14 Jul 2016, 14:05
ލަންޑަން(ޖުލައި 14): އިނގިރޭސި އައު ބޮޑުވަޒީރު ތެރީސާ މޭ އެކަމަނާގެ ކެބިނެޓްގެ ބައެއް މަގާމުތަކަށް ހަމަޖެއްސެވި ބޭފުޅުންގެ ނަންތައް އިޢުލާން ކުރައްވައިފި އެވެ.
ތެރީސާގެ ކެނިބެޓްގައި ޚާރިޖީ ވަޒީރުކަން ދެއްވާފައިވަނީ ބޮރިސް ޖޯންސަން އަށެވެ. ޚާރިޖީ ވަޒީރުކަމުގައި ކުރިން ހުންނެވި ފިލިޕް ހާމޮންޑް އައްޔަންކުރެއްވީ ފިނޭންސް މިނިސްޓަރު (ޗާންސެލަރ އޮފް ދި އެކްސްޗެކަރ) ކަމުގެ މަގާމަށެވެ. ދިފާއީ ވަޒީރު ކަމަށް އައްޔަން ކުރެއްވީ ކުރިންވެސް އެމަގާމުގައި ހުންނެވި މައިކަލް ފެލޮން އެވެ. ޑޭވިޑް ކެމެރަންގެ ސަރުކާރުގައި ފިނޭންސް މިނިސްޓަރު ކަމުގައި ހުންނެވި ޖޯޖް އޮޒްބޯން އަށް ވަނީ ކެބިނެޓްގެ މަގާމު ގެއްލިވަޑައިގެންފައެވެ.
ބޮޑުވަޒީރު ތެރީސާ މޭ
ތެރީސާ މޭ ގެ ސަރުކާރުގައި ހޯމްސެކްރެޓަރީ (ދާޚިލީ ވަޒީރު) ކަމަށް އައްޔަން ކުރެއްވީ އަންހެން ބޭފުޅެއް ކަމަށްވާ އަމްބާ ރުޑް އެވެ. ޓްރޭޑް މިނިސްޓަރުކަމަށް ލިޔަން ފޮކްސް އެވެ. ޔޫރަޕްގެ އިއްތިޙާދުން ބޭރުވުމުގެ ކަންތައްތައް ކުރިޔަށް ގެންދަވާ މިނިސްޓަރަކަށް ޑޭވިޑް ޑޭވިސް އެވެ.
ތިރީގައި މިވަނީ އިނގިރޭސިވިލާތުގެ ޚާރިޖީ ވަޒީރުކަމުގެ މަގާމަށް އައު ބޮޑުވަޒީރާ ތެރީސާ މޭ އައްޔަންކުރެއްވި ބޮރިސް ޖޯންސަން އާ ބެހޭ ކުރުތައާރަފެކެވެ.
އުފަންވެ ވަޑައިގަތުން
ބޮރިސް ޖޯންސަން އަކީ ތުރުކީ ދަރިކޮޅަށް ނިސްބަތްވާ އިނގިރޭސި ރައްޔިތެކެވެ. އުމުރުން 51 އަހަރުގެ ބޮރިސްޖޯންސަން އުފަންވެ ވަޑައިގަތީ 1964 ވަނައަހަރު އެމެރިކާގެ ނިޔުޔޯކް ގައެވެ. އެމެރިކާގައި އުފަންވުމުގެ ސަބަބުން އިނގިރޭސި ޕާސްޕޯޓްގެ އިތުރުން އެމެރިކާގެ ޕާސްޕޯޓްވެސް ޖޯންސަން އަށް ލިބިވަޑައިގެންފައިވެއެވެ. ޖޯންސަންގެ ކާފައަކީ ތުރުކީގެ މުސްލިމެއްކަމަށްވާ އަލީ ކަމާލް ބެކް އެވެ.
