16 Sep 2016, 09:51
ރާއްޖޭގައި 2018 ވަނަ އަހަރު ބާއްވާ ރިޔާސީ އިންތިޚާބުގައި ވާދަކުރައްވާނެ ލީޑަރެއް އިދިކޮޅު އިއްތިހާދުގެ ތެރޭގައި ނެތް ކަމަށް ހޯމް މިނިސްޓަރު އަޒްލީން އަހުމަދު ވިދާޅުވެއްޖެއެވެ.
ސަން އަށް ދެއްވި އިންޓަވިއުއެއްގައި އަޒްލީން ވިދާޅުވީ، ރިޔާސީ އިންތިޚާބުގައި ވާދަކުރައްވާނެ ލީޑަރަކު އިދިކޮޅު އިއްތިހާދުގައި ނެތުމަކީ އެބޭފުޅުންގެ ވަރަށް ބޮޑު ފެއިލްވުމެއް ކަމަށެވެ.
ހޯމް މިނިސްޓަރު ވިދާޅުވީ، ކޮންމެކޮންމެ މީހަކަށް ރާއްޖޭގެ ރައީސްކަން ނުކުރެވޭނެކަން އެމްޑީޕީގެ މެމްބަރުން ވެސް ގަބޫލުކުރާ ކަމަށެވެ. އެގޮތުން ވަރަށް އިތުބާރު ކުރުމަށްފަހު އެމްޑީޕީގެ ފަރާތުން ރައީސުލްޖުމްހޫރިއްޔާ ކަމަށް ކުރިމަތިލެއްވުމުގެ ޓިކެޓު އެޕާޓީގެ އާންމު މެމްބަރުން ކުރީގެ ރައީސް މުހައްމަދު ނަޝީދަށް ދިން ކަމަށާއި ނަމަވެސް އެމަނިކުފާނު ވަނީ އިސްތިއުފާ ދެއްވާފައި ކަމަށް އޭނާ ވިދާޅުވިއެވެ.
މިހާރު ރައީސް ނަޝީދުގެ ކިބައިގައި ރައީސުލްޖުމްހޫރިއްޔާ ކަމަށް ކުރިމަތިލުމުގެ ޝަރުތު ނެތް ކަމަށް އެމްޑީޕީގެ މެމްބަރުން ވެސް ގަބޫލުކުރާ ކަމަށް އަޒްލީން ވިދާޅުވިއެވެ.
އޭނާ ވިދާޅުވީ، އެވަރުގެ ބޭފުޅަކަށް އިދިކޮޅު އިއްތިހާދުގައި ދެން ހުންނެވީ ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ކަމަށާއި އެމަނިކުފާނަކީ މީގެކުރިން ރައީސް ނަޝީދާ ދިމާލަށް ވަރަށް އިހާނެތި ބަސްތަކެއް ވިދާޅުވެފައިވާ ބޭފުޅެއް ކަމުގައިވާތީ ޑރ. ޖަމީލް ރައީސުލްޖުމްހޫރިއްޔާ ކަމަށް ގެންނަން އެމްޑީޕީގެ މެމްބަރުން ބޭނުންނުވާނެ ކަމަށެވެ.
ރިޔާސީ އިންތިޚާބުގައި ރައީސް ނަޝީދު ނޫން ބޭފުޅެއްގެ ނަން އެމީހުން ހުށަހަޅާހިސާބުން ފެށިގެން އެމީހުންގެ ޔުނައިޓެޑް އޮޕޮޒިޝަން އެއްކޮށް ބައިބައިވެ، ވަކި ވަކިވެގެން ވިއްސިވިހާލިވެގެން ދާނެ.ހޯމް މިނިސްޓަރު އަޒްލީން
ރިޔާސީ އިންތިޚާބުގައި ވާދަކުރައްވަން ރައީސް ނަޝީދު ނޫން ބޭފުޅެއްގެ ނަން ހުށަހަޅާ ހިސާބުން މޯލްޑިވްސް ޔުނައިޑެޓް އޮޕޮޒިޝަން (އެމްޔޫއޯ) ބައިބައިވެ ވިއްސިވިހާލިވެގެންދާނެ ކަމަށް މިނިސްޓަރު އަޒްލީން ވިދާޅުވިއެވެ.
"ރައީސް ނަޝީދު ނޫން ބޭފުޅެއްގެ ނަން އެމީހުން ހުށަހަޅާހިސާބުން ފެށިގެން އެމީހުންގެ ޔުނައިޓެޑް އޮޕޮޒިޝަން އެއްކޮށް ބައިބައިވެ، ވަކި ވަކިވެގެން ވިއްސިވިހާލިވެގެން ދާނެ. އެހެންވީމަ އެކަމުގެ ބިރު ވެސް އެބައޮތް. އެހެންވީމަ އެމީހުންނަށް ނުދެއްކޭނެ އެމީހުންގެ އޮޕޮޒިޝަންގެ ލީޑަރެއް. އެއީކީ ވާނެ ކަމެއް ނޫން. އެއީކީ ވާނެ ކަމެއް ނޫން،" އަޒްލީން ވިދާޅުވިއެވެ.
