05 Sep 2016, 12:57
އޮސްޓްރޭލިޔާ އިން ރާއްޖެ އަށް ކަނޑައަޅާފައި ހުންނަވާ ސަފީރު ބްރައިސް ހަޗާސެން، މޯލްޑިވްސް- އޮސްޓްރޭލިއާ އެލުމްނައިގެ ހިންގާ ކޮމިޓިގެ ބޭފުޅުންނާ ބައްދަލު ކުރައްވައިފި އެވެ.
ބުރާސްފަތި ދުވަހު ސިޓީގާޑަންގައި ބޭއްވި ބައްދަލުވުމުގައި މޯލްޑިވްސް އޮސްޓްރޭލިއާ އެލުމްނައިގެ ހިންގާ ކޮމިޓިގެ ބޭފުޅުންގެ ތެރެއިން މާލޭގައި އެ ދުވަހު ތިއްބެވި ހުރިހާ ބޭފުޅުން ބައިވެރިވެ ވަޑައިގަތް ކަމަށް އެ އެލުމްނައިގެ ވައިސް ޕްރެސިޑެންޓް ތިމްނާ ލަތީފު ސަން އަށް ވިދާޅުވި އެވެ.
ތިމްނާ ވިދާޅުވީ މޯލްޑިވްސް އޮސްޓްރޭލިއާ އެލުމްނައިގެ ހިންގާ ކޮމިޓިގެ ބޭފުޅުންނާއި ހައިކޮމިޝަނަރު ބްރައިސް ހަޗާސެން ބައްދަލުކުރައްވައި އިސް ދަރިވަރުންގެ ޖަމްޢިއްޔާއާ ބެހޭ މަޢުލޫމާތު ސާފުކުރައްވައި އަދި ކުރިޔަށް ރާވާފައި ހުރި ކަންކަމާ ބެހޭ ގޮތުން ޚިޔާލު ބަދަލުކުރެއްވި ކަމަށެވެ.
އެ އެލުމްނައިން ބުނީ އޮސްޓްރޭލިޔާ އިން ކިޔަވައިގެން އައިސްތިބި ދަރިވަރުންނަކީ އޮސްޓްރޭލިޔާގެ އެމްބެސެޑަރުންތަކެއް ކަމުގައި އޮސްޓްރޭލިޔާ ސަރުކާރުން ދެކޭ ކަމަށް ހައިކޮމިޝަނަރު ވިދާޅުވި ކަމަށެވެ. އަދި އިސްދަރިވަރުން ހޯދާ ކާމިޔާބުތައް ފާހަގަކުރުމަކީ އޮސްޓްރޭލިޔާ ސަރުކާރުން އިސްކަންދޭނެ ކަމެއްކަމުގައި ވެސް ހައިކޮމިޝަނަރު ވިދާޅުވި ކަމަށެވެ. އެ ބައްދަލުވުމުގައި އިސްދަރިވަރުންގެ ޖަމްޢިއްޔާއަށް އެހީވެދެވިދާނެ ގޮތްތަކާ ބެހޭ ގޮތުން ހިންގާ ކޮމިޓިގެ މެމްބަރުންނާއި ހައިކޮމިޝަނަރު މަޝްވަރާ ކުރެއްވި ކަމަށް ވެސް އެ އެލުމްނައިން ބުންޏެވެ.
އެ ބައްދަލުކުރުމުގައި އޮސްޓްރޭލިޔާ އެވޯޑްސް ސައުތް އެންޑް ވެސްޓް އޭޝިޔާ ޕްރޮގްރާމްގެ ރާއްޖޭގެ ކަންޓްރީ މެނޭޖަރު ޑރ. އިބްރާހިމް ޙަސަން ވެސް ބައިވެރިވަޑައިގެންނެވި ކަމަށް އެ އެލުމްނައިން ބުންޏެވެ.