18 Sep 2016, 20:09
ހޯޒޭ މޮރީނިއޯގެ އިރުޝާދުގެ ދަށުން ކުޅެމުން އަންނަ މެންޗަސްޓާ ޔުނައިޓެޑް މިސީޒަނުގައި ޖެހިޖެހިގެން ތިން ވަނަ ފަހަރަށް ބަލިވެއްޖެއެވެ. އިނގިރޭސި ޕްރިމިއާ ލީގުގައި މިއަދު ޔުނައިޓެޑް ވަނީ 3-1ގެ ނަތީޖާއަކުން ވެޓްފޯޑް އަތުން ބަލިވެފައެވެ.
އެ ނަތީޖާއާ އެކު ޔުނައިޓެޑް ކުޅުނު ފަސް މެޗުން ލިބުނު ޖުމުލަ ނުވަ ޕޮއިންޓާއެކު އެޓީމު ވަނީ ލީގު ތާވަލުގެ ހަ ވަނައަށް ވެއްޓިފައެވެ. ޔުނައިޓެޑް އަތުން މޮޅުވި ވެޓްފޯޑް ވަނީ ހަތް ޕޮއިންޓާ އެކު ތާވަލުގެ އަށް ވަނަ އަށް ޖެހިލާފައެވެ.
ވެޓްފޯޑް އާއި ޔުނައިޓެޑް މިރޭ ކުޅުނު މެޗުގެ ތެރެއިން --- ފޮޓޯ: އޭޕީ
ލީގުގައި އެންމެ ފަހުން ސިޓީ އަތުން ބަލިވެ ޔޫރޮޕާ ލީގްގައި ފޭނޫޑް އަތުން ވެސް ބަލިވެފައިވާ ޔުނައިޓެޑް ވެޓްފޯޑާ ދެކޮޅަށް، ވިކަރޭޖް ރޯޑް ސްޓޭޑިއަމް ގައި ނިކުތީ ކޮންމެހެން ވެސް އެ މެޗު ކާމިޔާބުކުރުމަށެވެ.
ނަމަވެސް މެޗު ފެށިގެން ފުރަތަމަ ގޯލެއް ޖަހައި ލީޑް ނެގީ ވެސް ވެޓްފޯޑް އިންނެނެވެ. އެ ގޯލު މެޗުގެ 34 ވަނަ މިނެޓްގައި ވެޓްފޯޑަށް ކާމިޔާބުކޮށްދިނީ ފްރާންސްގެ ތަރި އެޓީން ކަޕޫއެވެ.
ވެޓްފޯޑް އާއި ޔުނައިޓެޑް މިރޭ ކުޅުނު މެޗުގެ ތެރެއިން --- ފޮޓޯ: އޭޕީ
ދެ ވަނަ ހާފު ފަށައިގެން 62 ވަނަ މިނެޓުގައި ލަނޑެއް ކާމިޔާބުކޮށް ޔުނައިޓެޑުން މެޗުގެ ނަތީޖާ ހަމަހަމަކުރިއެވެ. އެ ލަނޑު ކާމިޔާބުކުރީ އެ ޓީމުގެ އިނގިރޭސި ޒުވާން ފޯވާޑް މާކަސް ރެޝްފޯޑެވެ. ވެޓްފޯޑަށް ދެވަނަ ފަހަރަށް ލީޑު ނަގައިދިނީ މެޗުގެ 82 ވަނަ މިނެޓުގައި ހުއާން ކެމިލޯ ޒުނިގާއެވެ.
ވެޓްފޯޑުގެ ފަހު ގޯލު އިތުރު ވަގުތުގެ ތެރޭ އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ ޓްރޮއީ ޑީނޭ އެވެ. ވެޓްފޯޑަށް ޕެނަލްޓީ ލިބުނީ ޔުނައިޓެޑްގެ ޕެނަލްޓީ އޭރިއާ ތެރެއިން ޒުނިގާއަށް މަރުއާނޭ ފެލައިނީ ކުރި ފައުލަކާ ގުޅިގެންނެވެ.