04 Oct 2016, 13:22
ދިވެހިރާއްޖޭގައި ހުންނަ ޗައިނާ އެމްބަސީ އިން މީޑިއާ ޑެވެލޮޕްމަންޓް ފައުންޑޭޝަން މޯލްޑިވްސް (އެމްޑީއެފްއެމް) އަށް ފަސް ލެޕް ޓޮޕް މިއަދު ހަދިޔާކޮށްފި އެވެ.
އެ ލެޕްޓޮޕްތައް ހަދިޔާ ކުރެއްވީ ޗައިނާ އެމްބަސީގައި މިއަދު ހެނދުނު ބޭއްވި ރަސްމިއްޔާތެއްގައި ޗައިނާ އިން ދިވެހި ރާއްޖެއަށް ކަނޑައަޅުއްވާފައި ހުންނަވާ ސަފީރު ހިޒް އެކްސެލެންސީ ވަންގް ފުކަންގް ކަމަށް އެ ޖަމިއްޔާ އިން މިއަދު ބުންޏެވެ. އެތަކެއްޗާ އެމްޑީއެފްއެމްގެ ފަރާތުން ހަވާލުވެވަޑައިގަތީ ޖަމްޢިއްޔާގެ ޗެއާމަން އަޙްމަދު ޒާހިރު އެވެ.
މިއަދުގެ ރަސްމިއްޔާތުގެ ތެރެއިން --
އެ ބައްދަލުކުރެއްވުމުގައި އެމްޑީއެފްއެމްގެ ހަރަކާތްތަކަށާއި ނޫސްވެރިކަން ތަރައްގީ ކުރުމަށް ޗައިނާ އިން އެހީތެރިކަން ދެއްވަމުން ގެންދަވާނެ ކަމަށް ސަފީރު ވިދާޅުވި ކަމަށް އެ ޖަމިއްޔާ އިން ބުންޏެވެ. އަދި ރާއްޖޭގެ ތަރައްގީއަށް އެކި ދާއިރާތަކުން ޗައިނާ އިން އެހީތެރިކަން އަބަދުވެސް ދެއްވާކަން އެމަނިކުފާނުގެ ވާހަކައިގައި ފާހަގަކުރެއްވި އެވެ.
އެ ބައްދަލުކުރެއްވުމުގައި ޗައިނާ އެމްބަސީގެ ފަރާތުން ވެދެއްވި އެހީއަށް އެމްޑީއެފްއެމްގެ ފަރާތުން ޖަމްޢިއްޔާގެ ޗެއާމަން ޝުކުރު އަދާކުރެއްވި ކަމަށް ވެސް އެ ޖަމިއްޔާ އިިން ބުންޏެވެ. އަދި ޖަމްޢިއްޔާ ކުރިއެރުވުމަށް ޗައިނާ އެމްބަސީގެ ފަރާތުން ދެއްވަމުން ގެންދަވާ އެއްބާރު ލެއްވުން ފާހަގަކުރެއްވި އެވެ.
އެމްޑީއެފްއެމްގެ ވެބްސައިޓް ގާއިމު ކުރުމަށް ވެސް ޗައިނާ އެމްބަސީގެ ފަރާތުން ވަނީ އެހީތެރިވެފައި ކަމަށް އެ ޖަމިއްޔާ އިން ބުންޏެވެ.