23 Jun 2016, 10:58
ޔުނައިޓެޑް އެރަބް އެމިރޭޓްސް (އޭޕީ) – ދުނިޔޭގެ އެކި ކަންކޮޅުތަކުގައި ތިބި ރެފިއުޖީ ކުދިންނަށް ފޮތް ގަންނާނެ ފައިސާ ހޯދައި ދިނުމަށް ޓަކައި ކަޢުބަތުﷲ ގެފުޅުގެ، 100 އަހަރަށް ވުރެ ގިނަ ދުވަސްވީ އުރަކޮޅެއް ނީލަމުގައި ވިއްކާލައިފި އެވެ.
ރީޑިން ނޭޝަން ރަމަޟާން ކެމްޕެއިންގެ ނަމުގައި އެކުވެރި އަރަބި އިމާރާތުގެ މަދީނާތު ޖުމެއިރާގައި ބޭއްވި އެ ނީލަން ކިޔުމުގައި ޖުމްލަ 11 މިލިއަން ޑޮލަރު ވަނީ ލިބިފަ އެވެ.
ނީލަމުގައި ވިއްކާލި ރަނާއި ރިހިން ވިޔެފައިވާ 106 އަހަރު ވެފައިވާ ގެފުޅުގެ އުރަކޮޅު ވިކިފައި ވަނީ 572،000 ޑޮލަރަށެވެ. އެ އުރަކޮޅު ގަނެފައި ވަނީ އެގައުމުގެ ވިޔަފާރިވެރިއެކެވެ. އުރަކޮޅު ގަތް ވިޔަފާރިވެރިޔާ ބުނީ، އުރަކޮޅަކީ އޭނާގެ ހުރިހާ ކާމިޔާބީއެއްގެ ފަހަތުގައި ހުރި އޭނާގެ މަންމައަށްދޭ ހަދިޔާއެއް ކަމަށެވެ.
އެ އުރަކޮޅަކީ ދުބާއީގެ ނައިބް ރައީސް ޝެއިހް މުހައްމަދު ބިން ރާޝިދު އަލް މަކްތޫމުގެ އަމިއްލަ ކެލްޝަނުން ނީލަމަށް ހަދިޔާކުރި އެއްޗެކެވެ.
ރީޑިން ނޭޝަން ރަމަޟާން ކެމްޕެއިންގެ ނަމުގައި އެކުވެރި އަރަބި އިމާރާތުގެ މަދީނާތު ޖުމެއިރާގައި ބޭއްވި ނީލަން ކިޔުމުގައި މީހަކު އެއްޗަކަށް ބިޑް ކުރަނީ: އެ ކެމްޕެއިންގައި ޖުމްލަ 11 މިލިއަން ޑޮލަރު ވަނީ ލިބިފައި --
ނީލަމުގައި އުރަކޮޅާ އެކު 19 ވަނަ ގަރުނުގެ އާސާރީ މުސްހަފަކާއި 17 ވަނަ ގަރުނު އަތުން ލިޔެފައިވަ މުސްހަފެއް ވަނީ ކޮންމެ ފޮތެއް 68،000 ޑޮލަރަށް ވިއްކާލައިފަ އެވެ. މީގެ އިތުރުން ދުބާއީގައި އަގު ބޮޑުކޮށް ވިއްކާލެވޭ ދެ ނަންބަރު ހިމެނޭ ކާރު ނަންބަރު ޕުލޭޓުގެ ފަސް ނަންބަރު ޕުލޭޓެއް ހަތް މިލިއަން ޑޮލަރަށް ވިކިފައިވާ އިރު ރީތި 10 ފޯން ނަންބަރު ވެސް ވަނީ ވިކިފަ އެވެ.
ނީލަމުގައި އެންމެ އަގު ބޮޑުކޮށް ވިއްކާލެވުނީ ވެސް ދެ ނަންބަރުގެ ކާރު ނަންބަރު ޕުލޭޓެކެވެ.
ރޯދަ މަހާ ދިމާކޮށް ދުބާއީގައީ ބޭއްވި އެ ކެމްޕެއިނަކީ އަރަބި ގައުމުތަކާއި ރެފިއުޖީ ކޭމްޕުތަކަށް 7.3 މިލިއަން ފޮތާއި 2000 ސްކޫލް ލައިބްރަރީ ގާއިމްކުރުމަށް ފެށި ޗެރިޓީ އެކެވެ.