17 Aug 2016, 10:42
މޯލްޑިވްސް ބާސްކެޓްބޯލް އެސޯސިއޭޝިއަން (އެމްބީއޭ) އިން އިންތިޒާމްކޮށްގެން ކުރިއަށްގެންދާ 24 ވަނަ އެމްބީއޭ ޗެމްޕިއަންޝިޕްގެ އަންހެން ޑިވިޝަނުގެ ފައިނަލުގެ ދެވަނަ ޖާގަ ޔޫތު ސްޕޯޓްސް ކްލަބުން ހޯދައިފި އެވެ.
ޔޫތު ސްޕޯޓްސް ކްލަބު ފައިނަލުން ޖާގަ ހޯދާފައިވަނީ ސައިކްލޯން ބާސްކެޓްބޯލް ކްލަބާ ދެކޮޅަށް ރޭ ކުޅުނު މެޗުން މޮޅުވެގެންނެވެ.
ސޯޝަލް ސެންޓަރު އެތެރޭ ކޯޓުގައި ރޭ ކުޅުނު އެ މެޗުގައި ސައިކްލޯން ބީސީގެ މައްޗަށް ޔޫތު އެސްސީ ކުރި ހޯދާފައި ވަނީ 37-58 ޕޮއިންޓުންނެވެ. އެ މެޗުގެ މޮޅު ކުޅުންތެރިޔާގެ މަގާމަށް ހޮވުނީ ޔޫތު އެސްސީ އަށް 24 ޕޮއިންޓް ހޯދައިދިން ފާތިމަތު ރިޝްމާ އެވެ.
އަންނަ ހުކުރު ދުވަހު ކުޅޭ އަންހެން ޑިވިޝަނުގެ ފައިނަލުގައި ޔޫތު އެސްސީ ނުކުންނަން ޖެހޭނީ ޑޭވިޑް ބާސްކެޓްބޯލް ކްލަބާ ދެކޮޅަށެވެ. ޑޭވިޑް ބީސީ އަކީ ލީގު ބުރުގައި އެ ޓީމު ކުޅުނު ދެ މެޗުން ވެސް މޮޅުވެފައިވާ ޓީމެކެވެ.
އެ މުބާރާތުގެ ފިރިހެން ޑިވިޝަނުގައި އިއްޔެ ހަވީރު ކުޅުނު މެޗުގައި ބައްދަލުކޮށްފައި ވަނީ ދިވެހި ސިފައިންގެ ކްލަބު (ޑީއެސްސީ) އާއި ޔޫތު އެކްޓިވިޓީ އެސޯސިއޭޝަނެވެ. އެ މެޗު 72-63 ޕޮއިންޓުން މޮޅުވެފައި ވަނީ ޑީއެސްސީ އެވެ. މެޗުގެ މޮޅު ކުޅުންތެރިޔާގެ މަގާމަށް ހޮވިފައި ވަނީ ޑީއެސްސީގެ އަހްމަދު ނަސީރެވެ.
ފިރިހެން ޑިވިޝަނުގައި ރޭ ކުޅުނު މެޗުގައި ބައްދަލުކުރީ ޓީރެކްސް ބާސްކެޓްބޯލް ކްލަބާއި ސްޓިންގާސް ބާސްކެޓްބޯލް ކްލަބެވެ. އެ މެޗު 96-30 ޕޮއިންޓުން ކާމިޔާބުކުރީ ޓީރެކްސް ބީސީ އެވެ. މެޗުގެ މޮޅު ކުޅުންތެރިޔާގެ މަގާމަށް ހޮވިފައި ވަނީ ޓީރެކްސް ބީސީގެ ޒަކަރިއްޔާ އަބްދުލް ލަތީފެވެ.