަމް ޝަރީފު ވިދާޅުވީ، ޕާކިސްތާން ސަރުކާރާއެކު ރާއްޖޭގައި ގާއިމްކުރާ ކައުންޓާ ޓެރަރިޒަމްގެ ސެންޓަރުގެ މަޝްވަރާތަކެއް ވެސް ދަތުރުފުޅުގައި ކުރި ކަމަށެވެ.
އެގޮތުން އެ ސެންޓަރު ގާއިމްކުރުމަށް ޕާކިސްތާނުގެ ތަޖުރިބާކާރުން ބޭފުޅުންގެ އެހީތެރިކަން ރާއްޖެއަށް ލިބިގެންދާނެ ކަމުގެ ޔަގީންކަން ދެއްވި ކަމަށް އޭނާ ވިދާޅުވި އެވެ.