20 Nov 2016, 12:48
ރާއްޖެ ވަޑައިގެންނެވި ދީނީ އިލްމުވެރިޔާ މުފްތީ އިސްމާޢީލް މެންކް އާ ޑިފެންސް މިނިސްޓަރު އާދަމް ޝަރީފް ޢުމަރު އިއްޔެ ބައްދަލު ކުރައްވައިފިއެވެ.
ޑިފެންސް މިނިސްޓްރީގައި އިއްޔެ ހެނދުނު ބޭއްވި އެބައްދަލު ކުރެއްވުމުގައި ދީނީ ހައްދުފަހަނައަޅައި ދިއުމާ ގުޅޭގޮތުން ވަރަށް ފުޅާ ދާއިރާއެއްގައި ވަނީ މަޝްވަރާ ކުރައްވާފައެވެ. މުފްތީ އިސްމާއީލް މެންކްގެ ވާހަކަފުޅުގައި އެކަމުގައި ވެދެއްވެން އޮތް އެހީތެރިކަމެއް ވެދެއްވާނެ ކަމަށް ވިދާޅުވެފައި ވެއެވެ.
މި މަހުގެ 17 ވަނަ ދުވަހު މުފްތީ މެންކް ރާއްޖެ ގެނެސްފައި ވަނީ ޖަމިއްޔަތުއް ރަހްމާއިންނެވެ. އިއްޔެ އޭނާ ވަނީ އެނބުރި ފުރާވަޑައިގެންފައެވެ.
ޖަމިއްޔަތުއް ރަހްމާއިން ޒުވާނުންނަށް ބާއްވަމުން އަންނަ "އިލްމު ޓޯކްސް"ގެ މިއަހަރުގެ ވޯކްޝޮޕްގައި އޭނާ ވަނީ ތަގުރީރު ކުރައްވައިފައެވެ.
އޭނާ ތަގުރީރު ކުރެއްވީ އެއް މުސްލިމަކު އަނެއް މުސްލިމެއްގެ މައްޗަށް އޮންނަ ހައްގުތަކާ ބެހޭ ގޮތުންނެވެ.
މިދިޔަ ހުކުރު ދުވަހު އިސްލާމީ މަރުކަޒުގައި މުފްތީ ވަނީ ޚުތުބާ ވެސް ވިދާޅުވެފައެވެ.