17 Jun 2016, 10:32
ރޯދަމަހަށް ހާއްސަކޮށްގެން ރާއްޖެ ގެންނަ ތަރުކާރީ އާއި މޭވާ ފަދަ ތަކެތި އަވަހަށް ކްލިއާ ކޮށްދެމުން އަންނަ ކަމަށް މޯލްޑިވްސް ޕޯޓް ލިމިޓެޑް (އެމްޕީއެލް) އިން ބުނެފިއެވެ.
އެމްޕީއެލްގެ ސީއީއޯ މުހައްމަދު ޖުނެއިދު ވިދާޅުވީ، މީގެ ކުރިން ތަރުކާރީފަދަ ތަކެތި ކްލިއާ ކޮށްދިނުމަށް ދެ ތިން ދުވަސް ނެގިނަމަވެސް މިހާރު އަށެއްކަ ގަޑިއިރު ތެރޭގައި އެހިދުމަތް ދެމުން އަންނަ ކަމަށެވެ.
"ޕެރިޝަބަލް ތަކެތި ނުވަތަ ތަރުކާރީ ގެނެވޭ މުދާ މިހާރު އަޅުގަނޑުމެން ޓީމުން ވަރަށް ބޮޑަށް އެއަށް ސަމާލުކަން ދީގެން، ކުރީގައި ތިން ދުވަސް ހަތަރު ދުވަސް ދާ ބޯޓް މިއަދު އަޅުގަނޑުމެންނަށް ގާތްގަނޑަކަށް އަށް ގަޑިއިރު ތެރޭ ހުސް ވެގެން އެދަނީ ޕެރިޝަބަލް އެއްޗެހި." ޖުނައިދު ވިދާޅުވި އެވެ.
އޭނާ ވިދާޅުވީ، އޭގެ ނަތީޖާއެއްގޮތުން މާލޭގެ ބާޒާރުގައި ތަރުކާރީގެ އަގު އެއްވަރެއްގައި ހިފެހެއްޓިފައިވާ ކަމަށެވެ.
މިފަހަރު ރޯދައާ ގުޅިގެން މާލޭ ބާޒާރަށް ރާއްޖެއިން ގެނެސްފައިވާ ދަނޑުވެރިކަމުގެ ބާވަތްތައް މަދުވުމުގެ ސަބަބުން ގިނަ އަދަދެއްގެ ތަރުކާރީއާއި މޭވާ ދަނީ ރާއްޖެއިން ބޭރުން އިމްޕޯޓް ކުރަމުންނެވެ.