05 Oct 2016, 18:28
ބަޣްދާދު (އޮކްޓޯބަރ 5): އިރާގުގެ ހުއްދައަކާ ނުލައި ތުރުކީގެ ބާރުތައް އިރާގުގެ އުތުރަށް ވަދެގަނެ ހަނގުރާމައިގެ ހަރަކާތްތައް ހިންގަމުން ގެންދާ މައްސަލާގައި އިރާގުން ތުރުކީއަށް އިންޒާރު ކޮށްފިއެވެ.
އިރާގުގެ ބޮޑުވަޒީރު ހައިދަރުލްއަބާދީ ވިދާޅުވީ އިރާގު މިއަދު ވެއްޓިފައިވާ ހާލަތުން ނާޖާއިޒު ފައިދާ ނަގައިގެން އިރާގުގެ އުތުރަށް ތުރުކީގެ ބާރުތައް ވަދެގަނެގެން އުޅުމަކީ ތުރުކީ ސަރުކާރުން ހިންގާ ޖަރީމާއެއް ކަމަށާއި މިކަމުގެ ސަބަބުން ސަރަހައްދީ ހަނގުރާމައަކަށް މަގުފަހިވެގެން ހިނގައިދާނެ ކަމުގައެވެ. އިރާގުގެ ހުއްދައަކާ ނުލައި ތުރުކީގެ ބާރުތައް އިރާގުގެ އުތުރަށް ވަދެގަނެގެން އުޅެނީ ޓެރަރިޒަމާ ހަނގުރާމަ ކުރުމުގެ ނަމުގައެވެ. މިއީ ގައުމުތަކަށް ވަދެގަތުމަށް އެމެރިކާއާއި ޔޫރަޕްގެ ބާރުތައްވެސް ދައްކާ ބަހަނާއެވެ.
ނަމަވެސް ޓެރަރިޒަމާ ހަނގުރާމަ ކުރުމުގެ ނަމުގައި އިރާގުގެ އުތުރަށް ވަދެގަނެގެން އުޅޭ ތުރުކީ ސިފައިންގެ މައްޗަށްވަނީ އައިއެސް ޖަމާއަތަށް އެހީވާކަމުގެ ތުހުމަތުވެސް ކުރެވިފައެވެ. ތުރުކީ ބާރުތައް އިރާގަށް ވަދެގަނެގެން އުޅެނީ އިރާގުގެ އުތުރުގައި ތުރުކީއާ ދެކޮޅަށް ހަރަކާތްތެރިވާ ކުރުދީންގެ ޕީކޭކޭ ޖަމާއަތާ ހަނގުރާމަ ކުރުމަށެވެ. ޕީކޭކޭއަކީ ތުރުކީގެ ދެކުނުގައި ދިރިއުޅޭ ބައިމަދު ކުރުދީންގެ ޘަގާފީ އަދި ސިޔާސީ ހައްގުތަކަށް ތުރުކީގެ ދައުލަތުން އަރައިގަންނަމުންދާތީ އެހައްގުތައް ހޯދުމަށްޓަކައި ހަރަކާތްތެރިވާ ހަނގުރާމަވެރި ޖަމާއަތެވެ. ތުރުކީ ސަރުކާރުން އެޖަމާއަތް ސިފަކުރަނީ ޓެރަރިސްޓް ޖަމާއަތެއްގެ ގޮތުގައެވެ.
ތުރުކީ ސިފައިން އިރާގަށް ވަދެގަންނަ މައްސަލާގައި ތުރުކީގެ ވެރިންނަށް އިންޒާރު ދެއްވަމުން އިރާގުގެ ބޮޑުވަޒީރު ވިދާޅުވީ އިރާގުގެ ނިކަމެތި ހާލަތުން ނާޖާއިޒު ފައިދާ ނުނެގުމަށާއި އިރާގަށް އަސްކަރީ ގޮތުންނާއި އެނޫންގޮތްގޮތުން ނުވަނުމަށް ތަކުރާރުކޮށް ތުރުކީގެ ލީޑަރޝިޕަށް އިލްތިމާސްކޮށްފައިވާނެ ކަމުގައެވެ. ނަމަވެސް ތުރުކީ ހަރަކާތްތެރިވަނީ އެގައުމުގެ ބާރުދައްކައި ބޮޑާވެގަތުމުގެ ރޫހެއްގައި ކަމަށާ މިއީ ގަބޫލުކުރެވޭނެ ކަމެއްނޫންކަމަށް އަބާދީ ވިދާޅުވިއެވެ.
އަބާދީ ވިދާޅުވީ ތުރުކީ ސިފައިން އިރާގުގެ އުތުރަށް ވަދެގަނެ ހިންގާ އަސްކަރީ ހަރަކާތްތަކުގެ ސަބަބުން އިރާގަށް ބޮޑެތި ގެއްލުންތަކެއް ވަމުންދާކަމުގައެވެ. ނަމަވެސް އިރާގުން ބޭނުންވަނީ ތުރުކީއާ ކުރިމަތިލުމުގެ ބަދަލުގައި ތުރުކީގެ ލީޑަރޝިޕުން އިރާގަށް އިހްތިރާމްކޮށް އިރާގަށް އެހީތެރިކަމާއި އެއްބާރުލުން ދިނުމަށްކަމަށް އަބާދީ ވިދާޅުވިއެވެ.
