13 Jul 2016, 08:45
ރާއްޖޭގައި ބާއްވާ ފުރަތަމަ ފިލްމު ފެސްޓިވަލް ސަރަހައްދީ ފެންވަރުގެ ފިލްމު ފެސްޓިވަލަކަށް ހެދުމުގެ ވިސްނުން އެބަހުރި ކަމަށް ފެސްޓިވަލް އިންތިޒާމްކުރާ ރާއްޖޭގެ މަޝްހޫރު ރިސޯޓެއް ކަމަށްވާ، ސަން ސިޔާމް އިރުފުށިން ބުނެފި އެވެ.
ފެސްޓިވަލާ ގުޅިގެން "ސަން" އަށް ދެއްވި ހާއްސަ އިންޓަވިއުއެއްގައި ސަން ސިޔާމް އިރުފުށީގެ ސޭލްސް އެންޑް މާކެޓިން ޑިރެކްޓަރު އެވްގީނިއާ ބޮޔަންކޮވާ ވިދާޅުވީ، މިއީ ރާއްޖޭގައި ފިލްމު ފެސްޓިވަލެއް ބޭއްވި ފުރަތަމަ ފަހަރު ނަމަވެސް ލިބެމުންދާ ތަރުހީބު ރަނގަޅު ކަމަށެވެ.
އެގޮތުން، ރާއްޖޭގައި ބާއްވާ ފިލްމު ފެސްޓިވަލް މޮނީޓަރު ކުރުމަށް ފެސްޓިވަލަށް ދައުވަތު ދީގެން އައިސްފައިވާ އިންޓަނޭޝަނަލް ކޮމިޓީ އޮފް ޓުއަރިޒަމް ފިލްމު ފެސްޓިވަލް (ސިފްޓު)ގެ މެމްބަރުން ވެސް ރާއްޖޭގައި މިފަދަ ފެސްޓިވަލެއް ފެށުމަކީ ރަނގަޅު ކަމެއް ކަމަށާއި ފެސްޓިވަލުގައި ރޭވުންތެރިކަން ހުރިކަން ފާހަގަކޮށްފައިވާ ކަމަށް އޭނާ ބުންޏެވެ.
މީގެ އިތުރުން އިންޑިއާ ކަނޑުގެ އެހެން ގައުމުތަކާ އެކުވެ ގުޅިގެން ރާއްޖޭގެ މި ފެސްޓިވަލް ބޭއްވުމަށް އެ ޖަމިއްޔާއިން ލަފާ ދީފައިވާ ކަމަށް ވެސް ބޮޔަންކޮވާ ވިދާޅުވި އެވެ.
"އިންޑިއާ ކަނޑުގެ ފިލްމު ފެސްޓިވަލެއް ބޭއްވުމަށް އިސްނަގައިގެން މަސައްކަތްކޮށް، އެކަމުގެ ލީޑަރަކަށް ވެވިދާނެ ކަމުގެ ހިޔާލެއް އެ ކޮމެޓީން ވަނީ ދީފައި. އެއީ ބޭނުންވާ ކަމެއް. ވަރަށް ބަދަހި ގުޅުންތަކެއް އޮވޭ ސްރީ ލަންކާ އަދި ސަން ސިޔާމް ގްރޫޕް ބައިވެރިވާ ވެނީލާ އައިލެންޑް އޯގަނައިޒޭޝަން ގައި ހިމެނޭ މޮރިޝަސް އަދި ސީޝެލްސްއާ. އެހެންވީމަ މީވާނެ ކަމެއް. ރާއްޖެ އިސްނަގައިގެން ސަރަހައްދީ ފިލްމު ފެސްޓިވަލެއް ބޭއްވުމަކީ ދިން ރަނގަޅު ހިޔާލެއް. މުސްތަގްބަލެއް ރަނގަޅު ކަމެއް،" ބޮޔަންކޮވާ ވިދާޅުވި އެވެ.
