16 Jun 2016, 10:30
ޒީޓީވީ އިން ގެނެސްދޭ ޑާންސް ރިއަލިޓީ ޝޯވ، "ޑާންސް އިންޑިއާ ޑާންސް"ގެ ދެވަނަ ސީޒަން ކާމިޔާބު ކުރި ކުޅަދާނަ ނެށުންތެރިޔާ، ޝަކްތީ މޯހަން ބޮލީވުޑަށް ނުކުންނަން ތައްޔާރުވެއްޖެ އެވެ.
ޑާންސް އިންޑިއާ ޑާންސް ކާމިޔާބު ކުރުމަށް ފަހު އުމުރުން 30 އަހަރުގެ ޝަކްތީ ވަނީ އަކްޝޭ ކުމާރުގެ "ތީސް މާރު ޚާން" ގެ އައިޓަމް ލަވައެއްގެ ކުޑަ ތަންކޮޅަކުން ފެނިގެން ގޮސްފައެވެ.
ޝަކްތީ، ޑާންސް އިންޑިއާ ޑާންސް ޝޯވ ކާމިޔާބު ކުރުމަށް ފަހު --
އެއަށްފަހު އަކްޝޭގެ "ރައުޑީ ރާތްހޯރު" ގެ އައިޓަމް ލަވައަކުން ވެސް ޝަކްތީ ވަނީ ފެނިގެން ގޮސްފައެވެ. އޭގެ ފަހުން ޝަކްތީ ވަނީ ޗެނަލް ވީ އިން ގެނެސްދިން ޑްރާމާ ސީރީސް، "ދިލް ދޯސްތީ ޑާންސް" ގައި ވެސް ލީޑު ރޯލު ކުޅެފައެވެ.
ޝަކްތީ ބޮލީވުޑަށް ތައާރަފުވުމަށް ހަމަޖެހިފައި ވަނީ، ކޮރެއޮގްރެޕާ އަދި ޑައިރެކްޓަރު ރޭމޯ ޑިސޫޒާގެ ކުރިއަށް އޮތް ފިލްމުންނެވެ. ރޭމޯ އަކީ ޑާންސް އިންޑިއާ ޑާންސްގެ ފަނޑިޔާރެކެވެ.
ޝަކްތީ (މ)، ރޭމޯ (ވ) އަދި ސަލްމާން (ކ) --
ޝަކްތީ އަންނަނީ ރޭމޯގެ ޑާންސް ރިއަލިޓީ ޝޯވ، "ޑާންސް ޕްލަސް" ގައި ޖަޖެއްގެ ގޮތުން ބައިވެރިވަމުންނެވެ.
ފިލްމާ ގުޅޭގޮތުން ވާހަކަ ދައްކަމުން ޝަކްތީ ބުނީ، ރޭމޯގެ ފިލްމަކުން ބޮލީވުޑަށް ތައާރަފުވުމުގެ ފުރުސަތު ލިބުމުން ބަޔާން ނުކުރެވޭ ވަރުގެ އުފަލެއް ލިބިފައިވާ ކަމަށެވެ.
ޝަކްތީ މޯހަން: އޭނާ ވަނީ ޑާންސް އިންޑިއާ ޑާންސް ކާމިޔާބު ކުރުމުގެ އިތުރުން ޑާންސް ޝޯވ ތަކާއި ޓީވީ ޑްރާމާ އަކުން ފެނިގެން ގޮސްފައި --
"ވަރަށް އުފާވެފައި މިހުރީ، ރޭމޯ އަކީ އަހަރެންގެ ޓީޗަރެއް. އަދި އެންމެ ކުޑަ އިރުންވެސް އަހަރެން އެންމެ ބޮޑަށް ޝައުގުވެރި ވަނީ ނެށުމަށް. އެހެންކަމުން ނެށުމުގެ ތެރެއިން ބޮލީވުޑަށް ތައާރަފު ވެވުމަކީ ހުވަފެނެއް ހަގީގަތަށް ވުން ކަހަލަ ކަމެއް،" ޝަކްތީ ބުނެފައިވެ އެވެ.
ރޭމޯގެ ފިލްމުން ޝަކްތީ އާއެކު ލީޑުން ފެނިގެން ދާނީ "ޑާންސް އިންޑިއާ ޑާންސް" ގެ ފުރަތަމަ ސީޒަން ކާމިޔާބު ކުރި އަދި ރޭމޯގެ ފުރަތަމަ ފިލްމު "އޭބީސީޑީ: އެނީބޮޑި ކޭން ޑާންސް" އިން ވެސް ފެނިގެން ދިޔަ ސަލްމާން ޔޫސުފް ޚާން އެވެ.
ސަލްމާން ޔޫސުފް ޚާން ---
އެއީ ލޯބީގެ ފިލްމެއް ކަމަށް ހަބަރުތައް ބުނެ އެވެ. އެއީ ޝަކްތީގެ ފުރަތަމަ ފިލްމަށް ވުމުގެ އިތުރުން، ރޭމޯ ޕްރޮޑިއުސް ކުރާ ފުރަތަމަ ފިލްމަށް ވެސް ވެގެންދާނެ އެވެ.