20 Oct 2016, 09:30
ކުރީގެ ޑިފެންސް މިނިސްޓަރު ކާނަލް (ރޓޑ) މުހައްމަދު ނާޒިމް ޖަލަށް ލާފައި ވަނީ، ރާއްޖޭގެ ސިރިސޭނާއަށް އޭނާ ވެދާނެތީ އެކަމާ ޖެހިލުންވެގެން ކަމަށް، ކިނބިދޫ ދާއިރާގެ މެމްބަރު އަބްދުﷲ ރިޔާޒު ވިދާޅުވެއްޖެ އެވެ.
ކާނަލް ނާޒިމް ޖަލަށް ލާފައިވާ މައްސަލާގައި ބައިނަލްއަގުވާމީ ފަރާތްތަކުގެ ސަޕޯޓު ހޯދުމުގެ ގޮތުން، ނާޒިމްގެ ގާނޫނީ ވަކީލުންނާއި އާއިލާ ގުޅިގެން، އިއްޔެ ސްރީލަންކާގެ ކޮލޮމްބޯގައި ވަނީ، ބައިނަލްއަގުވާމީ މީޑިއާގެ ފަރާތްތަކާ ބައްދަލުކޮށްފައެވެ.
އެ ބައްދަލުވުމުގެ ޕެނަލްގައި ބައިވެރިވީ ނާޒިމްގެ އަރިސް ބޭފުޅެއް ކަމުގައިވާ ރިޔާޒްގެ އިތުރުން، ނާޒިމްގެ ގާނޫނީ ވަކީލު ހުސްނުއްސުދާއި ގާނޫނީ ވަކީލު އަދި ކެންދޫ ދާއިރާގެ މެމްބަރު އަލީ ހުސައިނާއި، ނާޒިމްގެ ކޮއްކޮ އާދަމް އާޒިމާއި، ނާޒިމްގެ ދޮށީ ދަރިކަނބަލުން ވުލާ ނާޒިމްގެ އިތުރުން، އިންސާނީ ހައްގުތަކާ ބެހޭ ބައިނަލްއަގުވާމީ މާހިރު އައްބާސް ފާއިޒެވެ.
ރިޔާޒް ވިދާޅުވީ ނާޒިމް ވަނީ ފްރޭމް ކުރެވިފައި ކަމަށާއި، އޭނާގެ މައްސަލައިގެ ތަހުގީގު މިނިވަންކަމާ އެކު ޕްރޮފެޝަނަލްކަމާ އެކު ކުރިޔަށް ދިޔަ ނަމަ، އޭނާ މިވަގުތު ހުންނާނީ އޭނާގެ އާއިލާއާ އެކު ކަމަށާއި، މިނިވަން ހާލުގައި ރާއްޖޭގެ ސިޔާސީ މައިދާނުގައި ކަމަށެވެ.
ރިޔާޒް ވިދާޅުވީ، ޑިފެންސް މިނިސްޓަރުގެ މަގާމުގައި ހުރެ ހިންގުންތެރި މަސައްކަތްތަކެއް ކުރައްވަމުން ނާޒިމް ގެންދެވި އިރު، ރާއްޖޭގެ ސިރިސޭނާއަށް ނާޒިމް ވެދާނެ ކަމަށް ރައީސުލްޖުމްހޫރިއްޔާއަށް ހީފުޅުވެފައި އޮތް ކަމަށެވެ.
ސްރީލަންކާގެ ރައީސް މައިތުރިޕާލަ ސިރިސޭނާއަކީ، ލަންކާގެ އޭރުގެ ރައީސް މަހިންދަ ރާޖަޕަކްސަ ރިޔާސީ އިންތިޚާބަށް ކުރިމަތިލެއްވި ދުވަސްވަރު، ރާޖަޕަކްސަގެ ސަރުކާރުގެ ހެލްތު މިނިސްޓަރެވެ. ނަމަވެސް ސިރިސޭނާ އެންމެ ފަހުން ރާޖަޕަކްސައާ ދެކޮޅަށް ރިޔާސީ އިންތިޚާބުގައި ވާދަކުރައްވައި، ރާޖަޕަކްސަ ބަލިކުރެއްވައި، މިހާރު ހުންނެވީ ލަންކާގެ ރައީސްގެ މަގާމުގައެވެ.