ތައުލީމް
ބޮރިސް ޖޯންސަން އެންމެ ކުޑައިރު ތައުލީމް ޙާސިލް ކުރެއްވީ އިނގިރޭސިވިލާތުގެ ޕްރީމްރޯޒް ހިލް ސްކޫލްގައެވެ. އެއަށްފަހު ސާނަވީ ތައުލީމާއި މަތީ ސާނަވީ ތައުލީމު ޙާސިލް ކުރެއްވީ ބްރަސަލްސްގައި ހުންނަ ޔޫރަޕިޔަން ސްކޫލްގައެވެ. އެއަށްފަހު ޑިގްރީ ހާސިލް ކުރެއްވީ އީޓަން ފެކަލްޓީގައެވެ. ޕޯސްޓް ގްރޭޖްއޭޓް ތައުލީމް ނިންމެވީ އޮކްސްފޯޑް ޔުނިވަރސިޓީގެ ބެލިއޮލް ކޮލެޖުންނެވެ.
އަދާކުރެއްވި ވަޒީފާތައް
ބޮރިސް ޖޯންސަން އެންމެފުރަތަމަ ވަޒީފާ އަދާކުރެއްވީ ލަންޑަންގައި ނުކުންނަ ޓައިމްސް ނޫހުގައެވެ. އެއަށްފަހު ޑެއިލީ ޓެލެގްރާފް ނޫހުގައެވެ. ޑެއިލީ ޓެލެގްރާފްގައި މަސައްކަތް ކުރައްވަމުން އެނޫހުގެ ޑެޕިއުޓީ އެޑިޓަރުކަންވެސް ކުރެއްވިއެވެ. އެއަށްފަހު ލަންޑަންގައި ނުކުންނަ ސްޕެކްޓޭޓަރ މަޖައްލާގެ އެޑިޓަރެއްގެ ގޮތުގައި 1999 ން 2005 އާ ހަމައަށް މަސައްކަތް ކުރެއްވިއެވެ. އަދި 2008 ގައި ލަންޑަންގެ މޭޔަރު ކަމުގެ މަގާމަށް ބޮރިސް ޖޯންސަން އިންތިޚާބުވެވަޑައިގެންނެވިއެވެ.
ދާޚިލީ ވަޒީރާ އަންބާ ރުޑް
އެއަށްފަހު މޭޔަރު ކަމުގެ ދެވަނަ ދައުރެއްވެސް އޭނާ އަދާކުރެއްވިއެވެ. އަދި 2015 ވަނަ އަހަރުގެ މޭމަހު ގެ 7 ވަނަ ދުވަހު، ކޮންޒަވެޓިވް ޕާޓީގެ ފަރާތުން ހައުސް އޮފް ކޮމަންސްގެ މެންބަރަކަށް އިންތިޚާބުވެ ވަޑައިގެންނެވިއެވެ. އޭގެކުރިން 2001 ވަނަ އަހަރުވެސް އިނގިރޭސި ޕާލަމެންޓުގެ މެންބަރަކަށް އޭނާ އިންތިޚާބުވެވަޑައިގެންފައިވެއެވެ.
ސިޔާސީ ތަޖްރިބާ
ބޮރިސް ޖޯންސަން އަކީ ސިޔާސީ ތަޖްރިބާ އެހާ ބޮޑު ބޭފުޅެއްނޫނެވެ. އިނގިރޭސި ސަރުކާރުތަކުގައި މަތީ ފެންވަރުގެ މަގާމްތަކެއް އޭނާ އަދާކުރައްވާފައެއް ނުވެއެވެ. ލަންޑަންގެ މޭޔަރުކަމުގެ މަގާމުގެ އިތުރުން އޭނާ އަދާކުރެއްވީ ކޮންޒަވެޓިވް ޕާޓީގެ ހިޔަނި ކެބިނެޓްގެ މަގާމުތަކެވެ. މިއީ އިނގިރޭސިވިލާތުގައި ވެރިކަންކުރާ ބަރުލަމާނީ ވެސްޓް މިނިސްޓަރ ނިޒާމުގައި ގެންގުޅޭ ޚިޔާލީ މަގާމުތަކެކެވެ. ކޮންޒަވެޓިވް ޕާޓީ އިދިކޮޅު ޕާޓީއެއްގެ ގޮތުގައި އޮތްދުވަސްވަރު އެޕާޓީގެ ހިޔަނި ކެބިނެޓްގެ ވަޒީރުކަމުގެ ބައެއް މަގާމުތައް ބޮރިސް ޖޯންސަން އަދާކުރެއްވިއެވެ. މީގެތެރޭގައި ތައުލީމާބެހޭ ހިޔަނި ވަޒީރުކަންވެސް ހިމެނެއެވެ.
