11 Aug 2016, 15:17
ވ. ފެލިދޫން އިއްޔެ ހެނދުނުން ފެށިގެން ހަބަރެއް ނުވެގެން ހޯދަމުންދާ މީހާ ހޯދުމަށް ގައުމީ ސަލާމަތީ ބާރު، އެމްއެންޑީއެފް އިން ވެސް އެހީތެރިވާން ފަށައިފިއެވެ.
ގެއްލިގެން ހޯދަމުން އަންނަތާ 24 ގަޑިއިރަށް ވުރެ ގިނައިރުވެފައި ވަނީ ވ. ފެލިދޫ ލައިނޫފަރުމާގޭ، އުމުރުން 76 އަހަރުގެ އަހްމަދު ހަސަން އެވެ. އޭނާ އެންމެ ފަހުން ފެނިފައިވަނީ އިއްޔެ ހެނދުނު 10:00 ހާއިރު އެވެ.
އޭނާ ހޯދުމުގެ މަސައްކަތް ފުލުހުންނާއި އެރަށުގެ ރައްޔިތުން ދަނީ ކުރަމުންނެވެ.
އެމްއެންޑީއެފް އިން ބުނީ، ފެލިދޫން ގެއްލުނު އަހުމަދު ހަސަން ހޯދުމުގެ މަސައްކަތުގައި އެމްއެންޑީއެފް މާލޭ އޭރިއާ ކޯސްޓްގާޑް ސްކޮޑްރައިން ފަށާފައިވާ ކަމަށެވެ. އެގޮތުން ފެލިދޫ ކައިރި ކަނޑުގެ ސަރަޙައްދުގައި އެމްއެންޑީއެފް ކޯސްޓްގާޑުގެ ޑައިވަރުން ހަރަކާތްތެރިވަމުންދާ ކަމަށް މައުލޫމާތުދެ އެވެ.
އެމްއެންޑީއެފުން ވަނީ، ފެލިދޫ ކައިރި ސަރަޙައްދުން ކަނޑުދަތުރުކުރާ ފަރާތްތަކުން މިކަމަށް ސަމާލުކަން ދިނުމަށާއި އެ މީހާއާ ބެހޭ އެއްވެސް މައުލޫމާތެއް ލިބިއްޖެނަމަ ލަސް ނުކުރައްވާ އެމްއެންޑީއެފް ކޯސްޓްގާޑްގެ ހިލޭ ގުޅޭނަމްބަރު 191 ނުވަތަ 3395981 އަދި 3398898 ފޯނަށް ގުޅުއްވައި ދެއްވުން އެދިފައެވެ.
ފެލިދޫ ކައުންސިލުގެ ރައީސް ހަސަން އަލީ މިއަދު ސަން އަށް ވިދާޅުވީ، މިހާރު ފެންނަން ހުރި ހެކިތަކަށް ބަލާ އިރު ބޮޑަށް ބެލެވެނީ އޭނާ ގެއްލިފައި ވަނީ މޫދަށް ކަމަށެވެ. މޫދުން އޭނާގެ އައިނު މިހާރު ފެނިފައިވާ ކަމަށް ހަސަން ވިދާޅުވި އެވެ.
އެމްއެންޑީއެފް އިން ބުނީ، އަހުމަދު ހަސަން އެންމެ ފަހުން ފެނުނު އިރު ލައިގެން ހުރީ ހުދު ގަމީހަކާއި ހުދު މުންޑެއް ކަމަށެވެ.