14 Sep 2016, 21:57
ޔުއެފާ ޔޫރޮޕާ ލީގުގައި ބުރާސްފަތި ދުވަހުގެ ރޭ މެންޗެސްޓާ ޔުނައިޓެޑް ރަށުން ބޭރުގައި ނެދަލޭންޑްސްގެ ފޭނޫޑް އާ ދެކޮޅަށް ކުޅޭ މެޗަށް ކޯޗު ހޯޒޭ މޮރީނިއޯ އެކުލަވައިލި ޔުނައިޓެޑްގެ ސްކޮޑުން ކެޕްޓަން ވޭން ރޫނީއާއި މިޑްފީލްޑަރު ހެންރިކް މިކިތާރްޔަން ބާކީކޮށްފިއެވެ.
މި ދެ ކުޅުންތެރީންގެ އިތުރުން، އެންޓޯނިއޯ ވެލެންސިއާ، ލޫކް ޝޯ، ޖެސޭ ލިންގާޑް އަދި ފިލް ޖޯންސް ވެސް ފޭނޫޑް މެޗުގައި ނުކުޅޭނެއެވެ.
މިބަދަލު ތަކާއެކު ފޭނޫޑްއާ ދެކޮޅަށް މޮރީނިއޯ ނެރޭ ޓީމުގައި ޖުމުލަ ހަ ބަދަލެއް ހިމެނޭނެއެވެ. އެގޮތުން، ހޮނިހިރު ދުވަހު މެންޗެސްޓާ ސިޓީ އަތުން 2-1 އިން ޔުނައިޓެޑް ބަލިވި މެޗުގައި ކުޅެން ފުރުސަތު ނުލިބުނު، މެޓީއޯ ޑާމިއަން، މާކޯސް ރޮޖޯ، ޓިމޮތީ ފޮސޫ-މެންސާ، މައިކަލް ކެރިކް، މެންފިސް އަދި މޯގަން ޝްނެއިޑަލީން ފަދަ ކުޅުންތެރީންނަށް ފުރުސަތު ދިނުން ގާތެވެ.
ޔޫރޮޕާ ލީގުގައި ފޭނޫޑްއާ ދެކޮޅަށް ކުޅޭ މެޗުން، މިކިތާރްޔާނަށް ފުރުސަތު ގެއްލިފައިވާއިރު، ޖަރުމަނުގެ ބޮރޫޝިއާ ޑޯޓްމަންޑުން ނިމިދިޔަ ސަމަރ ޓްރާންސްފާގައި ޔުނައިޓެޑާ ގުޅުނު އުމުރުން 27ގެ މިޑްފީލްޑަރު ވަނީ، ކޯޗު ހޯޒޭ މޮރީނިއޯ އޭނާލައްވައި ކުޅުވާ މަގާމާމެދު ހިތްހަމަ ނުޖެހުން ފާޅުކޮށްފައެވެ.
އެގޮތުން އޭނާ ކުޅެން ބޭނުންވަނީ، "ފޯވާޑްގެ ފަހަތުން، ޖާޒީ ނަންބަރު 10 ކުޅޭ މަގާމަށް" ކަމަށް ދަ ސަންގައި ބުނެފައި ވެއެވެ.
ބުދަ ދުވަހު ކެރިންޓަންގައި ބޭއްވި ފަރިތަކުރުންތަކުގައި ވެސް މިކިތާރްޔަން އާއި ފިލް ޖޯންސް ބައިވެރިއެއް ނުވެއެވެ.