18 Sep 2016, 19:57
ބެޓެރީ ދޮން ބޮޑުވެ، ބެޓެރީގައި ރޯވާ މައްސަލަ ދިމާވެފައިވާ ސެމްސަންގް ގެލެކްސީ ނޯޓު 7 ފޯނު، ރާއްޖޭގެ ގައުމީ އެއާލައިން މޯލްޑިވިއަންގެ ފްލައިޓުތަކުގައި ބޭނުންކުރުން މަނާކޮށްފިއެވެ.
ސެމްސަންގް ގެލެކްސީ ނޯޓު 7 ބޭނުންކުރުން ވަނީ، ދުނިޔޭގެ ބައެއް ބޮޑެތި އެއާލައިންތަކުގައި ވެސް މަނާކޮށްފައެވެ. އޭގެ ތެރޭގައި ރާއްޖެއަށް ކޮންމެ ދުވަހަކު ދަތުރުތައް ބާއްވާ ސްރީލަންކަން އެއާލައިންސްއާއި އެމިރޭޓްސް ވެސް ހިމެނެއެވެ.
މޯލްޑިވިއަންގެ ހެޑް އޮފް އެޑްމިނިސްޓްރޭޝަން އަލީ ނަޝާތު ހަމީދު "ސަން" އަށް ވިދާޅުވީ، ސެމްސަންގް ގެލެކްސީ ނޯޓު 7 މޯލްޑިވިއަންގެ ފްލައިޓުތަކަށް ވެސް އެރުވޭނީ ފޯނު ނިއްވާލުމަށް ފަހު، ކެބިން ބެގޭޖު ނުވަތަ ހޭންޑް ލަގެޖާ އެކުގައި އެކަނި ކަމަށެވެ.
އެ ފޯނު ފްލައިޓު މަތީގައި ހުޅުވުމާއި ބޭނުންކުރުމުގެ އިތުރުން ފްލައިޓުގައި ޗާޖު ކުރުން ވަނީ މަނާ ކޮށްފައެވެ. އަދި ކާގޯގެ ގޮތުގައާއި ޗެކިން ކައުންޓަރުން ދޫކޮށްލާ ލަގެޖުގައި ވެސް ދޫކޮށްލުމަކީ މަނާ ކަމެކެވެ.
މޯލްޑިވިއަނުން މިއަދު ނެރުނު ޓްރެވަލް އެޑްވައިޒަރީ --
މޯލްޑިވިއަނުން މިއަދު ވަނީ މިކަމާ ގުޅޭ ޓްރެވަލް އެޑްވައިޒަރީއެއް ވެސް ނެރެފައެވެ.
ސެމްސަންގް ގެލެކްސީ ނޯޓު 7 ގެ ބެޓެރީ ބަޑިޖަހައި، އޭގައި އަލިފާން ރޯވާ މައްސަލަ ބޮޑުވުމުގެ ސަބަބުން، ސެމްސަންގުން ވަނީ އެ ފޯނު ގަނެފައިވާ ފަރާތްތަކުގެ އަތުން ފޯނު އަތުލައި، އޭގެ މާލީ ބަދަލު ދޭން ފަށައިފައެވެ.