24 Aug 2016, 16:23
ބަރުމާގެ މެދުތެރޭ ހިސާބަށް ގާތްގަނޑަކަށް 6.8 މެގްނެޓިއުޑްގެ ބާރުގަދަ ބިންހެލުމެއް އަތުވެއްޖެ ކަމަށް ޔޫއެސް ޖިއޮލޮޖިކަލް ސާވޭއިން ބުނެފިއެވެ.
ޔޫއެސް ޖިއޮލޮޖިކަލް ސާވޭއިން ބުނެފައިވާގޮތުން ބިންހެލުން އައިސްފައި ވަނީ، ބަރުމާގެ މެއިކްތިލާ ސިޓީގެ 143 ކިލޯމީޓަރު ހުޅަގަށެވެ. އެހެންނަމަވެސް އަދި މިހާތަނަށް ބިންހެލުމާ ގުޅިގެން އެއްވެސް ގެއްލުމެއް ލިބިފައިވާކަން ރިޕޯޓްކޮށްފައެއް ނުވެއެވެ.
ރިޕޯޓްތައް ބުނާގޮތުން މި ބިންހެލުމުގެ އަސަރު، އިންޑިއާ، ބަނގުލަދޭޝް، ތައިލެންޑް، ލާއޯސް އަދި ޗައިނާއަށްވެސް ކޮންމެވެސް ވަރަކަށް ކުރިއެވެ.
ރާއްޖޭގެ މޫސުމާ ބެހޭ އިދާރާއިން ބުނީ، ބަރުމާއަށް އައި ބިންހެލުމުގެ އެއްވެސް އަސަރެއް ރާއްޖެއަށް ނުކުރާ ކަމަށާއި އަދި އޭގެ އެއްވެސް ނުރައްކަލެއް ރާއްޖެއަށް ނެތްކަމަށެވެ.
"އެއީ އިންލޭންޑް ބިންހެލުމެއް ވީމާ، ސުނާމީގެ އިންޒާރެއްވެސް ނެތް. އަދި ރާއްޖެއަށް އޭގެ އެއްވެސް ނުރައްކަލެއް ނެތް،" ރާއްޖޭގެ މޫސުމާ ބެހޭ އިދާރާގެ ޑިރެކްޓަރު އަހްމަދު ރަޝީދު މިއަދު ސަންއަށް ވިދާޅުވިއެވެ.
މަންޒަރުދުށް މީހުންނާ ހަވާލާދީ، ހިންދުސްތާން ޓައިމްސްގައި ބުނެފައިވަނީ، ބިންހެލުމުގެ އަސަރު، މިޔަންމާގެ އެންމެ ބޮޑު ސިޓީ ކަމަށްވާ ޔަންގޮންއަށް ވެސް ވަރަށް ބޮޑަށް ކުރި ކަމަށެވެ. އަދި ބިންހެލުމާއެކު އެ ސިޓީގެ އިމާރާތްތަކަށް ވަރަށް ބޮޑަށް ގުޑުން އެރިކަމަށެވެ.
މީގެ އިތިރުން މިޔަންމާގެ އިރުމަތިން އޮންނަ ތައިލެންޑުގެ ވެރިރަށް ބެންކޮކްގެ އިމާރާތްތަކަށްވެސް 2 ސިކުންތެއްހާ އިރުގެ ލޮޅުމެއް އިހްސާސް ކުރެވުނުކަމަށް އެ ސިޓީގެ މީހުން މައުލޫމާތު ދެއެވެ.