01 Jun 2016, 10:10
އިންޑިއާގެ މިއުޒިކް ލެޖެންޑު ލަތާ މަންގޭޝްކަރު އަދި އިންޑިއާގެ ކުރިކެޓު ލެޖެންޑު ސަޗިން ޓެންޑޫލްކަރަށް މަލާމާތްކޮށް، އިންޑިއާގެ ސްޓޭންޑް އަޕް ކޮމީޑިއަން، ތަންމޭ ބަޓް އާންމު ކުރި ވީޑިއޯގެ މައްސަލަ މިހާރު ވަނީ ވަރަށް ބޮޑަށް ހޫނުވެފަ އެވެ.
"ފޭސް ސުވެޕް" ހަދައިގެން ލަތާ އަދި ސަޗިން އަށް މަލާމާތްކޮށް ތަންމޭ އާންމު ކުރި ވީޑިއޯ އާ ގުޅިގެން ސިޔާސީ ޕާޓީތަކާއި ބޮލީވުޑުގެ ފަންނާނުންނާއި ކުރިކެޓު ކުޅުންތެރިން ވެސް ވަނީ ތަންމޭ އަށް ވަރަށް ބޮޑަށް ފާޑު ކިޔައިފަ އެވެ.
އިންޑިއާގެ ސިޔާސީ ޕާޓީއެއް ކަމަށްވާ، މަހާރާޝްތުރަ ނަވްނިރުމަން ސެނާ އިން އެ މައްސަލަ ފުލުހުންނަށް ހުށަހެޅުމުން ފުލުހުން ވަނީ މައްސަލަ ތަހުގީގު ކުރަން ފަށައިފަ އެވެ. އަދި އެ ވީޑިއޯ އިންޓަނެޓުން ނެގުމަށް، ގޫގުލް އަދި ޔޫޓިއުބުގެ ފަރާތުން ވެސް އިންޑިއާ ފުލުހުން މިހާރު ވަނީ އެދިފަ އެވެ.
ސަޗިން އަދި ލަތާއަށް މަލާމާތްކޮށް ވަނީ ވީޑިއޯ އެއް އާންމުކޮށްފައި. އެ ވީޑިއޯ އަކީ "ފޭސް ސްވެޕް" ހަދާފައިވާ ވީޑިއޯ އެއް --
ވީޑިއޯ ރިލީޒް ކުރި ހިސާބުން ވެސް އެންމެން އިންތިޒާރު ކުރަމުން ދިޔައީ އެ ވީޑިއޯ އާގުޅިގެން ސަޗިން އަދި ލަތާ ބުނާނެ އެއްޗަކަށެވެ. މިހާތަނަށް ސަޗިން ވީޑިއޯ އާ ގުޅިގެން އެއްޗެއް ނުބުނި ނަމަވެސް، ލަތާ މިވަނި އެކަމާ ގުޅިގެން ވާހަކަދައްކައިފަ އެވެ.
ލަތާ ބުނީ އެ ވީޑިއޯ ނުބަލާ ކަމަށާއި އަދި ވީޑިއޯ ބެލުމުގެ އެއްވެސް ޝައުގުވެރިކަމެއް ނެތް ކަމަށެވެ. ހަމައެއާ އެކު، ތަންމޭ ބަޓް އަކީ ދަންނަ މީހެއް ނޫން ކަމަށް ވެސް ލަތާ ވަނީ ބުނެފަ އެވެ.
"އަހަރެން ނުބަލަން އެ ބުނާ ވީޑިއޯ އެއް. ބަލާކަށް ބޭނުމެއް ވެސް ނޫން. އަދި އެއްޗެއް ބުނާކަށް ވެސް ނެތިން. އެކަމަކު ބުނެލަން އޮތީ، ތަންމޭ ބަޓް އަކީ އަހަރެން ދަންނަ ވެސް މީހެއް ނޫނޭ. އެއީ ކާކު ކަމެއް އަހަންނަކަށް ނޭނގޭ،" ލަތާ ބުނެފައިވެ އެވެ.
ލަތާ އަދި ސަޗިން އަށް މަލާމާތްކޮށް ތަންމޭ އާންމު ކުރި ވީޑިއޯގައި ސަޗިންގެ ހުނަރާއި ލަތާގެ އުމުރަށް ވަނީ ފާޑުކިޔައިފަ އެވެ.
އިންޑިއާގެ ސްޓޭންޑް އަޕް ކޮމީޑިއަން، ތަންމޭ ބަޓް: ލަތާ އަދި ސަޗިން އަށް މަލާމާތްކޮށް ތަންމޭ އާންމު ކުރި ވީޑިއޯގެ މައްސަލަ ވަނީ ވަރަށް ބޮޑަށް ހޫނު ވެފައި --
އެގޮތުން ވިރާތު ކޯލީ އަކީ ސަޗިން އަށް ވުރެ މޮޅު ކުރިކެޓް ކުޅުންތެރިއެއް ކަމަށް ލަތާ ގަބޫލުކުރާ ކަމަށް ބުނެފައިވެ އެވެ. އޭގެ ޖަވާބުގައި ލަތާ އަކީ މިހާރު އުމުރުން 5000 އަހަރު ވެފައިވާ މީހެއް ކަމަށާއި ލަތާގެ މޫނު މަތިން އޭނާ އަކީ އަށް ދުވަސް ވަންދެން ފެނުގައި ބޭއްވުމަށް ފަހު ނަގާފައި ހުރި މީހެއް ހެން ހީވާ ކަމަށް ބުނެފައިވެ އެވެ.
އޭގެ އިތުރުން ވެސް ވަރަށް ހުތުރު ބަހުން އެ ވީޑިއޯގައި ވަނީ ވާހަކަ ދައްކައިފަ އެވެ.
ކޮމީޑިއަން އެއްގެ އިތުރުން، ތަންމޭ އަކީ ސްކްރިޕްޓު ލިޔާ މީހެކެވެ. އަދި ޕްރޮޑިއުސަރެއްގެ އިތުރުން އޭނާ އަކީ އިންޑިއާގެ ކޮމެޑީ ސްކެޗް ގުރޫޕް، "އޯލް އިންޑިއާ ބަކްޗޯޑް" ގެ ކޯ ފައުންޑާވެސްމެ އެވެ. (ސްޕޮޓްބޯއީ)