19 Jul 2016, 12:55
ކުންފުނިތައް ރަޖިސްޓްރީ ކުރުމުގެ ކަންކަން އައުޓްސޯސް ކުރުމަށް ނިންމާފައިވާ ކަމަށް އިކޮނޮމިކް މިނިސްޓްރީން ބުނެފި އެވެ.
އިކޮނޮމިކް މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި ރަޖިސްޓްރާ އޮފް ކޮމްޕެނީޒް މަރިޔަމް ވިސާމް ވިދާޅުވީ 23000 އެއްހާ ވިޔަފާރި އެމިނިސްޓްރީގައި ރަޖިސްޓްރީކޮށްފައިވާއިރު އެފަރާތްތަކަށް ދޭންޖެހޭ ރަޖިސްޓްރީގެ ބައެއް ހިދުމަތްތަކާއި ވިޔަފާރިތައް ރަޖިސްޓްރީ ކުރުމުގެ ބައެއް ހިދުމަތްތައް އައުޓް ސޯސް ކުރުމަށް މިހާރު ނިންމާފައިވާ ކަމަށެވެ.
އައުޓް ސޯސް ކޮށްގެން ދޭން ނިންމާފައިވާ ހިދުމަތްތަކުގެ ތެރޭގައި އެކިއެކި ވިޔަފާރިތައް ރަޖިސްޓްރީ ކުރުމާއި ލޯގޯ ނުވަތަ ސީލް ރަޖިސްޓްރީ ކުރުމާއި ވިޔަފާރިތައް އުވާލުން ފަދަ ހިދުމަތްތައް ހިމެނެއެވެ.
ވިސާމް ބުނީ އައުޓް ސޯސްކުރުމުގެ ހިދުމަތް ދޭ ފަރާތްތަކުގެ ގޮތުގައި ލޯ ފާމް ތަކާއި އޮޑިޓް ފާމްތަކުގެ އިތުރުން ބިޒުނަސް ކޮންސަލްޓަންޓް ކުންފުނިތަކަށް ފުރުސަތު ހުޅުވާލާފައިވާ ކަމަށެވެ.
އައުޓު ސޯސްކުރާ ކުންފުނިތައް މެދުވެރިނުކޮށް އަމިއްލައަށް ވެސް އިކޮނޮމިކް މިނިސްޓްރީއަށް އެކަން ހުށައެޅުމުގެ ފުރުސަތު އޮންނާނެ ކަމަށާއި ނަމަވެސް އައުޓު ސޯސްކޮށްފައިވާ ފަރާތްތައް މެދުވެރިކޮށް ހުށައަޅާ ފަރާތްތަކުގެ ހިދުމަތް އަވަސްވެގެންދާނެ ކަމަށެވެ.
ސަބަބެއް ކަމަށް ވިސާމް ވިދާޅުވީ އައުޓު ސޯސްކޮށްފައިވާ ކުންފުނިތައް މެދުވެރިކޮށް ހުށަހަޅާ އެޕްލިކޭޝަން ސިސްޓަމެއް މެދުވެރިކޮށް އިކޮނޮމިކް މިނިސްޓްރީއަށް ލިބިގެންދާއިރު އެމިނިސްޓްރީން ކުރަންޖެހޭ މަސައްކަތް ލުއިވުމެވެ.
އަންނަ މަސް ނިމުމުގެ ކުރިން އެ ހިދުމަތް ދިނުމަށް މަސައްކަތްކުރާއިރު އަންނަމަހުގެ ހަަތަރު ވަނަ ދުވަހު އެކަމަށް އެދި ހުށައެޅުމުގެ ފުރުސަތު އޮންނާނެ ކަމަށް ވިސާމް ވިދާޅުވިއެވެ.