06 Jun 2016, 13:00
އޮކިނާވާ(ޖޫން 6): ޖަޕާނުގައި ރުކުރުވާލާފައިވާ އެމެރިކާގެ ކަނޑުގެ ސިފައިންނަށް ބަނގުރާބުއިން މަނާކޮށްފިއެވެ.
ޖަޕާނުގައި ހުންނަ އެމެރިކާ ސިފައިންގެ ކޮމާންޑުން މިކަން މަނާކުރުމުގެ ގޮތުން ނެރުނު އަމުރަށްފަހު ޖަޕާނުގައި ހުންނަވާ އެމެރިކާގެ އިސްކޮމާންޑަރު އެޑްމިރަލް މެތިއޮ ކާޓަރު ވިދާޅުވީ، އެމެރިކާ ސިފައިން ޖަޕާނުގެ އާންމުންނާ ދެކޮޅަށް ޖިނާއީ ގިނަ ޖަރީމާތައް ހިންގާފައިވަނީ މަސްތުވާ ހާލަތުގައި ތިބެގެން ކަމުގައެވެ. އަދި އެމެރިކާ ސިފައިންގެ މިފަދަ އަމަލުތަކުގެ ސަބަބުން ދެގައުމުގެ ބަދަހި ގުޅުންތަކާއި އިތުބާރަށް ބުރޫ އަރަމުންދާތީ މިމައްސަލަ ސީރިޔަސް ކަމެއްގެ ގޮތުގައި ނަގަން އެމެރިކާއަށް މަޖްބޫރު ވެފައިވާ ކަމަށް އޭނާ ވިދާޅުވިއެވެ.
ދެވަނަ ބޮޑު ހަނގުރާމައިގާ އެމެރިކާ އެޓޮމްބޮން އަޅައިގެން ޖަޕާން ބަލިކުރުމަށްފަހު އެމެރިކާ ކަނޑުގެ ސިފައިންގެ ބޮޑު ލަޝްކަރެއް އެގައުމުގައި ރުކުރުވާލާފައިވެއެވެ. ނަމަވެސް މިލަޝްކަރުގެ ސިފައިންގެ އަދަދު މިހާރުވަނީ 18600 އަށް މަދުކޮށްފައެވެ.
މިދިޔަ ހަފްތާގައި ޖަޕާނުގެ ފުލުހުންވަނީ ބަނގުރާ ބޮއިގެން މަސްތުވެގެން ހުރި އެމެރިކާ ސިފައިންގެ މީހަކު ކާރުދުއްވަނިކޮށް އޮކިނާވާއިން ހައްޔަރުކޮށްފައެވެ. މިމީހާ ހައްޔަރު ކުރުމުގެ ކުރިންވަނީ ދެފަހަރެއްގެ މަތިން އެކްސިޑެންޓްވެ ދެމީހުން ޒަޚަމްކޮށްލާފައިވެއެވެ.
އޮކިނަވާގައި ވާ އެމެރިކާގެ އަސްކަރީ ބޭހަށް ހެލިކޮޕްޓަރެއް ތިރިކުރަނީ
އޮކިނާވާގައި ތިބޭ އެމެރިކާ ސިފައިން ރާބޮއިގެން ޖަޕާނުގެ އާންމުންނާ ދެކޮޅަށް މީގެކުރިންވެސް ބޮޑެތި ޖަރީމާތަކެއް ހިންގާފައިވެއެވެ. މީގެތެރޭގައި ޖަޕާނުގެ އަންހެން ކުދިން ވަގަށް ނެގުމާއި އެކުދިން ރޭޕް ކުރުމާއި އަދި ރޭޕްކޮށްލުމަށްފަހު މަރާލުންފަދަ ބޮޑެތި ޖަރީމާތައް ހިމެނެއެވެ. އެމެރިކާ ސިފައިންގެ މިފަދަ ޖަރީމާތަކާ ގުޅިގެން އޮކިނާވާގެ ރައްޔިތުން ގެންދަނީ އެމެރިކާގެ އަސްކަރީ ބޭސްތައް އެހެން ސަރަހައްދަކަށް ބަދަލުކުރަން އެދެމުންނެވެ.
މިމައްސަލައިގައި އޮކިނާވާގެ އާންމުން އެތަށްފަހަރަކު އަޑުއުފުލައި މުޒާހަރާކުރުމާ ގުޅިގެން އެމެރިކާއާއި ޖަޕާނުންވަނީ އޮކިނާވާގައިވާ އެމެރިކާގެ އަސްކަރީ ބޭސް އެހެން ސަރަހައްދަކަށް (މީހުން ދިރިނޫޅޭ އެކަހެރި ސަރަހައްދަކަށް) ބަދަލުކުރުމުގެ އެއްބަސްވުމެއްގައި ސޮއިވެސް ކޮށްފައެވެ. ނަމަވެސް ޚަރަދު ބޮޑުވުމާއެކު އަމަލީގޮތުން މިމަސައްކަތް އަދިވެސް އެމެރިކާ ނުފަށައެވެ.
އެމެރިކާ ސިފައިންގެ މިފަދަ ޖަރީމާތަކާ ގުޅިގެން އެމެރިކާއާއި ޖަޕާނާ ދެމެދު މައްސަލަތައް ޖެހިފައިވެއެވެ. މިއަހަރު ތެރޭގައިވެސް އެމެރިކާ ސިފައިންގެ މީހަކުވަނީ ޖަޕާނުގެ އަންހެން ކުއްޖަކު މަރާލުމުގެ ޖަރީމާއެއް ހިންގާފައެވެ. އެމެރިކާ ސިފައިންގެ މިފަދަ އަނިޔާވެރި އަމަލުތަކާ ގުޅިގެން ޖަޕާނުގެ އާންމުންގެ ރުޅިއާއި ނަފްރަތު އެމެރިކާ ސިފައިންނަށް އަމާޒުވެފައިވާތީ އެމެރިކާގެ ކޮމާންޑަރުންވަނީ ކަންބޮޑުވެފައެވެ. (ރޮއިޓާސް)