މަޝްހުރުވެގެން ދިޔުން
ބޮރިސް ޖޯންސަން އިނގިރޭސިވިލާތުގައި މަޝްހޫރުވެގެން ދިޔައީ 2012 ވަނައަހަރު ލަންޑަންގައި ބޭއްވި އޮލިމްޕިކްސް ކުޅިވަރުތައް އިންތިޒާމް ކުރުމުގައި އޭނާގެ ހިންގުންތެރިކަން ފެނިގެން ދިޔުމުންނެވެ. އޭރު އޭނާ ހުންނެވީ ދެވަނަ ދައުރަކަށް ލަންޑަންގެ މޭޔަރުކަމުގެ މަގާމުގައެވެ. ލަންޑަން އޮލިމްޕިކްސް ކުޅިވަރުތަކަށްފަހު އިނގިރޭސި ކޮންޒަވެޓިވް ޕާޓީގެ ތެރޭގައި ބޮރިސް ޖޯންސަންގެ ތަރިވަނީ ވިދާލާފައެވެ.
އީޔޫން ވަކިވުމާބެހޭ ވަޒީރު ޑޭވިޑް ޑޭވިސް
އެހިސާބުން އޭނާގެ ހިންގުންތެރިކަމާއި ލީޑަރޝިޕް ފެނި ޑޭވިޑް ކެމެރޮންގެ ސަކްސެސަރ އަކަށް (ކެމެރޮންއަށްފަހު ކޮންޒަވެޓިވް ޕާޓީގެ ފަރާތުން ބޮޑުވަޒީރުކަމަށް ހަމަޖައްސާ ބޭފުޅަކަށް) ވުމަށް އެންމެ ރަނގަނޅު އަދި ކަމުދާ ބޭފުޅެއްގެ ގޮތުގައި ޖޯންސަންގެ ނަން ފާހަގަ ވެގެން ގޮސްފައިވެއެވެ. ނަމަވެސް ޖޯންސަން އަކީ އިނގިރޭސިވިލާތުގެ ކޮންންޒަވެޓިވް ލީޑަރުންގެ ތެރެއިންވެސް މުސްލިމުންނާ އިދިކޮޅު ބޭފުޅެއްކަމަށް ބައެއް ފަރާތްތަކުން ތުހުމަތުކޮށްފައިވެއެވެ.
މިގޮތަށް ތުހުމަތުކުރީ 2005 ވަނަ އަހަރުގެ ޖުލައިމަހުގެ ތެރޭގައި ޓެރަރިސްޓުންގެ ބަޔަކު ލަންޑަނަށް ދިން ޓެރަރިސްޓް ހަމަލާތަކާ އެކު އެކަމުގެ ބަދުނާމު އިސްލާމް ދީނާއި މުސްލިމުންނަށް ކުރިމަތިވާގޮތަށް 2005 ވަނަ އަހަރުގެ ޖުލައި 16 ވަނަ ދުވަހު ސްޕެކްޓޭޓަރ މަޖައްލާގައި ޖޯންސަން މަޒްމޫނެއް ލިޔުއްވުމާ ގުޅިގެންނެވެ.
