10 Aug 2016, 10:15
އިތުރުވަގުތުގައި ޑެނިއަލް ކަރްވަހާލް ކާމިޔާބުކޮށްދިން ގޯލާއި އެކު 3-2ގެ ނަތީޖާ އަކުން ސެވިއްޔާ ބަލިކޮށް ރެއާލް މެޑްރިޑުން ޔުއެފާ ސުޕަރ ކަޕް ކާމިޔާބް ކޮށްފިއެވެ.
ރެއާލްގެ މުހިންމު ދެ ކުޅުންތެރިން ކަމަށްވާ ކްރިސްޓިއާނޯ ރޮނާލްޑޯ އާއި ގެރެތު ބޭލް ނުހިމަނައި ކުޅުނު އެ މެޗުގައި އެޓީމަށް ލީޑް ލިބިގެން ދިޔައީ މެޗުގެ 21 ވަނަ މިނެޓްގައި މާކޯ އަސެންސިއޯ ކާމިޔާބުކޮށްދިން ގޯލުންނެވެ. އޭނާ އެ ގޯލު ޖެހީ ސެވިއްޔާގެ ޕެނަލްޓީ އޭރިއާ ބޭރުގައި ހުރެ ފޮނުވާލި ބޯޅަ ގޯލުގެ މަތީކަނަށް ވައްދާލައިގެންނެވެ.
ރެއާލް އިން ލީޑް ނެގި ނަމަވެސް ސެވިއްޔާ އިން ވަނީ ފުރަތަމަ ހާފް ނިމުމުގެ ކުރިން ގޯލެއް ކާމިޔާބުކޮށް މެޗުގެ ނަތީޖާ އެއްވަރު ކޮށްފައެވެ. އެ ގޯލު 41 ވަނަ މިނެޓްގައި ކާމިޔާބުކޮށްދިނީ ފްރަންކޯ ވަސްކުއޭޒް އެވެ.
ފުރަތަމަ ހާފް އެ ނަތީޖާގައި އޮވެ ނިމުނު އިރު ދެވަނަ ހާފްގެ 71 ވަނަ މިނެޓްގައި ސެވިއްޔާއަށް ލިބުނު ޕެނަލްޓީއެއް ގޯލުގެ ތެރެއަށް ވައްދާލައިގެން ޔެވެން ކޮނޮޕްލިޔަންކާ ވަނީ އެޓީމަށް ލީޑް ނަގައިދީފައެވެ.
އެ ނަތީޖާގައި އޮވެ މެޗު ނިމެން ދަނިކޮށް މެޗުގެ 90 ވަނަ މިނެޓްގައި ލޫކަސް ވަޒްކުއިޒް ސެވިއްޔާ ގޯލްކުރިމައްޗަށް ނަގައިދިން ހުރަހަކުން ލިބުނުބޯޅަ ގޯލްތެރެއަށް ފޮނުވާލައިގެން ސާޖިއޯ ރާމޯސް ވަނީ ރެއާލް ސަލާމަތްކޮށްދީފައެވެ.
ފުރިހަމަ ވަގުތު ހަމަވިއިރު ދެ ޓީމް ހަމަހަމަވެފައި އޮތުމުން ނަތީޖާ ނެރެން ކުޅުނު 15 މިނެޓްގެ ދެ ހާފްގެ ތެރެއިން ފުރަތަމަ ހާފްގެ ކުރީ ކޮޅުގައި ސެވިއްޔާގެ ކޮލޮޒިއެޔަކަށް ވަނީ ދެވަނަ ރީނދޫ ކާޑާ އެކު ރަތް ކާޑެއް ދައްކާފައެވެ.
ރެއާލް އަށް ޗެމްޕިއަން ކަން ކަށަވަރު ކޮށްދިން ގޯލު މެޗު ނިމެން އެއް މިނެޓަށް ވެފައިވަނިކޮށް ކަރްވަހާލް ކާމިޔާބް ކޮށްދިނީ މެދު ރޮނގު ކައިރިން ހިފައިގެން ދިޔަ ބޯޅަ ސެވިއްޔާގެ ގޯލުގެ ތެރެއަށް ވައްދާލައިގެންނެވެ.
ރެއާލް އިން ސުޕަރ ކަޕް ކާމިޔާބު ކުރުމާ އެކު މިއީ މިދިޔަ ސީޒަނުގެ ފަހު ކޮޅު އެ ޓީމްގެ ކޯޗުކަމާ ހަވާލުވި ޒައިނުއްދީން ޒިދާންގެ އިރުޝާދުގެ ދަށުން އެ ޓީމް ހޯދި ދެވަނަ ތަށްޓެވެ. މީގެ ކުރިން ރެއާލް އިން ވަނީ ޒިދާންގެ އިރުޝާދުގެ ދަށުން ޔުއެފާ ޗެމްޕިއަންސް ލީގް ވެސް ކާމިޔާބުކޮށްފައެވެ.