06 Sep 2016, 12:10
ހުސްނުވާ އާސަންދައިގެން ދަށުން ބޭސްދޫކުރާ ފާމަސީތަކުން ތަބާވާން ޖެހޭ ޝަރުތުތަކާއި މިންގަނޑުތަކާ އެއްގޮތަށް ހިދުމަތް ދެމުން ނުގެންދާ ނަމަ އެ ފާމަސީތަކާ މެދު ފިޔަވަޅު އަޅާނެ ކަމަށް އާސަން ކޮމްޕެނީ ލިމިޓެޑުން މިއަދު ބުނެފި އެވެ.
އާސަންދަ ކޮމްޕެނީން މިދިޔަ އާދިއްތަ ދުވަހު ނެރުނު ނޫސްބަޔާނެއްގައި ބުނީ ހުސްނުވާ އާސަންދަ ސުކީމުގެ ދަށުން ރައްޔިތުންނަށް ބޭސްފޯރުކޮށްދިނުމުގައި ހުސްނުވާ އާސަންދަ ސްކީމުގެ ދަށުން ބޭސް ދޫކުރާ ފާމަސީތަކުން ތަބާވާން ޖެހޭ ޝަރުތުތަކާއި މިންގަނޑުތަކާ އެއްގޮތަށް ހިދުމަތް ދެމުން ގެންދާކަން ކަށަވަރު ކުރުމަށް އެ ކުންފުނިން ފާމަސީތަކަށް ގޮސް ބަލަމުން އަންނަ ކަމަށެވެ.
އާސަންދައިން ބުނީ އެ ކުންފުނިން ބެލި ބެލުމުން ހުސްނުވާ އާސަންދައިގެ ދަށުން ބޭސްދޫކުރުމަށް ތަބާވާން ޖެހޭ ޝަރުތުތަކާއި މިންގަނޑުތަކާއި ހިލާފަށް އައިސީއެމް ފާމަސީތަކުން އަމަލުކުރަމުން އަންނަ ކަމަށެވެ.
އާސަންދައިން ބުނީ އެ މައްސަލަ އިތުރަށް ތަހުގީގުކޮށް އެފަރާތާ މެދު ހުސްނުވާ އާސަންދަ ސުކީމު ބޯޑުގެ ފަރާތުން ވަކި ގޮތެއް ކަނޑައަޅަންދެން ސަސްޕެންޑު ކުރެވިފައިވާ ކަމަށެވެ.
"މީގެ އިތުރުން ހިދުމަތްދޭ ފަރާތްތަކުން ދޫކުރާ ބޭސް އެއީ މޯލްޑިވްސް ފުޑް އެންޑް ޑްރަގް އޮތޯރިޓީން ހުއްދަ ކޮށްފައިވާ ބޭސްކަން ކަށަވަރު ކުރުމާއި ފާމަސީން ބޭސް ދޫކުރުމުގައި އާސަންދައިން ދޫކުރަން ހަމަޖެހިފައިވާ ބޭސް ރައްޔިތުންގެ އަތުން ފައިސާ ނަގައިގެން ދޫކުރުން ފަދަ ކަންކަން ފާމަސީގެ ފަރާތުން ކުރާކަން ފާހަގަކުރެވޭ ނަމަ އެފަދަ ކަންކަން މި ކުންފުނީގެ ސަމާލުކަމަށް ގެނައުމަށް ދަންނަވަމެވެ." އާސަންދައިން ބުންޏެވެ.