28 Nov 2016, 11:15
ކުވައިތު ސިޓީ (ނޮވެންބަރު 28): ކުވައިތުގެ ޕާލަމެންޓަށް އިންތިޚާބުވި ހުރިހާ މެންބަރުންނަށް އެގައުމުގެ އަމީރު ޝައިޚް ސަބާހުލްއަހްމަދު މަރްހަބާ ވިދާޅުވެއްޖެއެވެ.
އައު މެންބަރުންނަށް ފޮނުއްވި ތަހްނިޔާގެ މަސެޖްގައި އަމީރު ވިދާޅުވެފައިވަނީ އެބޭފުޅުންނަކީ ކުވައިތުގެ ރައްޔިތުންގެ މަންދޫބުން ކަމަށާއި ރައްޔިތުން ހަވާލުކުރި މަސްއޫލިއްޔަތުތައް ފުރިހަމަ ގޮތުގައި އަދާކުރުންމަތީ އެބޭފުޅުން ދެމިތިބެންޖެހޭނެ ކަމުގައެވެ.
ކުވައިތުގައި މިދިޔަ ހޮނިހިރު ދުވަހު ބޭއްވި ޕާލަމެންޓްރީ އިންތިޚާބުގެ ނަތީޖާ ނުކުމެފައިވަނީ އެހެންފަހަރުތަކާ ވަރަށް ތަފާތު ކޮށެވެ. މިފަހަރު ޕާލަމެންޓްގެ ގިނަ ގޮނޑިތައް ކާމިޔާބުކޮށްފައިވަނީ އަލަށް ކުރިމަތިލި ޒުވާން ކެންޑިޑޭޓުންނެވެ. ތިން ހަތަރު ފަހަރު ޕާލަމެންޓްގައި (މަޖިލިސް)ގައި ޚިދްމަތްކުރައްވާފައިވާ ގިނަ ބޭފުޅުންނަށް މިފަހަރުގެ އިންތިޚާބުގައިވަނީ ނާކާމިޔާބީއާ ކުރިމަތިލާން ޖެހިފައެވެ.
ކުވައިތުގެ އިންތިޚާބުތަކާބެހޭ އިދާރާ ބުނާ ގޮތުން ޕާލަމެންޓްގެ 60 އިންސައްތައް ގޮނޑި ކާމިޔާބުކޮށްފައިވަނީ އަލަށް ކުރިމަތިލެއްވި ކެންޑިޑޭޓުންނެވެ. މީގެ އިތުރުން ކުވައިތުގެ އިޚްވާނުލްމުސްލިމޫން ޖަމާއަތުގެ ކެންޑިޑޭޓުންނާއި ސަލަފީ ފިކުރުގެ ކެންޑިޑޭޓުންވެސް ކުރީފަހަރަށްވުރެ ގިނަ ގޮނޑި މިފަހަރުގެ އިންތިޚާބުގައި ކާމިޔާބުކޮށްފައިވެއެވެ.
އަންހެނުންނަށް ބަލާއިރު އެމީހުންނަށް ކާމިޔާބު ކުރެވިފައި ވަނީ އެންމެ ގޮނޑިއެކެވެ. ނަމަވެސް ކުރީގެ ޕާލަމެންޓްގައި އަންހެނުންނަށް އެންމެ ގޮނޑިއެއްވެސް ކާމިޔާބު ކުރެވިފައެއް ނުވެއެވެ. މިފަހަރުގެ އިންތިޚާބުގައި އިޚްވާނުލް މުސްލިމޫން ޖަމާއަތާއި ސަލަފީ ފިކުރުގެ ކެންޑިޑޭޓުންގެ އިތުރުން ގައުމީ ފިކުރުގެ ކެންޑިޑޭޓުންނާއި އިލްމާނީ ނުވަތަ ލާދީނީ ފިކުރުގެ ކެންޑިޑޭޓުން ވެސް ގޮނޑިތައް ކާމިޔާބުކޮށްފައިވެ އެވެ. އިޚްވާނުލްމުސްލިމުން ޖަމާއަތާއި ސަލަފީ ފިކުރުގެ މެންބަރުންނާއި ގައުމީ ފިކުރުގެ މެންބަރުންނާއި އިލްމާނީ ފިކުރުގެ މެންބަރުންގެ ތެރޭގައި ވެސް ސަރުކާރާ އިދިކޮޅު ބޭފުޅުންނާއި އެއްކޮޅު ބޭފުޅުން ހިމެނެއެވެ.
މުޅި މަޖިލީހަށް ބަލާއިރު މަޖިލީހުގެ 70 އިންސައްތައް ކާމިޔާބުކޮށްފައިވަނީ ސަރުކާރަށް ތާއީދުކުރާ މެންބަރުންނެވެ. އިދިކޮޅު ފަރާތްތަކުގެ ނިސްބަތް، އަލަށް އިންތިޚާބު ކުރި ކުވައިތުގެ ޕާލަމެންޓްގައި ވަރަށް ކުޑައެވެ. ކުވައިތުގެ ޕާލަމެންޓްރީ އިންތިޚާބާ ގުޅިގެން އެގައުމުގެ ބޮޑުވަޒީރު ވަރަށް އަވަހަށް އިސްތިއުފާ ދެއްވާނެއެވެ. އަދި އަލަށް ސަރުކާރެއް އެކުލަވާލުމަށްޓަކައި ކުވައިތުގެ އަމީރު އައު ބޮޑުވަޒީރަކު އައްޔަން ކުރައްވާނެއެވެ.
އިންތިޚާބު ކުރެވޭ ޕާލަމެންޓެއް ކުވައިތުގައި އޮތްނަމަވެސް އެގައުމުގެ ދަސްތޫރުގައި ޕާލަމެންޓަށް މާބޮޑު ބާރުތަކެއް ދީފައެއް ނުވެއެވެ. އަދި ޑިމޮކްރެޓިކް އުސޫލުން އޮންނަ ޕާޓީ ސިސްޓަމެއް ކުވައިތުގައި ނޯވެއެވެ. އަދި ކުވައިތުގެ ބޮޑުވަޒީރު ކަމަށް އަބަދުވެސް އައްޔަން ކުރަނީ އެގައުމުގައި މުތްލަގް ވެރިކަމެއްކުރާ ޝާހީ އާއިލާގެ މެންބަރެކެވެ. (އަލްޖަޒީރާ)