22 Nov 2016, 14:49
ގާހިރާ (ނޮވެމްބަރު 22): މިސްރުގެ ކުރީގެ ރައީސް މުހައްމަދު މޫރުސީގެ މައްޗަށް ކޮށްފައިވާ އުމުރު ދުވަހުގެ ޖަލު ހުކުމް އެގައުމުގެ އެންމެ މަތީ ކޯޓުން ބާތިލުކޮށްފި އެވެ.
ފަލަސްތީނުގެ ހަމާސް ޖަމާއަތާ ގުޅިގެން ޖާސޫސް ކުރިކަމުގެ ދައުވާގައި މޫރުސީގެ މައްޗަށް ކޮށްފައިވާ އުމުރު ދުވަހުގެ ޖަލު ހުކުމް ބާތިލުކޮށް މައްސަލައިގެ ޝަރީއަތް އަނެއްކާވެސް ބާއްވަން ކޯޓުން އެންގީ މޫރުސީގެ މައްޗަށް މިދިޔަ އަހަރު ކުރި މަރުގެ ހުކުމް ބާތިލު ކުރިތާ އެއް ހަފްތާ ފަހުންނެވެ.
މޫރުސީގެ މައްޗަށް މަރުގެ ހުކުމް ކުރީ 2011 ވަނަ އަހަރު މިސްރަށް ގެނައި އިންގިލާބު ތެރޭގައި ޖަލުން ފިއްލެވުމާ ގުޅިގެންނެވެ.
މޫރުސީ އަދި ވެސް ގެންދަވަނީ އޭނާގެ ވެރިކަމުގައި މުޒާހަރާ ކުރި އިދިކޮޅު ފަރާތްތައް ހައްޔަރުކޮށް، އަނިޔާ ކުރުމަށް އަމުރު ނެރުމުގެ ދައުވާގައި 20 އަހަރުގެ ޖަލު ހުކުމެއް ތަންފީޒު ކުރައްވަމުންނެވެ.
ޑިމޮކްރަޓިކް އިންތިހާބެއް ކާމިޔާބު ކޮށް ވެރިކަމަށް ވަޑައިގެންނެވި ފުރަތަމަ ރައީސުގެ ގޮތުގައި 2012 ވަނަ އަހަރު މޫރުސީ ވެރިކަމަށް ވަޑައިގެންނެވިތާ އެއް އަހަރު ތެރޭ އޭނާއާ ދެކޮޅަށް ބޮޑެތި މުޒާހަރާތައް ބާއްވައި، އެގައުމުގެ އަސްކަރިއްޔާ އިން އޭނާ ވެރިކަމުން ދުރުކުރި އެވެ. އަދި އަސްކަރިއްޔާގެ ވެރިޔާ އަބްދުލް ފައްތާހު އައް ސީސީ ރައީސް ކަމަށް ވަޑައިގެންނެވި އެވެ. (ބީބީސީ)