ސަން ސިޔާމް އިރުފުށީގެ ސޭލްސް އެންޑް މާކެޓިން ޑިރެކްޓަރު އެވްގީނިއާ ބޮޔަކޮންވާ "ސަން އަށް އިންޓަވިއު ދެއްވަނީ: އޭނާ ވިދާޅުވީ ރާއްޖޭގެ ފިލްމު ފެސްޓިވަލް އިންޑިއާ ކަނޑުގެ ގައުމުތަކުގެ ފިލްމު ފެސްޓިވަލަކަށް ހެދުމުގެ ވިސްނުން އެބަހުރި ކަމަށް --- ސަން ފޮޓޯ/ ނާއިލް
"ފޮލޯ ދަ އީކުއޭޓާ"ގެ ނަމުގައި ރާއްޖެއާ ރާއްޖޭގެ ފަތުރުވެރިކަން ދުނިޔެއަށް އިސްތިހާރު ކުރުމުގެ މަގްސަދުގައި ބާއްވާ އެ ފެސްޓިވަލް ފަށާފައި ވަނީ މީގެ ދެ ދުވަސް ކުރިން ސަން ސިޔާމް އިރުފުށީގަ އެވެ. އަދި އެ ފެސްޓިވަލް ކޮންމެ އަހަރަކު ބާއްވަން ވަނީ ނިންމައިފަ އެވެ.
ފެސްޓިވަލް އިންތިޒާމުކުރުމުގައި އެންމެ އިސްކޮށް އުޅުނު ބޮޔަންކޮވާ ވިދާޅުވީ، ފެސްޓިވަލަށް ދައުވަތު ދީގެން އައި ދުނިޔޭގެ މަޝްހޫރު ތަރިންނާއި މީޑިއާތަކުން ވެސް ރާއްޖޭގައި މިފަދަ ފެސްޓިވަލެއް ބޭއްވާތީ ޝައުގުވެރިކަން ފާޅުކޮށް، އެއީ އެމީހުން ދިޔަ ފެސްޓިވަލްތަކުގެ ތެރެއިން އެންމެ ފުރިހަމަ ފެސްޓިވަލް ކަމަށް ބުނެފައިވާ ކަމަށް އޭނާ ބުންޏެވެ.
އެއް އަހަރުން އަނެއް އަހަރަށް ފެސްޓިވަލްގެ ފެންވަރު މަތި ކުރުމަކީ އެ ރިސޯޓުގެ އަމާޒެއް ކަން ފާހަގަކޮށް އޭނާ ވިދާޅުވީ، އަންނަ އަހަރު ބާއްވާ ފެސްޓިވަލް ސަން ސިޔާމް އިރުފުށި ނޫން ތަނެއްގައި ބޭއްވުމަށާއި ފެސްޓިވަލްގެ ޕެނަލްތަކާއި ފޯރަމްތައް މާލޭގައި ބޭއްވުމަށް ވިސްނާ ކަމަށެވެ.
"އަންނަ އަހަރުގެ ފެސްޓިވަލްގައި ގިނަ ގައުމުތަކުން ބައިވެރިވެ، ގިނަ ގައުމުތަކުގެ މެހެމާނުން ރާއްޖެ އައުމަކީ އެދޭ ކަމެއް. އަދި ރާއްޖެއިން ގިނަ ކުރު ފިލްމުތަކެއް ބައިވެރިކޮށް ފެސްޓިވަލްގެ ޕާޓަރު ފިލްމު ފެސްޓިވަލްތަކުގައި އެ ވީޑިއޯތައް ބައިވެރިކޮށް ރާއްޖެ ޕްރޮމޯޓްކޮށް ރާއްޖެއަށް ބައިނަލްއަގްވާމީ އެވޯޑްތަކެއް ލިބުމަކީ ވެސް އުއްމީދެއް،" ބޮޔަންކޮވާ ވިދާޅުވި އެވެ.
މިއަހަރުގެ ފެސްޓިވަލަށް ވެސް ދުނިޔޭގެ އެކިކަންކޮޅުތަކުން ވަނީ ބޮޑު ތަރުހީބެއް ލިބިފަ އެވެ. އެގޮތުން ދުނިޔޭގެ 20 ގައުމަކުން 200 އަށް ވުރެ ގިނަ ކުރު ވީޑިއޯ ވަނީ ފެސްޓިވަލަށް ހުށަހަޅައިފަ އެވެ. އެ ވީޑިއޯތަކުގެ ތެރެއިން 46 ވީޑިއޯ އެއް ނޮމިނޭޓްކޮށް އެންމެ މޮޅު 10 ކެޓަގަރީ އަކުން ވަނަތައްދޭނެ އެވެ.
ސަން އޮންލައިން މީޑިއާ ޕާޓްރަނަރަކަށް ހަމަޖައްސާފައިވާ އެ ފެސްޓިވަލްގެ އިނާމު ދިނުމުގެ ރަސްމިއްޔާތު އޮންނާނީ މިރެ އެވެ.