"ރައީސް ޔާމީން ހީކުރެއްވީ ނާޒިމް، ރާއްޖޭގެ ސިރިސޭނާއަށް ވެދާނެ ކަމަށް. ނާޒިމަކީ ކުރީގެ ޑިފެންސް މިނިސްޓަރު. ގިނަ ބައެއްގެ މަގުބޫލުކަން ހޯދި، ހިންގުންތެރި ބޭފުޅެއް. ރައީސް ޔާމީން ހީކުރެއްވީ، އެމަނިކުފާނުގެ ޕާޓީގެ ތެރެއިން އެމަނިކުފާނާ ވާދަކުރައްވާނެ ފަރާތަކީ ނާޒިމް ކަމަށް،"
ރިޔާޒް ވިދާޅުވީ، ނާޒިމްގެ އެޕާޓްމެންޓުން ފެނުނު ކަމަށް ބުނާ ފިސްތޯލައަކީ އޭނާއާ އެއްވެސް ގުޅުމެއް އޮތް އެއްޗެއް ނޫންކަން، ޝައްކެއް ނެތް މިންވަރަށް އެނގި ޔަގީންވާ ކަމަށެވެ.
މިކަންކަން ފަޚުމު ކޮށްދެމުން، ނާޒިމްގެ ގާނޫނީ ވަކީލު އަދި ކުރީގެ ބަންޑާރަނައިބު ހުސްނުއްސުއޫދު އެ ޕްރެސް ކޮންފަރެންސްގައި ވިދާޅުވީ އެ ފިސްތޯލައާ ނާޒިމާ ގުޅުމެއް ނެތްކަން ހާމަކޮށްދޭ ހެއްކާއި ގަރީނާ ވާ ކަމަށެވެ. އެގޮތުން، އެ ފިސްތޯލައިން ފެނުނު ޑީއެންއޭ ޕްރޮފައިލް، ކުރީގެ ނައިބު ރައީސް އަހްމަދު އަދީބާ ގުޅޭ ކަމަށް ފުލުހުން ބުނި ބުނުމާއި، އަދީބުގެ ގެއަކުން ފެނުނު ފިސްތޯލަ އާއި ނާޒިމްގެ އެޕާޓްމެންޓުން ފެނުނު ފިސްތޯލައިގެ ސީރިއަލް ނަމްބަރު ފޮހެލުމަށް ބޭނުންކޮށްފައިވަނީ އެއް އުކުޅެއް ކަމަށް ބުނެ އެމްއެންޑީއެފުން ބުނެފައިވާކަން ސުއޫދު ބައިނަލްއަގުވާމީ މީޑިއާއަށް ކިޔައިދިނެވެ.
"ކޯޓުތަކުން ބޭނުމެއް ނުވޭ މި ކަންކަން ބަލާކަށް. އަޅުގަނޑުމެން ކުރާ އިސްތިއުނާފުތައް ވެސް ބޭރުކޮށްލަނީ. އަޅުގަނޑުމެން ޕްރޮސެކިއުޓަރު ޖެނެރަލްގެ އަރިހުން އެދުނިން މިކަން ރިވިއު ކޮށްދޭން. ފިސްތޯލައިގެ މައްސަލަ ތަހުގީގުކޮށްދޭން ފުލުހުންގެ ކިބައިންވެސް އެދުނިން. އެކަމަކު އެކަމަށް ވެސް އިޖާބައެއް ނުދޭ،" ސުއޫދު ވިދާޅުވި އެވެ.
