10 Nov 2016, 11:47
ޕީޕީއެމް މުސްތަޝާރު އަބްދުﷲ ޔާމީންގެ ފެކްޝަން މެދުވެރިކޮށް ލޯކަލް ކައުންސިލް އިންތިހާބަށް ކުރިމަތިލާ ފަރާތްތަކަށް ޕޮއިންޓްދޭ އުސޫލަކުން ބަލައި ފުރުސަތު ދޭގޮތަށް ނިންމައިފިއެވެ.
ރޭ ބޭއްވި އެފެކްޝަންގެ ކައުންސިލް ބައްދަލުވުމަށްފަހު ޕީޕީއެމްގެ ސެކެޓަރީ ޖެނެރަލް އަދި ނިލަންދޫ ދާއިރާގެ މެމްބަރު އަބްދުﷲ ހަލީލް ވިދާޅުވީ ހޮވޭނެކަން ޔަގީންކަން އޮތް ބޭފުޅުން އިންތިހާބަށް ނެރުމަށްޓަކައި ޕޮއިންޓް ދޭ އުސޫލަކުން ކެނޑިޑޭޓުން ކަނޑައެޅުމަށް މަސައްކަތް ކުރަމުން އަންނަ ކަމަށެވެ.
"ޕޮއިންޓް ދޭ ސިސްޓަމެއްގެ ތެރެއިން ކެނޑިޑޭޓުން ފުރޭނޭނެގޮތެއް ހެދުމަށްވެސް އަޅުގަނޑުމެން މަސައްކަތްތަކެއް ކުރަން، އިރާދަކުރެއްވިއްޔާ މިގޮތަށް ޕޮއިންޓް ދެވިގެންދާއިރު ދާނީ ވަރަށް ބޮޑަށްވެސް އަޅުގަނޑުމެން ޕާޓީގެ އާންމު މެމްބަރުންވެސް ގަބޫލުކުރާ ރާއްޖޭގައި އާންމުކޮށް ގެންގުޅޭ ހަމަތައްވެސް ގަބޫލްކުރާ އުސޫލުތަކެއްގެ ތެރެއިން،" ހަލީލް ވިދާޅުވިއެވެ.
ހަލީލް ވިދާޅުވީ ޕުރައިމަރީއެއް ބާއްވާނީ ކުރިމަތިލާ ކެނޑިޑޭޓުންގެ ތެރެއިން 75 މާކްސްއަށްވުރެ އިތުރަށް ލިބޭ ކެނޑިޑޭޓުން ގިނަ ނަމަކަމަށެވެ.
މާކްސް ދޭ އުސޫލުތަކާއި ގުޅޭގޮތުން ސަންއިން ސުވާލު ކުރުމުން ހަލީލް ވިދާޅުވީ ވަރަށް ގިނަކަންތައްތަކަށް ބަލާ ކަމަށާއި އޭގެ ތެރޭގައި ސިޔާސީ ގާބިލްކަމަށް ބަލާ ކަމަށެވެ.
ޕީޕީއެމްގެ ކެނޑިޑޭޓުން ނެރޭއިރު ރައީސް މައުމޫން އަބްދުލް ގައްޔޫމަށް ތާއީދު ކުރައްވާ ބައެއް ބޭފުޅުން އަމިއްލަ އަށް އިންތިހާބުގައި ވާދަކުރާ ގޮތަކަށް ވާހަކަ ދަނީ ފެތުރެމުންނެވެ.