12 Jun 2016, 22:31
ކޯޓު އަމުރެއް ތަންފީޒު ކުރުމުގެ ގޮތުން ކުޑަ ކުއްޖަކު އެ ކުއްޖާގެ މަންމައާ ހަވާލުކުރަން ފުލުހުން ހިމަންދޫއަށް ގޮސް، އެ ކުއްޖާއާ ފުލުހުން ހަވާލުވާން އުޅެނިކޮށް، ފުލުހުންގެ މަސައްކަތަށް ހުރަސްއެޅިކަމުގެ ތުހުމަތުގައި ހައްޔަރު ކުރި ތިން މީހުން ހަތް ދުވަހަށް ގޭ ބަންދުކޮށްފި އެވެ.
ފުލުހުން އިއްޔެ އެ ރަށަށް ގޮސް ކޯޓު އަމުރެއްގެ ދަށުން އެތިން މީހުން ހައްޔަރުކޮށް މިއަދު އެ މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ގެންދިއުމުން ގޭ ބަންދަށް ހަތް ދުވަސް ޖަހާފައިވާ ކަމަށް ފުލުހުން މައުލޫމާތުދެ އެވެ.
މިދިޔަ ބުދަ ދުވަހު ކޯޓު އަމުރެއްގެ ދަށުން ފުލުހުން ހިމަންދުއަށް އަރައި އެ ކުއްޖާ މަންމައާ ހަވާލުކުރަން ކުރި މަސައްކަތުގެ ތެރެއިން ފުލުހުންނާއި ހިމަންދޫ ބައެއް ރައްޔިތުންނާއިދެމެދު ވަނީ ކުޑަ ހަމަނުޖެހުންތަކެއް ހިނގާފަ އެވެ. އެ ހަމަނުޖެހުންތައް ކޮންޓުރޯލް ކުރުމަށް ފުލުހުން ވަނީ ޕެޕާ ސްޕްރޭވެސް ޖަހާފަ އެވެ.
އެ ދުވަހު ކުއްޖާގެ ބައްޕަ ވެސް ފުލުހުންގެ އަމުރަށް ނުކިޔަމަންތެރިވި ކަމަށް ބަލައި އޭނާ ހައްޔަރުކޮށް މިހާރު ވަނީ ގޭ ބަންދަށް ފަސް ދުވަސް ޖަހާފަ އެވެ.
ފުލުހުން ހިންގި އޮޕަރޭޝަންގައި ކުއްޖާ ވަނީ މަންމައާ ހަވާލުކޮށްފަ އެވެ.