30 Aug 2016, 18:11
ސްރީލަންކާގައި އަންނަ އަހަރު އޭލެވެލް އިމްތިހާނު ބާއްވާ ދުވަސްވަރާ މެދު ހިތްހަމަ ނުޖެހިގެން، ސްކޫލް ދަރިވަރަކު، އެގައުމުގެ ރައީސްގެ ރަސްމީ ވެބްސައިޓު ހެކް ކޮށްފިއެވެ.
ސްރީލަންކާގެ ރައީސްގެ ރަސްމީ ވެބްސައިޓު ހެކުކޮށްފައިވަނީ "ސްރީލަންކާ ޔޫތު" މި ނަން ބޭނުންކޮށްގެން، 17 އަހަރުގެ ދަރިވަރެކެވެ. އެކުއްޖާ އިއްޔެ ވަނީ ލަންކާގެ ފުލުހުންގެ ހައްޔަރަށް ގެންގޮސްފައެވެ.
މިދިޔަ ބުރާސްފަތި އަދި ހުކުރު ދުވަހު ލަންކާ ރައީސްގެ ވެބްސައިޓު ހެކު ކޮށްފައިވާ އިރު، އެއަށް އަރުވާފައިވާ މެސެޖުގައި ބުނެފައިވަނީ އޭޕްރިލް މަހު ބާއްވާ މަތީ ސާނަވީ އިމްތިހާނުތަކުގެ ތާރީޚު ބަދަލު ކުރުމަށެވެ. އޭޕްރިލް މަހަކީ ސްރީލަންކާގައި ސިންހަލަ އަދި ތަމަޅައިންގެ އާ އަހަރު ފެށޭ މަސް ކަމަށް ވާ އިރު، އެ މުނާސަބަތާއި މަތީ ސާނަވީ އިމްތިހާނުތަކާ ދިމާވަނީ ދާދި އެއް ދުވަސްވަރަކަށެވެ.
އެ މެސެޖުގައި ވަނީ، ގައުމުގެ ކަންކަމާއި ބޮޑުވަޒީރުގެ "ޒިންމާދާރުކަން ކުޑަ އަމަލުތައް" ކޮންޓްރޯލު ނުކުރެވޭ ނަމަ އިސްތިއުފާ ދެއްވައި، އާ އިންތިޚާބެއް ބޭއްވުމަށް ރައީސް މައިތުރިޕާލަ ސިރިސޭނާއަށް އިލްތިމާސް ކޮށްފައެވެ.
ދެ ފަހަރެއްގެ މަތިން ލަންކާގެ ރައީސްގެ ވެބްސައިޓު ހެކް ކުރެވުނު އިރު، އެ ވެބްސައިޓުގެ ކޮންޓްރޯލު ނެގުމަށް ސަރުކާރުން ވަނީ ވެބްސައިޓު ޑައުން ވެސް ކޮށްފައެވެ. ނަމަވެސް މިހާރު އެ ވެބްސައިޓަށް ވަދެވެ އެވެ.
މި މައްސަލައިގައި ހައްޔަރުކުރެވުނު 17 އަހަރުގެ ދަރިވަރު، ވެބްސައިޓު ހެކް ކުރުން ނޫން އެހެން މަގުސަތެއް އޮތްތޯ ބެލުމަށް މިހާރު ދަނީ ތަހުގީގު ކުރެވެމުންނެވެ.
ސްރީލަންކާގެ ކޮމްޕިއުޓަރ ކްރައިމްސްއާ ބެހޭ ގާނޫނުގެ ދަށުން، އެކުއްޖާގެ މައްޗަށް ތިން ލައްކަ ރުޕީސް (ގާތްގަނޑަކަށް ދެހާސް ޑޮލަރު)ގެ ޖޫރިމަނާއަކާއި ތިން އަހަރުގެ ޖަލު ހުކުމެއް އައުމުގެ ފުރުސަތު އެބަ އޮތެވެ.