21 Jun 2016, 15:22
ޓެރަރިޒަމާއި ހައްދުފަހަނަޅައި ދިޔުމާ ބެހޭ ގޮތުން ދައުލަތުގެ ސިޔާސަތު ހާމަކުރައްވައި ރައީސް އަބްދުﷲ ޔާމީން ރައްޔިތުންގެ މަޖިލީހަށް ހުށަހެޅުއްވި ކަރުދާސް 11 މެމްބަރުންގެ ކޮމިޓީއަކުން ދިރާސާ ކުރުމަށް ހުށަހެޅި ހުށަހެޅުން މަޖިލީހުން ފާސްވެއްޖެ އެވެ.
އެގާރަ މެމްބަރުންގެ ކޮމިޓީއަކުން އެ ކަރުދާސް ދިރާސާ ކުރެއްވުމަށް ހުށަހެޅުއްވީ ޕީޕީއެމްގެ ވިލުފުށީ ދާއިރާގެ މެމްބަރު ރިޔާޒް ރަޝީދެވެ. އެ ހުށަހެޅުން ބަލައިގަންނަށް ފާސްވީ 38 މެމްބަރުންގެ ވޯޓުންނެވެ. ދެކޮޅަށް ވޯޓު ދެއްވީ އެންމެ މެމްބަރެކެވެ.
ރައްޔިތުންގެ މަޖިލީހުގައި ތަމްސީލު ކުރައްވާ ހުރިހާ ޕާޓީތަކެއް ހިމެނޭ ގޮތުން އެ ކޮމިޓީގެ މެމްބަރުންގެ ނަންތައް ހުށަހެޅުއްވީ މެޖޯރިޓީ ލީޑަރު އަދި ވިލިމާފަންނު ދާއިރާގެ މެމްބަރު އަހްމަދު ނިހާން ހުސައިން މަނިކެވެ. ނިހާން ހުށަހެޅުއްވި މެމްބަރުންނަކީ:
ހިތަދޫ މެދު ދާއިރާގެ މެމްބަރު އިބްރާހިމް މުހައްމަދު ދީދީ (އެމްޑީޕީ)
ކުޅުދުއްފުށި އުތުރު ދާއިރާގެ މެމްބަރު އަބްދުލްޣަފޫރު މޫސާ (އެމްޑީޕީ)
ވިލިމާލެ ދާއިރާގެ މެމްބަރު އަހުމަދު ނިހާން ހުސައިން މަނިކު (ޕީޕީއެމް)
ވިލުފުށީ ދާއިރާގެ މެމްބަރު ރިޔާޒް ރަޝީދު (ޕީޕީއެމް)
ގެމަނަފުށީ ދާއިރާގެ މެމްބަރު ޖަމީލް އުސްމާން (ޕީޕީއެމް)
ކެލާ ދާއިރާގެ މެމްބަރުން އަލީ އާރިފް (ޕީޕީއެމް)
ފޭދޫ ދާއިރާގެ މެމްބަރު އިބްރާހިމް ދީދީ (ޕީޕީއެމް)
އުނގޫފާރު ދާއިރާގެ މެމްބަރު ޖައުފަރު ދާއޫދު (ޕީޕީއެމް)
ކުޑަހުވަދޫ ދާއިރާގެ މެމްބަރު އަހްމަދު އާމިރު (އެމްޑީއޭ)
ދަނގެތި ދާއިރާގެ މެމްބަރު އިލްހާމް އަހުމަދު (ޖޭޕީ)
މަކުނުދޫ ދާއިރާގެ މެމްބަރު އަނާރާ ނައީމް (އަދާލަތު)
ނިހާނު ހުށަހެޅުއްވި 11 މެމްބަރުންގެ ކޮމިޓީއަށް މެމްބަރު ޖަމީލް އުސްމާން ވަނީ ތާއީދު ކުރައްވައިފަ އެވެ. އެ ކޮމިޓީ އިން ޓެރަރިޒަމް ސިޔާސަތު ދިރާސާ ކުރުމަށް މަޖިލީހުން ފާސްވީ 39 މެމްބަރުންގެ އަޣުލަބިއްޔަތުންނެވެ. ނުފެންނަ ކަމަށް އެއްވެސް މެމްބަރަކު ވޯޓު ދެއްވާފައި ނުވާ އިރު ވަކި ގޮތަކަށް ނުފެންނަ ކަމަށް އަށް މެމްބަރަކު ވޯޓު ދެއްވި އެވެ.
ޓެރަރިޒަމާއި ހައްދުފަހަނަޅައިދިޔުމުގެ މައްސަލަތަކުގައި، ރާއްޖޭގެ ސިޔާސަތަކީ، ޓެރަރިޒަމްގެ އަމަލުތަކާއި ހައްދުފަހަނަޅައިދިޔުމުގެ އަމަލުތަކާ ދެކޮޅަށް އެއްވެސް ދުލެއް ދިނުމެއްނެތި އެފަދަ އަމަލުތައް ހުއްޓުވުމަށް މަސައްކަތްކުރުން ކަމަށް ރައީސް ވަނީ ވިދާޅުވެފަ އެވެ.
ރައީސް މަޖިލީހަށް ފޮނުއްވި ސިޔާސަތުގައި ޓެރަރިޒަމާއި ހައްދުފަހަނަޅައިދިޔުމުގެ ހަރަކާތްތައް ހުއްޓުވުމަށް މުހިންމު ފިޔަވަޅުތަކެއް އެޅުމަށް ވަނީ ނިންމައިފަ އެވެ. އެގޮތުން ޓެރަރިޒަމާއި ހައްދުފަހަނަޅައިދިޔުމުގެ އަމަލުތައް ހިންގާ ފަރާތްތަކަށް ފިޔަވަޅުތައް އެޅުމުގެ ގާނޫނީ އޮނިގަނޑު ހަރުދަނާކުރުމާއި، އދ.ގެ އާމްސް ޓްރޭޑް ޓުރީޓީ ފަދަ ޓެރަރިޒަމްގެ އަމަލުތައް ހުއްޓުވުމާ ގުޅިފައިވާ މުއާހަދާތަކުގައި ރާއްޖެ ބައިވެރިވެ، ބޭރު ގައުމުތަކާ ގުޅިގެން އިންޓެލިޖެންސް ހިއްސާކުރާނެ ގޮތާއި ވަގުތު އޮއްވައި ފިޔަވަޅު އެޅުމުގެ އިންތިޒާމްތައް ވަރުގަދަ ކުރުން ހިމެނެ އެވެ.
އެ ސިޔާސަތަށް ކުރިއަށް ދިޔަ ބަހުސްގައި ސަރުކާރާ އިދިކޮޅު މެމްބަރުން ވެސް ވަނީ ޓެރަރިޒަމް ނައްތާލުމަށް ގުޅިގެން މަސައްކަތް ކުރުމަށް ތައްޔާރަށް ތިބިކަަމަށް ބުނެފަ އެވެ.