29 May 2016, 19:07
މުޅި ރާއްޖެއަށް ރީބްރޯޑްކާސްޓްކުރުމުގެ ލައިސަންސަށް އެދި ހުށަހެޅުމުގެ ފުރުސަތު މޯލްޑިވްސް ބްރޯޑްކާސްޓިންގް ކޮމިޝަނުން މިއަދު ހުޅުވާލައިފި އެވެ.
އެ ކޮމިޝަނުން ކުރި އިއުލާނެއްގައި ބުނެފައި ވަނީ ޝަރުތު ހަމަވާ ފަރާތްތަކުން ލައިސަންސަށް އެދި ފޯމު ހުށަހެޅުމުގެ އެންމެ ފަހު ތާރީހަކީ އަންނަ މަހުގެ 29 ވަނަ ދުވަހާ ހަމައަށް ކަމަށެވެ.
ބްރޯޑްކާސްޓްކުރުމުގެ ގާނޫނު ބުނާ ގޮތުން، ރީބްރޯޑްކާސްޓްކުރަން އެދޭ ޗެނަލަކީ، އެހެން ގައުމެއްގައި، އެ ގައުމުގެ ގާނޫނާއި ގަވާއިދާ އެއްގޮތްވާ ގޮތުގެމަތިން ދޫކޮށްފައިވާ ބްރޯޑްކާސްޓްކުރުމުގެ ލައިސަންސެއްގެ ދަށުން ބްރޯޑްކާސްޓްކުރާ ޗެނަލަކަށް ވާން ޖެހޭނެ އެވެ.
ލައިސަންސަށް އެދޭ ފަރާތަކީ ރީބްރޯޑްކާސްޓް ކުރެވޭ ކޮންޓެންޓް ރީބްރޯޑްކާސްޓްކުރުމުގެ ހައްގު ލިބިފައިވާ ފަރާތަކަށް ވާން ޖެހޭނެ އެވެ.
އެ ލައިސަންސަށް އެދި ހުށަހަޅާ ފޯމު އެ ކޮމިޝަނުގެވެބްސައިޓުންނާއި ކޮމިޝަނުގެ ރިސެޕްޝަނުން ވެސް ލިބެން ހުންނާނެ ކަމަށް އެކޮމިޝަނުން ބުނެ އެވެ.
މިހާރު 111 ފަރާތަކަށް ރީބްރޯޑްކާސްޓު ކުރުމުގެ ލައިސެންސް ދޫކޮށްފައި ވީނަމަވެސް، މުޅި ރާއްޖެއަށް ރީބްރޯޑްކާސްޓު ކުރުމުގެ ހުއްދަ ދީފައި ވަނީ މުވާސަލާތީ ކުންފުނި ދިރާގަށް އެކަންޏެވެ.
ބުރޯޑްކާސްޓިން ކޮމިޝަނުން ބުނީ މުޅި ރާއްޖެއަށް ރީބްރޯޑްކާސްޓް ކުރުމުގެ ހުއްދަ ދިރާގަށް ދީފައިވަނީ 2013 ވަނަ އަހަރުގެ އޭޕްރީލް މަހުން ފެށިގެން 29 ޖެނުއަރީ 2023 ގެ ނިޔަލަށެވެ.
އެ ފުރުސަތު ދިރާގަށް ދިނީ މުޅި ރާއްޖެއަށް ރީބުރޯޑްކާސްޓު ކުރުމަށް ހުޅުވާލި ފުރުސަތުގައި އެ ކުންފުނި ފިޔަވައި އިތުރު ކުންފުންޏަކުން ކުރިމަތިލާފައި ނުވާތީ އެވެ.