16 Oct 2016, 11:42
ސަރުކާރުގެ މައި ވިޔަފާރި ކުންފުނި އެސްޓީއޯ އާއި އެސްޓީއޯގެ ސަބްސިޑަރީއެއްގެ ގޮތުގައި އޮންނަ އިންޝުއަރެންސް ކުންފުނި އެލައިޑް އިންޝުއަރެންސްގެ ހިއްސާއާ އެކު، މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) ރަޖިސްޓްރީ ކޮށްފިއެވެ.
އެސްޓީއޯގެ ދަށަށް މިފްކޯ ގެނައުމަށް ސަރުކާރުން ނިންމީ ސެޕްޓެމްބަރު 29 ވަނަ ދުވަހު އެވެ.
ދައުލަތުން ބުނީ، އެސްޓީއޯއަކީ ތެލުގެ ވިޔަފާރި ކުރާ ކުންފުންޏަކަށް ވާ އިރު، މިފްކޯއިން އެންމެ ބޮޑު ޚަރަދެއް ކުރަނީ ތެލަށް ކަމަށެވެ. އަދި މިފްކޯއިން މަސް އެކްސްޕޯޓު ކޮށްގެން ގިނަ އަދަދެއްގެ ޑޮލަރު ލިބުމުގެ ގާބިލިއްޔަތު ލިބިފައިވާ އިރު، ދެ ކުންފުނި ސައިނަޖައިޒް ކުރުމުން ބޮޑެތި ފައދިާތަކެއް ކުރާނެ ކަމަށް ދައުލަތުން ބުނެ އެވެ.
އެސްޓީއޯއިން މިދިޔަ ހަފްތާގައި ކުރި އިއުލާނެއްގައި ބުނެފައިވާ ގޮތުން، އެސްޓީއޯގެ 99.99 ޕަސަންޓު ހިއްސާ އާއި، އެލައިޑް އިންޝުއަރެންސްގެ 0.01 ޕަސަންޓު ހިއްސާއާ އެކު، އޮކްޓޫބަރު 11 ވަނަ ދުވަހު މިފްކޯ ވަނީ އިކޮނޮމިކް މިނިސްޓްރީގައި ރަޖިސްޓްރީ ކޮށްފަ އެވެ.
"މިފްކޯއަކީ ކުރިން ވެސް އެސްޓީއޯގެ ޑިޕާޓްމަންޓެއްގެ ގޮތުގައި އޮތް އޮޕަރޭޝަނަކަށްވެފައި މިފްކޯ އަލުން އެސްޓީއޯގެ ދަށަށް ގެނެވުމަކީ އެސްޓީއޯ ގްރޫޕް އޮފް ކޮމްޕެނީޒް އިތުރަށް ވަރުގަދަ ވެގެންދާނެ ކަމެއް ކަމަށް އެސްޓީއޯއިން ދެކެމެވެ. އެގޮތުން މިފްކޯގެ ސަބަބުން އެސްޓީއޯ ގްރޫޕަށް ތެލުގެ ވިޔަފާރި ފުޅާކުރުމުގެ ފުރުސަތު ލިބިގެންދާނެ އެވެ. އަދި ހަމަ އެއާއެކު މި ވިޔަފާރިން އެސްޓީއޯ ގްރޫޕަށް ބޭރު ފައިސާ ހޯދުމަށް އެހީއަކަށްވެގެންދާނެ އެވެ،" އެސްޓީއޯގެ ބަޔާނުގައި ބުނެ އެވެ.
މިފްކޯ އެސްޓީއޯގެ ދަށަށް ބަދަލު ކުރި އިރު، މިފްކޯއަށް މާލީ ގޮތުން ބޮޑު ގެއްލުމެއް ކުރިމަތިވެ، މަސްވެރިންނަށް އޮތީ ދެ މިލިޔަން ރުފިޔާއިން ދަރައިފަ އެވެ.
"މިހާތަނަށް މިފްކޯ އިން މަސްވެރިންނަށް ނުދެވި، ކްރެޑިޓަށް ދެ މިލިޔަނެއްހާ ރުފިޔާ ދޭން އެބަ ހުރި. މިއަދު ކެބިނެޓުން ނިންމީ މިއަދުން މިއަދަށް މަސްވެރިންނަށް ދޭން އޮތް ހުރިހާ ލާރިއެއް ބަޖެޓުން ދީ، އެކަން ޚަލާސް ކޮށް، އާ ފެށުމަކުން އެސްޓީއޯގެ ދަށުން މިފްކޯގެ މަސައްކަތްތައް ފަށައިގަތުމަށް،" އެސްޓީއޯގެ ދަށަށް މިފްކޯ ގެންދިއުމާ ގުޅިގެން ފިޝަރީޒް މިނިސްޓަރު ޑރ. މުހައްމަދު ޝައިނީ ވިދާޅުވިއެވެ.