އީޔޫން ނުކުތުމަށް ބާރުއެޅުން
ބޮރިސް ޖޯންސަންއަކީ އިނގިރޭސިވިލާތް ޔޫރަޕްގެ އިއްތިޙާދުން ބޭރުވުމަށް ވަރަށް ބޮޑަށް ވަކާލާތު ކުރެއްވި ބޭފުޅެކެވެ. މިކަމަށް ތާއީދުކޮށް އެންމެ ފާޅުކަން ބޮޑުގޮތެއްގައި ޖޯންސަން ވާހަކަ ދެއްކެވީ މިއަހަރުގެ ފެބްރުއަރީ މަހުގެ ތެރޭގައެވެ. އިނގިރޭސިވިލާތް ޔޫރަޕްގެ އިއްތިޙާދުން ބޭރުވުމަށް ޖޯންސަން ވަކާލާތު ކުރެއްވުން ވެގެންދިޔައީ އިނގިރޭސި ކުރީގެ ބޮޑުވަޒީރު ޑޭވިޑް ކެމެރޮން އަށް ކުރިމަތިވެ ވަޑައިގެންނެވި ވަރަށް ބޮޑު މައްސަލައަކަށެވެ.
ދިފާއީ ވަޒީރު މައިކަލް ފެލޮން
އިނގިރޭސިވިލާތް ޔޫރަޕްގެ އިއްތިޙާދުން ބޭރުވުމަށް ތާއީދުކޮށް ކޮންޒަވެޓިވް ޕާޓީގެ ފަރާތުން ކުރި ކޭންޕޭން ލީޑް ކުރެއްވީ ބޮރިސް ޖޯންސަންއެވެ. އޭނާއަކީ އިނގިރޭސިވިލާތް ޔޫރަޕްގެ އިއްތިޙާދުން ބޭރުވުމަށް ކޮންޒަވެޓިވް ޕާޓީގެ އެތެރެއިން ތާއީދުކުރާ ކޭންޕް ލީޑް ކުރެއްވި ފަރާތްވެސް މެއެވެ. މިމައްސަލާގައި ނެގި ފެންނަ ނުފެންނަ ވޯޓު، އިނގިރޭސިވިލާތް ޔޫރަޕްގެ އިއްތިޙާދުން ބޭރުވުމަށް ތާއީދުކުރާ ފަރާތްތަކަށް ކާމިޔާބުވުމާއެކު ބޮޑުވަޒީރުކަމުގެ މަގާމުން އިސްތިއުފާ ދެއްވުމަށް ޑޭވިޑް ކެމެރޮން ނިންމެވުމުން އޭނާއަށްފަހު ކޮންޒަވެޓިވް ޕާޓީގެ ފަރާތުން ބޮޑުވަޒީރުކަމަށް ހަމަޖައްސާނެ ކަމަށް ގިނަ ބަޔަކަށް ލަފާކުރެވުނު ބޭފުޅަކީ ބޮރިސް ޖޯންސަން އެވެ.
ނަމަވެސް އިނގިރޭސިވިލާތް ޔޫރަޕްގެ އިއްތިޙާދުން ބޭރުވުމަށް ތާއީދުކުރައްވައި އެކަމަށް ބާރުއަޅުއްވައި ކޭންޕޭން ކުރެއްވި ބޭފުޅަކު އިނގިރޭސި ބޮޑުވަޒީރު ކަމަށް ހަމަޖެއްސުމަކީ ޔޫރަޕްގެ އެހެން ގައުމުތައް ރުޅި އަންނާނެ ކަމެއްކަމުން އެމަގާމަށް ޖޯނަސަން ހަމަޖައްސަން ކޮންޒަވެޓިވް ޕާޓީގެ އިސްބޭފުޅުންނަށް ފެނިވަޑައިނުގަތީއެވެ. (ނޫސްއެޖެންސީތައް)