01 Jun 2016, 11:55
ހިދުމަތުގެ ފެންވަރު ދަށްވެ، އއ. މަޑޫގަލި ރިސޯޓު ޖޫރިމަނާކޮށް އެއް މިލިއަން ރުފިޔާ ދައްކަން ޓުއަރިޒަމް މިނިސްޓްރީ އިން އެންގީ ރަނގަޅަށް ކަމަށް ނިންމައި ސިވިލް ކޯޓުން ހުކުމް ކޮށްފި އެވެ.
ބްލޫ ލެގޫން އިންވެސްޓްމެންޓް ޕްރައިވެސްޓް ލިމިޓެޑުން ހިންގަމުން އަންނަ މަޑޫގަލި ރިސޯޓު 2013 ވަނަ އަހަރު ޖޫރިމަނާކޮށްފައި ވަނީ މުވައްޒަފުންގެ އެކޮމޮޑޭޝަންގެ ފެންވަރު ދަށްވެފައިވާ ކަމަށް ބުނެ އެވެ. އޭގެ އިތުރުން ކުނި އަންދާ މެޝިނެއް ނެތުމާއި ބިއްލޫރި ނައްތާ މެޝިނެއް ނެތުމާއި އެރިޒޯޓްގެ އަލިފާން ނިންވާ ނިޒާމްގެ ފެންވަރު ދަށްވުމަކީ ވެސް ޖޫރިމަނާ ކުރި ސަބަބެއް ކަމަށް ޓޫރިޒަމް މިނިސްޓްރީ އިން އޭރުވަނީ ބުނެފަ އެވެ.
މަޑޫގަލި ރިސޯޓުގެ ފަރާތުން ކޯޓުގައި ދައުވާ ކުރީ ޓުއަރިޒަމް މިނިސްޓްރީ އިން އެންގި އެންގުން ބާތިލުކޮށްދިނުމަށް އެދި އެވެ. އެމައްސަލަ ބަލައި މިދިއަ އާދިއްތަ ދުވަހު ކޯޓުން ކުރި ހުކުމުގައި ބުނެފައި ވަނީ ޓޫރިޒަމް މިނިސްޓްރީ އިން ނިންމުމަކީ ގާނޫނު އަސާސީއާ ހިލާފަށް ނިންމުމެއް ނޫން ކަމަށް ސާބިތުވާ ކަމަށެވެ.
ޓޫއަރިޒަމް މިނިސްޓްރީ އަށް އެއް މިލިއަން ރުފިޔާ ދައްކަން މަޑޫގަލި ރިސޯޓަށް ދިނީ 14 ދުވަހުގެ މުއްދަތެކެވެ.