28 Jul 2016, 15:07
އެމެރިކާ އަދި ޔޫރަޕްގެ އިންޓަނޭޝަނަލް ޗެމްޕިއަންސް ކަޕްގައި ޗެލްސީ ކުޅުނު ފުރަތަމަ މެޗުގައި ލިވަޕޫލް އަތުން މޮޅުވެއްޖެ އެވެ.
އެމެރިކާގެ ރޯސް ބައުލް ސްޓޭޑިއަމްގައި ކުޅުނު އެ މެޗުގައި ދެއްކި ރަތް ކާޑަކާ އެކު ދިހަ ކުޅުންތެރިންނާ އެކު ކުޅެމުން ދިޔަ ޗެލްސީން ލިވަޕޫލް އަތުން މޮޅުވީ 1-0 ލަނޑުންނެވެ.
މެޗުގައި ޗެލްސީން ޖެހި ލަނޑު ފެނިގެންދިޔައީ ދިހަ ވަނަ މިނެޓުގަ އެވެ. ޗެލްސީ އަށް ލިބުނު ކޯނަރަކުން ސެސް ފެބްރިގާސް ނަގައިދިން ހުރަހަކުން އެ ޓީމަށް އެ ލަނޑު ކާމިޔާބުކޮށްދިނީ ޑިފެންޑަރު ގޭރީ ކޭހިލް އެވެ. އޭނާ އެ ލަނޑު ކާމިޔާބުކުރީ ލިވަޕޫލްގެ ޕެނަލްޓީ އޭރިޔާ ތެރޭގައި ހުރެފައި ބޮލުން އުފެއްދި ހަމަލާއަކުންނެވެ.
މެޗުގެ 28 ވަނަ މިނެޓުގައި ލިވަޕޫލް އަށް ނަތީޖާ ހަމަހަމަ ކުރުމަށް ރަނގަޅު ފުރުސަތެއް ލިބިގެންދިޔަ އެވެ. އަލްބާޓޯ މޮރޭނޯ ދިން ބޯޅައިން ފާމީނޯ އަށް ރަނގަޅު ހަމަލާއެއް އުފެއްދިފައެއް ނުވެ އެވެ.
އެމެރިކާ އަދި ޔޫރަޕްގެ އިންޓަނޭޝަނަލް ޗެމްޕިއަންސް ކަޕްގައި ޗެލްސީ އާއި ލިވަޕޫލް ބައްދަލުކުރި މެޗުގެ ތެރެއިން: އެ މެޗުން ޗެލްސީ މޮޅުވީ 1-0 ލަނޑުން --- ފޮޓޯ: އޭޕީ
މެޗުގެ ދެވަނަ ހާފުގެ ކުރީކޮޅު ލިވަޕޫލްގެ ފަރާތުން ނުރައްކާތެރި ކުޅުމެއް ފެނިގެން ދިޔަ ނަމަވެސް، ޗެލްސީގެ ގޯލު ތެރެއަށް ބޯޅައެއް ފޮނުވާލެވިފައެއް ނުވެ އެވެ.
މެޗުގެ 70 ވަނަ މިނެޓުގައި ފެބްރިގާސް އަށް ރަތް ކާޑު ދެއްކުމާ ގުޅިގެން ޗެލްސީން މެޗުގެ ބާކީ ބައި ފުރިހަމަކުރަން ޖެހުނީ ދިހަ ކުޅުންތެރިންނާ އެކު އެވެ. ފެބްރިގާސް އަށް ރަތް ކާޑު ދައްކާފައިވަނީ ލިވަޕޫލްގެ ރެގްނާ ކްލެވަން އަށް ކުރި ފައުލަކާ ގުޅިގެންނެވެ.
އެމެރިކާ އަދި ޔޫރަޕްގެ އިންޓަނޭޝަނަލް ޗެމްޕިއަންސް ކަޕްގައި ޗެލްސީއާއި ލިވަޕޫލްއާ އެކު ދެން ވާދަކުރަނީ އިޓަލީގެ އޭސީ މިލާނާއި، ފްރާންސް ޗެމްޕިއަން ޕެރިސް ސެއިންޓް ޖާމައިން އާއި އިނގިރޭސި ޗެމްޕިއަން ލެސްޓާ ސިޓީ އާއި ޖަރުމަން ޗެމްޕިއަން ބަޔާން މިއުނިކާއި ސްކޮޓްލެންޑް ޗެމްޕިއަން ސެލްޓިކް އާއި ސްޕެއިން ޗެމްޕިއަން ބާސެލޯނާ އާއި އިޓަލީގެ އިންޓަ މިލާން އަދި ޔޫރަޕުގެ ޗެމްޕިއަން ރެއާލް މެޑްރިޑެވެ.