20 Aug 2016, 09:13
ސުޝާންތު ސިންގ ރާޖްޕުތު އަދި ކްރިތީ ސަނޯންގެ ފިލްމު "ރާބްތާ"ގެ ޝޫޓިން ނިންމާލައިފިއެވެ.
"ރާބްތާ" އަކީ ދިނޭޝް ވިޖާންގެ ފުރަތަމަ ޑައިރެކްޝަނެވެ. އެ ފިލްމުގެ މަންޒަރުތައް ނަގާފައި ވަނީ ބުދާޕެސްޓް، ހަންގޭރީ އަދި މޮރިޝަސްގައެވެ. ފިލްމުގެ އެންމެ ފަހު މަންޒަރުތައް ނަގާފައި ވަނީ މިދިޔަ ޖުލައި މަހުގެ ފަހު ހަފްތާ އިން ފެށިގެން މޮރިޝަސްގައެވެ.
ފިލްމުގެ ޝޫޓިން ނިންމާލިކަން ހާމަކޮށްފައި ވަނީ ފިލްމުގެ އަންހެން ލީޑު، ކްރިތީ ކުރި އިންސްޓަގްރާމް ޕޯސްޓަކާ އެކުއެވެ.
ލޯބީގެ ހާދިސާތަކެއްގެ މައްޗަށް އުފައްދާ އެ ފިލްމުގައި ގިނަ އެކްޝަން މަންޒަރުތަކެއް ވެސް ހިމެނޭނެއެވެ.
"ރާބްތާ" ގެ މަސައްކަތް ނިމުމާ އެކު ސުޝާންތު މިހާރު އަންނަނީ އޭނާގެ ކުރިއަށް އޮތް ފިލްމު "އެމް.އެސް ދޯނީ: ދަ އަންޓޯލްޑް ސްޓޯރީ" ެ ޕްރޮމޯޝަންގެ މަސައްކަތް ކުރަމުންނެވެ. އަދި ކްރިތީ ވެސް ވަރަށް އަވަހަށް އިތުރު ފިލްމެއްގެ މަސައްކަތް ފަށާނެ ކަމަށް ހަބަރުތައް ބުނެއެވެ.
"ރާބްތާ" ރިލީޒް ކުރުމަށް ހަމަޖެހިފައި ވަނީ އަންނަ އަހަރުގެ ފެބްރުއަރީ މަހުގެ 10 ވަނަ ދުވަހުއެވެ.