05 Jun 2016, 15:59
މި އަހަރުގެ ރަމަޟާން މަސް މާދަމާ ފެށޭ އިރު، ސަރުކާރުގެ ފަރާތުން ރައްޔިތުންނަށް ބަހާ ކަދުރު، މާލޭގެ ރައްޔިތުންނަށް ބެހުމަށް ބޭނުންވާ ވަސީލަތްތައް ނެތުމުގެ ސަބަބުން، މާލެ ސިޓީ ކައުންސިލަށް އެ މަސައްކަތް ކުރެވެން ނެތްކަމަށް އެ ކައުންސިލުން ބުނެފި އެވެ.
މާފަންނު އަވަށު އޮފީހުގައި، މާލެ ސިޓީ ކައުންސިލުން މިއަދު ބޭއްވި ނޫސްވެރިންގެ ބައްދަލުވުމެއްގައި، އެ ކައުންސިލްގެ މޭޔަރު މުހައްމަދު ޝިހާބު ވިދާޅުވީ، ނިމިދިޔަ މެއި މަހުގެ 31 ވަނަ ދުވަހު ލޯކަލް ގަވަމެންޓް އޮތޯރިޓީ އިން ކައުންސިލަށް ސިޓީއެއް ފޮނުވާފައިވާ ކަމަށާއި އެ ސިޓީގައި ވަނީ މާލެ ސިޓީގެ ރައްޔިތުންނަށް ކަދުރު ބެހުމުގެ މަސައްކަތް ކުރުމަށް އަންގާފައި ކަމަށެވެ.
ޝިހާބު ވިދާޅުވީ، ޖެހިގެން އައި، ޖޫން އެއް ވަނަ ދުވަހު އެ ސިޓީގެ ޖަވާބު މާލެ ސިޓީ ކައުންސިލުން ދީފައިވާނެ ކަމަށާއި އޭގައި ސިޓީ ކައުންސިލުން ބުނީ، ކައުންސިލުގައި އެ މަސައްކަތް ކުރުމަށް މުވައްޒަފުންނާއި ވަސީލަތްތައް ނެތް ކަން ކަމަށެވެ.
"އަޅުގަނޑުމެން ކައުންސިލަރުން މިތިބީ މިތަނަށް އައިސް ރައްޔިތުންނަށް ކަދުރު ބަހަން ތިބެން. އެކަމަކު މާލޭގެ ރައްޔިތުން އައިސް މިތާ މަގުމަތީގައި ތިބެން ޖެހޭނީ. ތަނެއް ނެތް،" މޭޔަރު ޝިހާބު ވިދާޅުވި އެވެ.
ޝިހާބު ވިދާޅުވީ، އެލްޖީއޭ އަށް ފޮނުވި ސިޓީގެ ޖަވާބު ސިޓީ ކައުންސިލަށް އަދިވެސް ނުލިބޭ ކަމަށެވެ. އަދި މިއަދު ވެސް އެލްޖީއޭގެ ފަރާތުން ބޭފުޅަކު ގުޅައި، ކަދުރު ބަހައިދިނުމަށް އެދުނު ކަމަށް ޝިހާބު ފާހަގަ ކުރެއްވި އެވެ.
"އަޅުގަނޑުމެން ދެންނެވިން ކިހިނެއްތޯއޭ ބަހާނީ. މީގެ ކުރިން 2،000 ހާ މުވައްޒަފުން އުޅުނު ތަނެކޭ، އޭރު މާލޭގެ ބޮޑުބައެއް އޮތީ ކައުންސިލްގެ އަތް ދަށުގައޭ. މިހާރު އަޅުގަނޑުމެންގެ 100 އެއްހައި މުވައްޒަފުންނޭ ތިބީ. ކައުންސިލްގެ ޚިދުމަތް ދެމުން ކިހިނެއްތޯއޭ ކަދުރު ބަހާނީ،"
ޝިހާބު ވިދާޅުވީ މާލެ ސިޓީ ކައުންސިލްގެ ޒިންމާތަކާއި މަސްއޫލިއްޔަތުތައް ސަރުކާރުގެ އެހެން ވުޒާރާތަކާ ހަވާލުކޮށް، މާލެ ސިޓީ ކައުންސިލުން މަސައްކަތް ކުރާނެ އޮފީހާއި ވަސީލަތްތައް ސަރުކާރުން ރަނގަޅަށް ފޯރުކޮށްދީފައި ނުވާ ކަމަށެވެ.
މާލެ ސިޓީ ކައުންސިލުގައި ވެސް މަސައްކަތް ކުރަނީ ސިވިލް ސާވަންޓުން ކަން ފާހަގަ ކުރައްވައި، މޭޔަރު ޝިހާބު ވިދާޅުވީ، އެ މުވައްޒަފުން މަސައްކަތް ކުރާ ދަތި ހާލުގެ ވާހަކަ ސިޓީގެ ޒަރިއްޔާއިން ހޯމް މިނިސްޓްރީ، ސިވިލް ސާވިލް ކޮމިޝަން އަދި ސަރުކާރުގެ އެހެނިހެން އިދާރާތަކަށް ވެސް ހިއްސާ ކޮށްފައިވާނެ ކަމަށެވެ. އެހެން ނަމަވެސް ކޮންމެ އިދާރާއަކުން ވެސް ކައުންސިލަށް އައިސް ރިޕޯޓެއް ތައްޔާރުކުރުން ނޫން ކަމެއް ނުކުރާ ކަމަށް ސިޓީ ކައުންސިލުގެ މެމްބަރުން ބުނެ އެވެ.