03 Jun 2016, 15:41
އައިއެސް ޖަމާއަތުގެ ޖައްލާދުން (މީހުން ކަތިލައި ބޯބުރިކުރާ މީހުން) ގެ ތެރޭގައި ހިމެނޭ އެންމެ ނުރައްކާތެރި ޖައްލާދު ސޫރިޔާ ސިފައިންގެ އަތްދަށުވެއްޖެއެވެ.
އިނގިރޭސިވިލާތުގެ ނޫހެއްކަމަށްވާ ޑެއިލީ މެއިލް ބުނާގޮތުން އައިއެސް އިސް ޖައްލާދު ސޫރިޔާ ސިފައިންގެ އަތްދަށުވީ ސޫރިޔާގެ ވައިގެ ހަމަލާއެއްގައި ވަރަށް ބޮޑަށް ޒަޚަމްވެ ހަނގުރާމައިގެ މައިދާނަށް ވެއްޓިފައި ވަނިކޮށެވެ. ސޫރިޔާ ސިފައިން ވަނީ ހަނގުރާމައިގެ މައިދާނަށް ވެއްޓިފައިވާ އައިއެސްގެ އިސް ޖައްލާދު ލޮރީއެއްގައި ގެންގޮސްފައި ކަމަށްވެސް ސޫރިޔާގެ ރަސްމީ ޓީވީ އާ ހަވާލާދީ ޑެއިލީ މެއިލް ބުނެއެވެ.
ސޫރިޔާގެ ރަސްމީ ޓީވީން ވަނީ އައިއެސްގެ އިސް ޖައްލާދު ސޫރިޔާ ސިފައިންގެ އަތްދަށުވި މަންޒަރާއި ލޮރީއެއްގައި ސޫރިޔާ ސިފައިން އޭނާ ގެންދާ މަންޒަރު ދައްކާފައެވެ. އައިއެސްގެ އިސް ޖައްލާދު މަޝްހޫރު ވެފައިވަނީ ބުލްޑޯޒަރުގެ ގޮތުގައެވެ.
އައިއެސްގެ ބޮޑު ޖައްލާދު ކުޑަކުއްޖެއްގެ ކަރުބުރިކޮށްލަނީ
މިމަންޒަރުގައި އޭނާ ފެންނަނީ ގަމީހެއްނެތި ހަށިގަނޑުގެ މަތީބައި އޮރިޔާން ހާލުގައެވެ. އައިއެސްގެ އިސް ޖައްލާދުގެ ނަން ސޫރިޔާގެ ޓީވީންވެސް އަދި ޑެއިލީ މެއިލް އިންވެސް ހާމަކޮށްފައެއް ނުވެއެވެ. ނަމަވެސް އޭނާއަކީ މީހުން ކަތިލުމަށްފަހު އެމީހުންގެ ގުނަވަންތައް ބުރިކޮށް ހަދާ އާދަޔާ ޚިލާފަށް އަނިޔާވެރި ބްރޫޓަލް މީހެއް ކަމަށް ރިޕޯޓްތައް ބުނެއެވެ. ޚާއްސަކޮށް ކުޑަކުދިން ކަރުބުރިކޮށް ކަތިލުމަށްފަހު އެކުދިންގެ ގުނަވަންތައް ބުރިކުރުމަކީ އައިއެސްގެ އިސް ޖައްލާދު ވަރަށް ގިނައިން ކުރާކަމެއްކަމަށް ރިޕޯޓްތައް ބުނެއެވެ. އައިއެސްގެ ކުރީގެ އެންމެ ބޮޑު ޖައްލާދު ނުވަތަ ޖިހާދީ ޖޯންވެސް ވަނީ އެމެރިކާގެ ވައިގެ ހަމަލާތަކެއްގައި މީގެ އަހަރެއްހާ ދުވަސްކުރިން މަރުވެފައެވެ.
އައިއެސްގެ ބޮޑު ޖައްލާދަކީ ބުލްޑޯޒަރުގެ ގޮތުގައި ސިފަކުރެވޭ މުޖްރިމެއް
ޖިހާދީ ޖޯންއަކީ ކުވައިތަށް އުފަން އިނގިރޭސިވިލާތުގެ ރައްޔިތެކެވެ. އޭނާގެ ނަމަކީ މުހައްމަދު އިމްވާޒީއެވެ. އިމްވާޒީ އަށް ޖިހާދީ ޖޯން ގެ ނަމުން ނަންދީފައިވާއިރު އައިއެސް އިސް ޖައްލާދަށް ދީފައިވަނީ ބުލްޑޯޒަރުގެ ނަމެވެ. (ޑެއިލީ މެއިލް)