17 Oct 2016, 10:35
އެމްޑީޕީގެ ޗެއާޕާސަން އަލީ ވަހީދުގެ މައްޗަށް ޓެރަރިޒަމްގެ ދައުވާ އުފުލައި، އެ މައްސަލައިގެ ފުރަތަމަ އަޑުއެހުން މިއަދަށް ތާވަލު ކޮށްފިއެވެ.
އިނގިރޭސި ވިލާތުގައި މިހާރު ދިރިއުޅުއްވަމުން ގެންދަވާ އަލީ ވަހީދު، އެގައުމަށް ވަޑައިގަތީ މިދިޔަ އަހަރުގެ މޭ މަހުގެ އެއްވަނަ ދުވަހު މާލޭގައި އިދިކޮޅު ފަރާތްތަކުން ބޭއްވި މުޒާހަރާއަށް ފަހު، ފުލުހުން އޭނާ ހައްޔަރު ކޮށް، ދޫކޮށްލުމާ އެކުއެވެ.
އަލީ ވަހީދުގެ ޕާސްޕޯޓު ވެސް މިދިޔަ މަހުގެ 22 ވަނަ ދުވަހު ވަނީ ކެންސަލް ކޮށްފައެވެ.
އަލީ ވަހީދުގެ މައްޗަށް ޓެރަރިޒަމްގެ ދައުވާ އުފުލީ ކޮން މައްސަލައަކާ ގުޅިގެން ކަމެއް ކަށަވަރު ނުވި ނަމަވެސް، ބެލެވޭ ގޮތުގައި އެއީ 2015 ގެ މޭޑޭގެ މުޒާހަރާއާ ގުޅުންހުރި މައްސަލައަކާ ގުޅިގެންނެވެ. ކްރިމިނަލް ކޯޓުގެ ޝެޑިއުލް ދައްކާ ގޮތުގައި، އަލީ ވަހީދުގެ މައްޗަށް ޓެރަރިޒަމްގެ ދައުވާ އުފުލައި، އެމައްސަލަ ކޯޓަށް ހުށަހަޅާފައިވަނީ މިދިޔަ ސެޕްޓެމްބަރު މަހުގެ 18 ވަނަ ދުވަހުއެވެ.
މޭޑޭގެ މުޒާހަރާއަށް ފަހު އަލީ ވަހީދު ހައްޔަރުކުރީ މުޒާހަރާގައި ދެއްކެވި ވާހަކަތަކުގެ ސަބަބުން މުޒާހަރާގެ ބައިވެރިންނަށް ހަމަނުޖެހުން ހިންގަން ހިތްވަރުލިބި، މުޒާހަރާގެ ތެރޭގައި ހަމަނުޖެހުން ހިންގައި ފުލުހުންނަށް ހަމަލާދިނުމުގެ އަމަލުތައް ހިންގާފައިވާތީ ކަމަށެވެ. އަލީ ވަހީދުގެ އިތުރުން ޖުމްހޫރީ ޕާޓީގެ ނައިބު ލީޑަރު އަމީން އިބްރާހީމާއި އަދާލަތު ޕާޓީގެ ރައީސް ޝައިޚް އިމްރާން ވެސް ހައްޔަރު ކުރިއެވެ.
އިމްރާންގެ މައްޗަށް ވެސް ޓެރަރިޒަމްގެ ދައުވާ ކުރި އިރު، އޭނާގެ މައްޗަށް ކުށް ސާބިތުވެ، 15 އަހަރުގެ ޖަލު ހުކުމެއް ވަނީ އިއްވާފައެވެ. ނަމަވެސް ޖޭޕީގެ ނައިބު ލީޑަރު އަމީން އިބްރާހިމްގެ މައްޗަށް ޓެރަރިޒަމްގެ ދައުވާ އުފުލާފައި ނުވެއެވެ.