03 Aug 2016, 19:47
ދަގަނޑު ފުރޮޅު ނުވަތަ ދަގަނޑު ޗޭނުލީ ބަރު އުޅަނދުފަހަރުގެ ފުރޮޅާއި ޗޭނުގައި ރަބަރު ހަރުކޮށްގެން މާލޭގައި ދުއްވުމަށް ޓްރާންސްޕޯޓު އޮތޯރިޓީން އެންގި އެންގުން ތަންފީޒު ކުރުން އަންނަ އަހަރުގެ ޖެނުއަރީ މަހުގެ ނިޔަލަށް ފަސްކޮށްފިއެވެ.
ދަގަނޑު ފުރޮޅާއި ޗޭނު ލީ އެކްސްކެވޭޓަރު ފަދަ އުޅަނދުތައް މާލޭ މަގުތަކުގައި ދުއްވާތީ މާލޭގެ މަގުތައް ހަލާކުވާ ކަމަށް ބުނެ، 25 ޖުލައިގެ ކުރިން އެތަކެތީގައި ރަބަރު ފުރޮޅު ނުވަތަ ރަބަރު ޝޫ ހަރުކުރުމަށް އަންގައި، ޓްރާންސްޕޯޓު މިނިސްޓްރީން އިއުލާން ކުރީ ޖޫން 22 ވަނަ ދުވަހުއެވެ.
ޓްރާންސްޕޯޓު އޮތޯރިޓީން އޯގަސްޓް އެކެއްގައި ނެރުނު ބަޔާނެއްގައި ބުނީ، އެފަދަ ރަބަރު ފުރޮޅާއި ޝޫއަކީ ރާއްޖޭން ބޭރުން ގެންނަން ޖެހޭ އެއްޗެހި ކަމުން، އެތަކެތި ރާއްޖެ އެތެރެކުރުމަށް އިތުރު މުއްދަތު ބޭނުންވާނެ ކަމަށެވެ.
އެހެންކަމުން، އެފަދަ އުޅަނދުތައް ދުއްވާ ފަރާތްތަކަށް ފުރުސަތު ދިނުމުގެ ގޮތުން އިތުރު ހަ މަސް ދުވަހުގެ މުއްދަތެއް ދިނުމަށް ޓްރާންސްޕޯޓު އޮތޯރިޓީން ނިންމާފައިވާ ކަމަށް އެ އޮތޯރިޓީގެ ބަޔާނުގައި ބުނެފައި ވެއެވެ.
ޓްރާންސްޕޯޓް މިނިސްޓްރީން ބުނީ އެކަން ތަންފީޒު ކުރުމަށް މުއްދަތު ދިނީ އަންނަ އަހަރުގެ ޖެނުއަރީ 31 ގެ ނިޔަލަށް ކަމަށެވެ.