މިދިޔަ އަންގާރަދުވަހު ތުރުކީ ޕާލަމެންޓުންވަނީ އިރާގުގެ އުތުރުގައި ގަވައިދާ ޚިލާފަށް ހަރަކާތްތެރިވާ ތުރުކީ ބާރުތައް އިރާގާއި ސޫރިޔާގެ ބިމުގައި ތިބުމުގެ މުއްދަތު އިތުރު އަހަރަކަށް އިތުރުކޮށްފައެވެ. އިރާގުގެ ޕާލަމެންޓުންވަނީ ތުރުކީ ޕާލަމެންޓްގެ މިނިންމުމަކީ ބާތިލް ނިންމުމެއް ކަމަށް ސިފަކޮށް މިނިންމުން ކުށްވެރިކޮށްފައެވެ. އަދި އިރާގުގެ އުތުރަށް ވަދެގަނެގެން އުޅޭ ތުރުކީ ބާރުތަކަކީ އިސްތިޢްމާރީ ބާރުތަކެއް ކަމަށްވެސް އިރާގުގެ ޕާލަމެންޓުންވަނީ ކަނޑައަޅާފައެވެ.
އިރާގުގެ އިތުރުން ތުރުކީ ސިފައިންވަނީ ސޫރިޔާ މިހާރު އޮތް ހާލަތުން ނާޖާއިޒު ފައިދާ ނަގައިގެން ސޫރިޔާގެ އުތުރަށްވެސް ވަދެގެންފައެވެ. އަދި ސޫރިޔާގައި ހަރަކާތްތެރިވާ އައިއެސް ޖަމާއަތްފަދަ ޓެރަރިސްތް ޖަމާއަތްތަކަށް ތުރުކީން އެހީވާކަމީ މުޅިދުނިޔެއަށް ހާމަވެފައިވާ ކަމެކެވެ. އައިއެސް ޖަމާއަތުން އިރާގާއި ސޫރިޔާއިން ވަގަށްނަގާތެޔޮ އަގުހެކޮށް ތުރުކީވިލާތުން ގަންނަ މައްސަލަވެސް ވަނީ ބޭޒާރުވެފައެވެ.
މީގެއިތުރުން އައިއެސް ޖަމާއަތްފަދަ ސޫރިޔާގައި ހަރަކާތްތެރިވާ ޓެރަރިސްޓް ޖަމާއަތާ ގުޅުމަށް އެކި ގައުމުތަކުން އަންނަ ހައްދު ފަހަނަޅާފައިވާ މީހުން ސޫރިޔާއަށް ވަންނަނީވެސް ތުރުކީގެ ސަރަހައްދީ ރޮނގު ހުރަސްކޮށެވެ. މިއީވެސް ތުރުކީން ސޫރިޔާގެ ހަނގުރާމައަށް ދަރުއެޅުމަށްޓަކައި ކުރާކަމެއްކަމަށް ސޫރިޔާއިން ބުނެއެވެ. އަނެއްކޮޅުން ތުރުކީއަކީ އެމެރިކާއާއި ޔޫރަޕާ އަދި ގަލްފުގެ ގައުމުތަކުގެ އެހީގައި ސޫރިޔާގެ ވެރިކަން ވައްޓާލުމަށް މަސައްކަތްކުރާ ހަނގުރާމަވެރި ޖަމާއަތްތަކަށްވެސް އެންމެ ބޮޑަށް އެހީތެރިވާ އެއްގައުމެވެ.
ތުރުކީގެ އެހީތެރިކަން ނުލިބޭނަމަ އެޖަމާއަތްތައް ބަލިކޮށް ސޫރިޔާއަށް ހަމަޖެހުން ގެނައުމަކީ ސޫރިޔާ ސިފައިންނަށް ފަސޭހައިން ކުރެވިދާނެ ކަމެއްކަމަށް ތަޖްރިބާކާރުން ދެކެއެވެ. ސޫރިޔާގެ ވެރިކަން ވައްޓާލުމަށް މަސައްކަތްކުރާ ހަނގުރާމަވެރި ޖަމާއަތްތަކަކީވެސް އެއްޖަމާއަތް އަނެއް ޖަމާއަތާ ތަޅާފޮޅަމުން ގެންދާ ޖަމާއަތްތަކެވެ. އެޖަމާއަތްތަކުގެ ބޭނުމަކީ ސޫރިޔާގެ ރައްޔިތުން މަރައި މުޅި ސޫރިޔާ ފުނޑުފުނޑު ކޮށްލައިގެން ނަމަވެސް ސޫރިޔާގެ ވެރިކަން ވައްޓާލައި ސޫރިޔާގެ ވެރިކަން ހޯދުމެވެ.
ނަމަވެސް ހަނގުރާމަކޮށްގެން ގަދަބާރުން ވެރިކަން ވައްޓާލި އަރަބި އެއްވެސް ގައުމަކަށް ހަމަޖެހުމެއް މިހާތަނަށް ލިބިފައިނުވާކަން އިރާގާއި ލީބިޔާއާއި ސޮމާލިޔާގެ ހާލަތްތަކުން ވަނީ މުޅި ދުނިޔެއަށް ހާމަވެފައެވެ. އަދި ސޫރިޔާގެ ވެރިކަން ނުވެއްޓޭއިރުވެސް ތަޅާފޮޅަމުން ގެންދާ ޖަމާއަތްތަކަކަށް ބައްޝާރުގެ ވެރިކަން ވެއްޓުނުނަމަވެސް ސޫރިޔާއަށް ހަމަޖެހުމާއި ސުލްހަ ގެނެވިދާނެ ކަމާމެދު ވަނީ ސުވާލު އުފެދިފައެވެ. (ނޫސްއެޖެންސީތައް)