ކިނބިދޫ ދާއިރާގެ މެމްބަރު ރިޔާޒް ވިދާޅުވީ ނާޒިމްގެ މައްސަލަ ސުޕްރީމް ކޯޓުން ބަލައިނުގަތުމަށް ނިންމި ހިސާބުން، ނާޒިމަށް ރާއްޖެއިން އިންސާފު ނުލިބޭނެކަން އެނގުނު ކަމަށެވެ.
"މިހެންވެ އަޅުގަނޑުމެން މިއައީ ބައިނަލްއަގުވާމީ މުޖުތަމައުގެ އެހީތެރިކަމަށް އެދި. ދިވެހި ސަރުކާރަށް މިކަމުގައި ޕްރެޝަރު ކޮށްދެއްވާ. ސިޔާސީ ކަންކަމުގައި ބައިވެރިވެ، މިނިވަނެއްގެ ގޮތުގައި ހުރުމުގެ ހައްގު އެންމެންނަށް ވެސް ލިބޭ. އެ މީހަކު ނުކުރާ ކުށެއްގެ އަދަބު ލިބިގެން ނުވާނެ،" ކޮމިޝަނާ އޮފް ޕޮލިސްގެ މަގާމު ވެސް އަދާ ކުރެއްވި ރިޔާޒު ވިދާޅުވި އެވެ.
"ނާޒިމް މިނިވަން ކުރުމަށާއި އޭނާއަށް އިންސާފު ހޯދުމަށް ކުރާ މަސައްކަތުގައި އެހީތެރިވެދިނުމަށް ބައިނަލްއަގުވާމީ މުޖުތަމަޢާއި ސްރީލަންކާގެ ސަރުކާރުގެ ކިބައިން ވެސް އެދެން."
ނާޒިމްގެ ދޮށީ ދަރިކަނބަލުން ވުލާ ނާޒިމް މި ބައްދަލުވުމުގައި ވިދާޅުވީ ނާޒިމަކީ އަބަދުވެސް ހެލިފެލިވެ އުޅޭ ބޭފުޅެއް ކަމަށާއި، ނާޒިމް ޖަލުގައި ބަންދު ކުރުމާ އެކު އޭނާއަށް ސިއްހީ އެތައް މައްސަލައެއް ކުރިމަތިވަމުންދާ ކަމަށެވެ. އެގޮތުން، ނާޒިމްގެ ލޮލުގެ ފެނުމަށް ބޮޑެތި މައްސަލަތަކެއް ކުރިމަތިވަމުންދާ އިރު، އޭނާއަށް ރަނގަޅު ފަރުވާއެއް ދިނުމަށް އާއިލާއިން އެދެމުން ދިޔަ ނަމަވެސް އެކަން ކުރުމުގެ ފުރުސަތު ސަރުކާރުން ނުދޭ ކަމަށް ވުލާ ވިދާޅުވިއެވެ.
"މިދިޔަ 20 ވަރަކަށް މަހަކީ އަޅުގަނޑުމެން އާއިލާއަށް ކުރިމަތިވި އެންމެ ހިތާމަވެރި ދުވަސްތައް. އަޅުގަނޑުމެންގެ އާއިލާއިން ބޭނުންވަނީ އެންމެން އެކުގައި، އުފަލުގައި ތިބުމަށް. އަޅުގަނޑުގެ ބައްޕަ މިނިވަން ކުރުމަށާއި ބައްޕައަށް އިންސާފު ހޯދުމަށް އެހީތެރިވެ ދެއްވާ،" ވުލާ ވިދާޅުވިއެވެ.
ނާޒިމްގެ އެޕާޓްމެންޓުން ފިސްތޯލައެއް ފެނުނު މައްސަލައިގައި އޭނާގެ މައްޗަށް 11 އަހަރުގެ ޖަލު ހުކުމެއް އިއްވީ 2015 ވަނަ އަހަރުގެ މާޗް މަހުގެ 27 ވަނަ ދުވަހުއެވެ.