06 Oct 2016, 14:35
އަންކާރާ(އޮކްޓޯބަރު 6): ސީރިއާ އާއި ތުރުކީއާ ގުޅޭ ބޯޑަރު ކައިރީގައި ބޮމެއް ގޮއްވާލައި 20 މީހަކު މަރާލައިފި ކަމަށް ސީރިއާ ހަނގުރާމަ މޮނިޓާކުރާ ސީރިއަން އޮބްޒަވޭޓަރީ ފޯ ހިއުމަން ރައިޓްސް އިން ބުންޏެވެ.
އިނގިރޭސިވިލާތުގައި ހުންނަ އޮބްޒަވޭޓަރީން ބުނި ގޮތުގައި ބޮން ގޮއްވާލާފައި ވަނީ ސީރިއާގެ އިދުލިބު ޕްރޮވިންސުގައި އޮންނަ އަތުމާ އަވަށުގައެވެ. އެ އަވަށަކީ ސީރިއާގެ ސަރުކާރާ ދެކޮޅަށް ހަނގުރާމަ ކުރަމުންދާ ފަރާތްތަކުގެ ބާރުގެ ދަށުގައި އޮތް އަވަށެއް ކަމުން އެ ހަމަލާގައި މަރުވި މީހުންގެ ތެރޭގައި ގިނައީ އިދިކޮޅު ފަރާތްތައް ކަމަށް އޮބްޒަވޭޓަރީން ބުންޏެވެ.
އެހަމަލާ ދިން ފަހުން އިސްލާމިކް ސްޓޭޓް (އައިއެސް)އާ ގުޅުން ހުރި އަމާގް ނޫސް އޭޖެންސީން ވަނީ އެޖަމާއަތުން ސީރިއާގެ އިދިކޮޅު ފަރާތްތަކަށް ނިސްބަތްވާ އުޅަނދުތަކަކަށް ހަމަލާދިން ކަމަށް ރިޕޯޓުކޮށްފައެވެ.
ތުރުކީގެ އެހީއާ އެކު ސީރިއާގެ އިދިކޮޅު ފަރާތްތަކުން ދަނީ ދެގައުމުގެ މެދުގައި އޮންނަ ހުރަސްރޮނގު ކައިރިން އައިއެސްގެ ހަނގުރާމަވެރިން ފޮނުވާލުމަށް ހަނގުރާމަ ކުރަމުންނެވެ.
ދެހާސްއެގާރަ ވަނަ އަހަރު ސީރިއާގެ ދާހިލީ ހަނގުރާމަ ފެށުނު ފަހުން އެގައުމުން މަރުވި މީހުންގެ އަދަދު 430،000 އަށް އަރާނެ ކަމަށް ކަމާ ބެހޭ ފަރާތްތަކުން ލަފާ ކުރެ އެވެ. (އަލްޖަޒީރާ)