28 Jul 2016, 18:09
އިދިކޮޅު އިއްތިހާދުގެ ޖަލްސާ ރޭ ކުރިއަށްދިޔަ ސަރަހައްދުގައި ނޫސްވެރިކަން ކުރަނިކޮށް ފުލުސް އޮފީހަށް ހާޒިރުކޮށް، ފަހުން ހައްޔަރުކުރި ދެ ބިދޭސީން ދޫކޮށްލަން ކޯޓުން އަމުރުކޮށްފި އެވެ.
މައުލޫމާތު ސާފުކުރުމަށް ރޭ ފުލުސް އޮފީހަށް ހާޒިރުކޮށް، ފަހުން ފުލުހުންގެ ހައްޔަރަށް ގެންދިޔަ ދެ މީހުންނަކީ އަލްވޭރާ ސްޗެސިން ނަމަކަށް ކިޔާ ޕޮލެންޑް އަންހެނަކާއި ފްރެންޗެސްކޯ ނަމަކަށް ކިޔާ އިޓަލީ ފިރިހެނެކެވެ.
ފުލުހުންގެ މީޑިއާ އޮފިޝަލް "ސަން" އަށް މިއަދު ވިދާޅުވީ، ފުލުހުންގެ ހައްޔަރުގައި ތިބި އެ ދެ މީހުން މިއަދު ކްރިމިނަލް ކޯޓަށް ހާޒިރު ކުރުމުން، އެ ދެމީހުން ދޫކޮށްލުމަށް ކޯޓުން އަމުރު ކުރި ކަމަށެވެ. އެހެންކަމުން ކޯޓުގެ އެންގުމާ އެއްގޮތަށް އެ ދެމީހުން ވެސް ވަނީ ދޫކޮށްލައިފަ އެވެ.
މި ދެ މީހުންގެ އަތުގައި އޮތީ ޔޫރަޕިއަން ޖާނަލިސްޓް ލެޖިޓިމޭޝަންގެ ޕްރެސް ކާޑެއްކަން ވެސް 'ސަން' އަށް ވަނީ އެނގިފަ އެވެ.
އެ ދެ މީހުންނަކީ ޓޫރިސްޓް ވިސާގައި ރާއްޖެ އައިސް އުޅޭ ދެ މީހުން ކަމަށާއި ޓޫރިސްޓް ވިސާގައި އައިސް އެއްވެސް ސިޔާސީ ހަރަކާތެއްގައި ބައިވެރި ނުވެވޭނެ ކަމަށް ފުލުހުން ބުންޏެވެ. އަދި ނޫސްވެރިއެއްގެ ގޮތުގައި ވެސް ޓޫރިސްޓް ވިސާގައި އައިސް ހަރަކާތްތެރި ނުވެވޭނެ ކަމަށް ފުލުހުން ވަނީ ބުނެފަ އެވެ.
އިމިގްރޭޝަން ގާނޫނުގެ 10 ވަނަ މާއްދާގެ (ހ) ގައި ބުނެފައި ވަނީ ޓޫރިސްޓް ވިސާގައި ރާއްޖެ އަންނަ މީހުންނަކީ ވަޒީފާއެއް އަދާކުރުމުގެ ނިޔަތެއް ނެތި އަދި އާމްދަނީ ލިބޭނެ އެއްވެސް މަސައްކަތެއްކުރުމުގެ ނިޔަތެއް ނެތި ހަމައެކަނި ރާއްޖެ އަންނަ ބިދޭސީއަކަށް ދެވޭ ވިސާއެއް ކަމަށެވެ.
އާ ގާނޫނުލް އުގޫބާތުގެ 613 ވަނަ މާއްދާގައި ބުނެފައިވާ ގޮތުން ދައުލަތުގެ ކަމާބެހޭ އިދާރާއަކުން ހޯދަންޖެހޭ ހުއްދައެއް ހޯދައިގެން މެނުވީ ކުރުން ހުއްދަ ނޫން ކަމެއް އެ ފަރާތުގެ ހުއްދައަކާ ނުލައި ކުރާ މީހާ އެކުރަނީ ކުށެކެވެ.
އިދިކޮޅު އިއްތިހާދުގެ ޖަލްސާ ކުރިއަށްދާ އާޓިފިޝަލް ބީޗު ސަރަހައްދުން އެ ދެ ބިދޭސީން ފުލުހުންގެ ބެލުމުގެ ދަށަށް ގެންދިއުމުގެ ކުރިން ނޫސްވެރިއެއްކަން އަންގައިދޭ "ޕްރެސް ކާޑް" ފުލުހުންނަށް ދެއްކި އެވެ.