05 Jun 2016, 19:41
ފުނަދޫގައި ހުންނަ އެސްޓީއޯގެ ތެޔޮ ރައްކާކުރާ ތަނުން މެރީޑިއަމް ސާވިސްގެ އުޅަނދުތަކަށް 2010 އެއް ހިސާބުގައި ތެޔޮ ދޫކުރިކަމަށާއި ނަމަވެސް ދޫކުރެވުނީ ކިހާވަރަކަށްކަން ނޭނގޭކަމަށް ބުނެ އެސްޓީއޯގެ ފަރާތުން ހުށަހެޅި ހެކިންގެ ތެރެއިން އެތަނުގެ ހަތަރު މުވައްޒަފަކު ހެކިބަސްދީފި އެވެ.
އެސްޓީއޯ އިން ކޯޓުގައި ދައުވާކޮށްފައިވަނީ މެރީޑިއަމް ސާވިސްއާއެކު ތެޔޮ ދޫކުރުމަށް މާޗް 31، 2010 ވަނަ ދުވަހު ވެވުނު އެއްބަސް ވުމުގެ ދަށުން އެސްޓީއޯ އިން ކްރެޑިޓަށް ނަގާފައިވާ ތެލަށް ޖޫރިމާނާ އެކު ޑިސެމްބަރު 1، 2010ގެ ނިޔަލަށް އަރާފައިވާ 19،333،6272.20 ރުފިޔާ ހޯދުމަށެވެ.
އެސްޓީއޯގެ ފަރާތުން ހުށަހެޅި ހަ ހެއްކެއްގެ ހެކިބަސް މިއަދުގެ ޝަރީއަތުގެ މަޖިލީހުގައި ވަނީ ނަގާފަ އެވެ. ހެކިންގެ ތެރޭގައި ހިމެނެނީ އެސްޓީއޯއިން ފުނަދޫގައި ތެޔޮދޫކުރުމަށް ހަދާފައިވާ މަރުކަޒުގައި މަސައްކަތްކުރާ މުވައްޒަފުންގެ ތެރެއިން ދޯނިތަކަށް ތެޔޮ ދޫކުރާ ހަތަރު މުވައްޒަފަކާއި އޭރު ފުނަދޫގައި ސްޓޭޝަނުގެ އިސްވެރިއަކަށް ހުރި ފަރާތާއި މެރީޑިއަމަށް ތެޔޮދޫކުރި ކަމަށް ބުނެ އެސްޓީއޯއިން ކޯޓަށް ހުށަހަޅާ ލިޔެކިޔުންތައް ކޮޕީ ނެގި ފަރާތެވެ.
ފުނަދޫގައި ތެޔޮދޫކުން ތިބޭ ފަރާތްތަކުގެ ތެރެއިން ކޯޓުގައި ހެކިބަސްދިން ހަތަރު މީހުންވެސް ބުނެފައިވަނީ މެރީޑިއަމްގެ އުޅަނދުތަކަށް އެމީހުން ތެޔޮ ދޫކުރި ކަމަށެވެ. އަދި އެއީ މެރީޑިއަމްގެ އުޅަނދުތައްކަން ޔަގީންވަނީ ކިހިނެއްތޯ ސުވާލުކުރުމުން ހެކިން ބުނެފައިވަނީ ރިޔާ ނަމަކަށް ކިޔާ ދޯނިތަކަކީ މެރީޑިއަމްގެ ދޯނިތައްކަމަށެވެ. މެރީޑިއަމްގެ ދޯނިތަކުގެ ތެރެއިން ރިޔާ 7، ރިޔާ 8، ރިޔާ 11 އުޅަނދު ހުރިހަ ހެކިންވެސް ހަނދާން ހުއްޓެވެ. އަދި އެ އުޅަދުތަކަށް ތެޔޮ ދޫކުރިކަމަށް ހެކިން ބުންޏެވެ.
ތެޔޮ ދޫކޮށްފައިވާ އަދަދާ ބެހޭގޮތުން މެރީޑިއަމްގެ ފަރާތުން ވަކީލު ސުވާލު ކުރުމުން ތެޔޮދޫކުރެވުނީ ވަކި ވަރަކަށް ބުނަން ނޭނގޭ ކަމަށް ހެކިން ބުންޏެވެ. އަދި ކޮންމެ ދުވަހަކު ކަހަލަ ގޮތަކަށް އެދުވަސްވަރު މެރީޑިއަމްގެ އެއް އުޅަދަށް ނަމަވެސް ތެޔޮދޫކުރާކަމަށް ހެކިން ބުންޏެވެ.