އިދިކޮޅު އިއްތިހާދުގެ ކަންތައް ހުރިގޮތަށް ބަލާއިރު، ރައީސުލްޖުމްހޫރިއްޔާ އަބްދުﷲ ޔާމީން އަބްދުލް ގައްޔޫމާ ވާދަކުރެވޭނެ ފެންވަރުގެ ބޭފުޅެއް ފެންނަން ނެތް ކަމަށް ވެސް އޭނާ ވިދާޅުވިއެވެ.
"ނެތީމާ ދެން ކިހިނެއްތޯ ލީޑަރަކު ނެރޭނީ. ލީޑަރަކު ނެރެގެން ކާމިޔާބު ނުވުމަށްވުރެ ލީޑަރަކު ނުނެރެ ތިބެ، ލީޑަރަކު ނުނެރެވިގެން ރައީސް ނަޝީދު ވަޑައިގެން ކާމިޔާބު ނުކުރެވުނީއޭ ވިދާޅުވީމަ ދެން އެމީހުންނަށް ރައްޔިތުން ކައިރީ ތަންކޮޅެއް ފަސޭހައިން އެވާހަކަ ދެއްކޭނެތާ،" އަޒްލީން ވިދާޅުވިއެވެ.
ހޯމް މިނިސްޓަރު އަޒްލީންގެ ވާހަފުޅުތަކާ ގުޅިގެން އެމްޑީޕީގެ ގައުމީ މަޖިލީހުގެ މެމްބަރު އަދި ރައްޔިތުންގެ މަޖިލީހުގެ ހިތަދޫ ދެކުނު ދާއިރާގެ މެމްބަރު އަލީ ނިޒާރު ވިދާޅުވީ އެމްޔޫއޯ އިން ފުރަތަމަ މަސައްކަތް ކުރަމުންދަނީ އިންތިގާލީ ސަރުކާރެއް ރާއްޖޭގައި ގާއިމް ކުރުމުގެ މަސައްކަތް ކަމަށެވެ.
ހިތަދޫ ދެކުނު ދާއިރާގެ މެމްބަރު އަލީ ނިޒާރު ---- ފޮޓޯ: މަޖިލިސް
ރިޔާސީ ކެންޑިޑޭޓަކު ނެރުމުގެ މަސައްކަތް ކުރިއަށްދާނީ އެއަށްފަހު ކަމަށް ނިޒާރު ވިދާޅުވިއެވެ.
އޭނާ ވިދާޅުވީ، ހޯމް މިނިސްޓަރު އެ ދައްކަވާ ވާހަކަފުޅުތަކުގެ ބުރަދަނެއް ނެތް ކަމަށާއި މެދު ނުކެނޑި އެމްޑީޕީން ހިންގާ ސިޔާސީ ހަރަކާތްތަކުން ފެންނަ މީހުންގެ ތެރޭގައި ރާއްޖޭގެ ރައީސްކަން ކުރައްވާނެ ބޭފުޅުން ވެސް އުޅުއްވާނެ ކަމަށެވެ. އަދި އެމްޑީޕީގައި ރިޔާސީ ކެންޑިޑޭޓަކު ނެތް ކަމަށް ބުނެވޭނީ އިލެކްޝަންސް ކޮމިޝަނުން ހުޅުވާލާ ފުރުސަތުގައި އެކަމަށް ކުރިމަތި ނުލައިފިނަމަ ކަމަށް ވެސް ނިޒާރު ވިދާޅުވިއެވެ.
ޕީޕީއެމްގެ ރައީސް މައުމޫން އަބްދުލް ގައްޔޫމްގެ ވިސްނުމާ ޚިލާފަށް ރައީސް ޔާމީން ވަނީ ރިޔާސީ އިންތިޚާބުގައި ވާދަކުރައްވަން ނިންމަވާފައި ކަމަށާއި އެއީ ބޮޑު ފެއިލްވުމެއް ކަމަށް އޭނާ ވިދާޅުވިއެވެ.
"އަޅުގަނޑުމެން ފެއިލްނުވާ ކަމުގެ ހެއްކެއް ނޫންތޯ އަޅުގަނޑުމެން އިދިކޮޅު ފިކުރުގައި އޮވެމެ، އަޅުގަނޑުމެންނަށް ހުރި ގޮންޖެހުންތަކާއި އަނިޔާވެރިވުންތަކާއެކު މެދުނުކެނޑި ސަރުކާރު ޖަވާބުދާރީ ކުރުވުމަށްޓަކައި އަޅުގަނޑުމެން މިކުރާ މަސައްކަތް. އެތައް ރައްޔިތުންނެއް އެބަދެކޭ. މުޅި ދުނިޔެ ބަލަން އެއޮތީ،" ނިޒާރު ވިދާޅުވިއެވެ.