28 Aug 2016, 10:28
ކުރިއަށް އޮތް ހަތަރު ވަރަކަށް ދުވަހު ވެސް ރާއްޖޭގެ އެކިކަންކޮޅުތަކަށް ވިއްސާރަ ކުރާނެ ކަމަށް ލަފާކޮށް މޫސުމަށް ސަމާލުވުމަށް އިލްތިމާސްކޮށްފި އެވެ.
މޯލްޑިވްސް މީޓުރޮޖިކަލް ސާވިސް (މެޓް) އިން މިއަދު ބުނީ ކުރިއަށް ވެސް އޮތީ ވިއްސާރަ ދުވަސްތަކެއް ކަމަށާއި ރާއްޖޭގެ ދެކުނު ހިސާބުތަކަށް ވައިޖެހޭނެ ކަމަށް ލަފާކުރެވެނީ ގަޑިއަކު 10 މެއިލާއި 20 މެއިލާ ދެމެދުގެ ބާރު މިނެއްގައި ކަމަށެވެ.
އެހެން ހިސާބްތަކަށް 15 މެއިލާ 25 މެއިލާ ދެމެދުގެ ބާރު މިނެއްގައި ވައިޖެހޭނެ ކަމަށް މެޓުން ލަފާކުރެއެވެ. އަދި ވިލާގަނޑުގައި 45 މެއިލާ 50 މެއިލާ ދެމެދުގެ ބާރުމިނެއްގައި ވައިޖެހޭނެ ކަމަށް ލަފާކުރެއެވެ.
ރާއްޖޭގެ ހުރިހާ ހިސާބެއްގެ ކަނޑުތައްވެސް ގަދަވާނެ ކަމަށް މެޓް އޮފީހުން ބުނެއެވެ.
މިއަދު 09:30 އިން 12:30 އާއި ދެމެދު ގަދަވަޔާއި އެކު ވާރޭ ވެހޭނެކަމަށް ލަފާކުރެވޭތީ ކ. އަތޮޅުން ފެށިގެން ގދ. އަތޮޅާއި ދެމެދުގެ ރަށްތަކަށް ވަނީ މެޓް އޮފީހުން ޔެލޯ އެލާޓް ނެރެފައެވެ.
ލެޔޯ އެލާޓާއެކު ފެން ބޮޑުވެދާނެތީ އާއި ވަޔާ ފުރާޅުފަދަ ތަކެތި އެއްލާލަފާނެތީ ސަމާލުވުމަށް މެޓް އޮފީހުން އިލްތިމާސް ކުރެއެވެ.
މެޓް އޮފީހުން ބުނީ މިހާރު ކުރަމުންދާ ވިއްސާރައަކީ ރާއްޖެ ސަރަހައްދުގައި އުފެދިފައިވާ ލޯޕްރެޝާ ޓްރަޕްގެ ބާރު ގަދަވުމާއި ގުޅިގެން ކުރަމުން އަންނަ ވިއްސާރައެއް ކަމަށެވެ.