އޭގެއިތުރުން ތެޔޮދޫކުރަނީ ފުނަދޫ އޮފީހުން ދޫކުރާ ޑެލިވަރީ ސްލިޕެއް ލިބުމުން ކަމަށާއި އެ ސްލިޕުގައި އުޅަނދުގެ ނަމާއި ކެޕްޓަނުގެ ނަން އިންނާނެ ކަމަށް ހެކިން ބުންޏެވެ. ޑެލިވަރީ ސްލިޕެއްކަމަށްބުނެ ދިފާއީ ވަކީލު އެއީ ދެއްކި ސްލިޕަކީ އަސްލުތޯ ނުވަތަ ކޮޕީއެއްތޯ ސުވާލުކުރުމުން ހެކިވެރިން ބުނީ އެއީ އަސްލުކަން ނުވަތަ ކޮޕީއެއްކަން ބުނަން ނޭންގޭ ކަމަށެވެ. ނަމަވެސް ޑެލިވަރީ ސްލިޕް އިންނަނީ އެގޮތައް ކަމަށް ހެކިވެރިން ވަނީ ބުނެފަ އެވެ.
ފުނަދޫ ތެޔޮ ދޫކުރާތަނުގެ ވެރިއެއްގެ ގޮތުގައި 2006 އަކުން ފެށިގެން 2013 އާ ހަމައަށް މަސައްކަތްކުރި ފަރާތުނެ ހެކިބަސް ދެމުންބުނީ މެރީޑިއަމްގެ ހުރިހާ އުޅަދެއް ހުންނާނީ އެސްޓީއޯގައި ރެޖިސްޓްރީ ކޮށްފައި ކަމަށެވެ. އަދި މެރީޑިއަމްއަށް އެސްޓީއޯއިން ކްރެޑިޓަށް ތެޔޮ ދޫކުރާކަމަށާއި އޭނާ އެސްޓީއޯގެ ވަޒީފާގައި އުޅުނު އިރު ހަނދާންވާގޮތުން އެއްފަހަރު 10 މިލިއަނުގެ ތެޔޮ އަދި އަނެއް ފަހަރަކު 20 މިލިއަން ރުފިޔާގެ ތެޔޮދޫކުރުމަށް އެގްރީމެންޓް ހެދި ކަމަށެވެ.
އެސްޓީއޯއިން މެރީޑިއަމަށް ދޫކުރި އެއްވެސް ބިލެއްގެ މައްސަލަ އޭނާ ވެރިއަކަށްހުރި އިރު މެރީޑިއަމުން ހުށަހަޅާފައިނުވާ ކަމަށް ހެކިބަސްދިން މީހާ ބުންޏެވެ.
މެރީޑިއަމްއަށް ތެޔޮ ދޫކޮށްފއިވާކަމަށް ބުނެ ހުށަހަޅާފައިވާ ލިޔެކިޔުންތައް ކޮޕީ ނެގި ކުއްޖާ ކޯޓުގައި ހެކިބަސް ދެމުން ބުނީ އޭނާ ކޮޕީ ނެގީ އެލިޔެކިޔުންތަކުގެ އަސްލުން ކަމަށާއި އަސްލުކަން އެނގެނީ މެރީޑިއަމް ސްޓޭޕް އޭގައި އިނުމުން ކަމަށެވެ. އަދި ސްޓޭމްޕް އިންނަނީ ަރަތް ކުލާގައި ކަމަށް ހެކިވެރިޔާ ބުންޏެވެ.
ނަމަވެސް ނެގީ ކިތައް ކޮޕީ ކަމެއް އަދި ކޮޕީ ނެގީ ކޮންތާރީހެއްގައިކަމެއް ހަނދާންނެތް ކަމަށް ހެކިބަސްދެމުން އޭނާވަނީ ބުނެފަ އެވެ.
މައްސަލަ ނިންމާލާފައިވަނީ ދެން އިތުރު އަޑުއެހުމެއް މިމަހުގެ ނުވަވަނަ ދުވަހު އޮންނާނެ ކަން އިއުލާނުކޮށްފަ އެވެ. އެދުވަހު ދެފަރާތުންވެސް ހެކިބަހާ ބެހޭގޮތުން ވާހަކަދެއްކުމަށް ފުރުސަތުދެއްވާނެ ކަމަށް ގާޒީ ވިދާޅުވި އެވެ.