03 Oct 2016, 11:29
އަދިސް އަބަބާ (އޮކްޓޯބަރު 3): އިތިއޯޕިއާގައި ކުރިއަށް ދިޔަ ސަރުކާރާ ދެކޮޅު މުޒާހަރާއެއްގައި ތޮއްޖެހުމުގެ ސަބަބުން 52 މީހަކު މަރުވެއްޖެ ކަމަށް އެގައުމުގެ ސަރުކާރުން ބުނެފި އެވެ.
މަންޒަރު ދުށް ފަރާތްތަކުން ބުނި ގޮތުގައި މީހުން މަރުވެފައި ވަނީ މުޒާހަރާ ހުއްޓުވަން ފުލުހުން ކަރުނަ ގޭސް ޖަހައި، ރަބަރު އުންޑަ ބޭނުން ކުރަން ފެށުމުން އެންމެން އެއްފަހަރާ ދުއްވައިގަތުމުންނެވެ.
އިތިއޯޕިއާގެ ބޮޑުވަޒީރު ހެއިލްމާރިއަމް ޑެސަލެން ވަނީ ބިޝޮފްޓޫ ޓައުންގައި ކުރިއަށް ދިޔަ އެ މުޒާހަރާތަކުގައި ހަމަނުޖެހުން ހިންގާފައި ވަނީ މީގެ ކުރިން ރާވައިގެން ކަމަށް ވިދާޅުވެފަ އެވެ. އަދި ފުލުހުން ބަޑި ޖެހި ކަމަށް ބުނާ ހަބަރުތައް ދޮގު ކުރައްވައިފަ އެވެ.
އިތޮއޯޕިއާގެ ސަރުކާރުން އެގައުމުގެ އޮރޯމޯ ދަރިކޮޅުގެ މީހުން އިގުތިސާދީ ގޮތުންނާއި ސިޔާސީ ގޮތުން އެކަހެރި ކުރަމުންދާ ކަމަށް ބުނެ އޮރޯމޯ ދަރިކޮޅުގެ މީހުން މުޒަހަރާ ކުރަމުންދާތާ މަސްތަކެއް ވެއްޖެ އެވެ.
އެމުޒާހަރާތައް ފެށުނީ އޮރޯމޯ ދަރިކޮޅުގެ ގިނަ ބަޔަކު ދިރިއުޅޭ އޮރޯމިއާ ސަރަހައްދުގެ ބިންތަކެއް އިތިއޯޕިއާގެ ވެރިރަށް އަދިސް އަބަބާގެ ބަޔަކަށް ހެދުމުގެ ރޭވުންތައް ސަރުކާރުން އިއުލާން ކުރި ފަހުންނެވެ. ސަރުކާރުން އެފަދައިން އަމަލު ކުރުމުން އޮރޯމޯ ދަރިކޮޅަށް ނިސްބަތްވާ ގިނަ ބަޔެއްގެ ދަނޑުބިން ގެއްލޭނެ ކަމަށް އާއްމުން ބުންޏެވެ.
އެމުޒާހަރާތަކާ ގުޅިގެން އިތިއޯޕިއާ ސަރުކާރުން ވަނީ އޮރޯމިއާގެ ބިންތައް ނެގުމުގެ ރޭވުންތައް ހުއްޓާލާފަ އެވެ. (ބީބީސީ)