21 Nov 2016, 12:39
އިއްޔެ ބޭއްވި އެފްއޭއެމް އިންތިހާބުގައި ނާކާމިޔާބުވެވަޑައިގެންނެވި އަހުމަދު ތޯރިގް(ޓޮމް) އަށް ވޯޓް ދެއްވި ހުރިހާ ފަރާތްތަކަށް ޝުކުރު އަދާކޮށް ފުޓްބޯޅަށް ހިދުމަތްކުރުމުގައި އަދި ވެސް ދެމިހުންނާނެ ކަމަށް އޭނާ ބުނެފި އެވެ.
ރައްޔިތުންގެ މަޖިލީހުގެ މަހިބަދޫ ދާއިރާގެ މެންބަރު ޓޮމްއާ ވާދަކޮށް ތިން ވޯޓްގެ ތަފާތުން ރައީސްގެ މަގާމަށް އިންތިހާބްވެވަޑައިގަތީ ޖެނަރަލް ސެކެޓްރީގެ މަގާމްގައި ހުރި ބައްސާމް އަދީލް ޖަލީލް އެވެ. ބައްސާމް އަށް ލިބުނީ 14 ވޯޓެވެ. ޓޮމް އަށް 11 ވޯޓެވެ.
"އެފްއޭއެމްގެ އިންތިހާބުގައި އެހީތެރިވެދެއްވި އަދި ވޯޓް ދެއްވި ހުރިހާ ފަރާތްތަކާއި ކްލަބްތަކަށް ޝުކުރު ދަންނަވަން. ދިވެހި ފުޓްބޯޅައަށް ހިދުމަތް ކުރުމުގައި އަދި ވެސް ދެމިހުންނާނަން،" ޓޮމް އޭނާގެ ފޭސްބުކު އެކައުންޓުގައި ލިޔެފައިވެ އެވެ.
އެފްއޭއެމްގެ ރައީސް ކަމުގެ މަގާމަށް މުހައްމަދު ތާރިގު (ޓޮމް) މީގެ ކުރިން އިންތިހާބުވުމަށް ފަހު ގައުމީ ޓީމާ ބައްދަލުކުރައްވަނީ. -- ސަން ފައިލް ފޮޓޯ
ފުޓްބޯޅައަށް ހިދުމަތްކުރުމުގައި ދެމިހުންނަވާނެ ކަމަށް ޓޮމް ވިދާޅުވެފައިވާ އިރު އިއްޔެ ބޭއްވި އިންތިހާބު ކާމިޔާބްކުރެއްވުމަށް ފަހު ބައްސާމް ވިދާޅުވީ އޭނާއާ ވާދަކުރެއްވި ޓީމަކީ ފުޓްބޯޅަ އާއިލާ އަށް ނިސްބަތްވާ ފުޓްބޯޅައިގެ ޓީމެއް ކަމަށާއި ދިވެހި ފުޓްބޯޅަ އެހެން ހަރުފަތަކަށް ގެންދިއުމަށް އެ ފަރާތްތަކުގެ އެއްބާރުލުމާއި އެހީތެރިކަން ބޭނުންވާނެ ކަމަށެވެ. އެހެން ކަމުން ކުރީގެ ގައުމީ ޓީމްގެ ހުނަރުވެރި ފޯވާޑް އަހުމަދު ތޯރިގް އަލުން ޓޮމްއާ އެކު ފެނުމަކީ ވެސް ވަރަށް ގާތް ކަމެކެވެ.
މި އަހަރުގެ މޭ މަހުގެ ތެރޭގައި ބޭއްވި އެފްއޭއެމްގެ އިންތިހާބު ބޮޑު އަޣުލަބިއްޔަތަކުން ކާމިޔާބުކުރެއްވި ޓޮމްއަށް މަގާމް ގެއްލި އަލުން އިންތިހާބެއް ބާއްވަން ޖެހުނީ އޭނާގެ އިތުބާރު ނެތްކަމަށް ބުނެ، އެފްއޭއެމްގެ އެކްސްކޯގައި ހިމެނޭ ފަސް މެންބަރަކު އެއްފަހަރާ އެކްސްކޯއިން އިސްތިއުފާދިނުމާ ގުޅިގެންނެވެ.