05 Sep 2016, 10:01
ބޮލީވުޑްގެ ކުޅަދާނަ ނެށުންތެރިޔާ އަދި އެކްޓްރެސް މާދުރީ ޑިކްޝިޓް އަށް ސީރިއަސް އަނިޔާ އެއް ލިބި، އަވަސް ފަރުވާ އަށް އެމެރިކާ އަށް ފުރައިފި އެވެ.
ޚަބަރުތައް ބުނާގޮތުން މާދުރީ އެމެރިކާ އަށް ދިޔައީ ކޮނޑަށް ލިބުނު އަނިޔާއެއްގެ ސަބަބުން، ކެތްނުކުރެވޭ ވަރަށް ކޮނޑުގައި ރިއްސަން ފެށުމުންނެވެ.
ޑާންސް ރިއަލިޓީ ޝޯވ "ޖަލަކް ދިކްލާޖާ"ގެ ނިމިދިޔަ ސީޒަން ޖަޖު ކުރަމުން ދިޔަ އިރު ވެސް ކޮނޑުގައި ރިއްސާތީ މާދުރީ އަށް ދިގު ބްރޭކް ތަކެއް ނަގަން ޖެހުނު ކަމަށްވެ އެވެ. ބެލެވޭ ގޮތުގައި ކޮނޑަށް ފަރުވާ ނުކޮށް ހުންނަތާ މިހާރު ދުވަސްތަކެއް ވެއްޖެ އެވެ.
ނަމަވެސް މިހާރު އެމެރިކާ އަށް ގޮސްފައި ވަނީ ފަރުވާއަށް ކަމަށް ރިޕޯޓުތައް ބުނެ އެވެ. މާދުރީގެ ވަރަށް ގާތް ފަރާތަކުން، މާދުރީ އެމެރިކާގައި ހުރިކަން ކަށަވަރުކޮށްދިން ނަމަވެސް އިތުރު މައުލޫމާތު ދިނުމަށް ވަނީ ދެކޮޅު ހަދައިފަ އެވެ.
މާދުރީ ކައިވެނިކޮށްފައި ވަނީ އެމެރިކާގައި މަސައްކަތް ކުރަމުން ދިޔަ އިންޑިއާ އަށް އުފަން، ޑރ. ސްރީރާމް ނެނޭ އާ އެވެ. ސްރީރާމް އަކީ ހިތުގެ ބަލިތަކަށް ޚާއްސަ ޑޮކްޓަރެކެވެ.
ސްރީރާމް އާ ކައިވެނި ކުރުމަށް ފަހު 10 އަހަރު ވަންދެން ދެމީހުން އުޅެމުން ދިޔައީ އެމެރިކާގަ އެވެ. ދިހަ ވަރަކަށް އަހަރަށް ފަހު ދެ ކުދިންނާ އެކު އެ އާއިލާ މުމްބާއީ އަށް ބަދަލުވީ 2011 ވަނަ އަހަރު އެވެ.
މުމްބާއީ އަށް އެނބުރި އައުމަށް ފަހު މާދުރީ ފެނިގެން ގޮސްފައި ވަނީ މުޅިން ވެސް ޑާންސް ރިއަލިޓީ ޝޯވތަކުގެ ފަނޑިޔާރެއްގެ ގޮތުގަ އެވެ.
"ޔޭ ޖަވާނީ ހޭ ދިވާނީ" އަދި "ބޮމްބޭ ޓޯކީޒް"ގައި ޚާއްސަ ފެނިލުމަކުން މާދުރީ ފެނިގެން ދިޔަ އިރު ފިލްމަކުން އެންމެފަހުން ފެނިގެން ގޮސްފައި ވަނީ 2014 ވަނަ އަހަރު ރިލީޒް ކުރި "ގުލާބް ގޭންގް" އާއި "ދެދް އިޝްކިޔާ" އިންނެވެ.
މާދޫރީ އެންމެ ބޮޑަށް ވިދާލާފައި ވަނީ 1900ގެ ފަހުގެ އަހަރު ތަކުގައްޔާއި 2000 ގެ ކުރީގެ އަހަރުތަކުގަ އެވެ. އެ ދުވަސްވަރު އޭނާ ވަނީ ކާމިޔާބު މޮޅެތި ފިލްމުތަކެއް ކުޅެފަ އެވެ.