28 Nov 2016, 13:24
އެލައިޑް އިންޝުރެންސް ކުންފުންޏަށް 24 ގަޑިއިރު ހިލޭ ގުޅޭ ނަމްބަރު، "1600" އާއި، އެ ކުންފުނީގެ ޚިދުމަތްތައް ލިބޭ މޯބައިލް އެޕްލިކޭޝަނެއް ތައާރަފްކޮށްފި އެވެ.
ދަރުބާރުގޭގައި އެލައިޑުން ރޭ ބޭއްވި ހަފްލާގައި، އެ ކުންފުންޏަށް ހިލޭ ގުޅޭ ނަމްބަރު ތައާރަފްކޮށްދެއްވީ، އެލައިޑްގެ ޕޭރެންޓް ކުންފުނި، އެސްޓީއޯގެ މެނޭޖިންގް ޑިރެކްޓަރު އަހުމަދު ޝަހީރު އެވެ.
އެ ނަމްބަރަށް ގުޅުއްވައިގެން އިންޝުރެންސް ޕޮލިސީތަކުގެ މައުލޫމާތާއި ކްލެއިމް ރިޕޯޓުކުރުމާއި ޕޮލިސީ ރިނިއު ކުރުން ފަދަ މުހިއްމު ޚިދުމަތްތައް ހޯއްދެވޭނެ ކަމަށް އެލައިޑުން ބުންޏެވެ.
ހިލޭ ގުޅޭ ނަމްބަރެއް ތައާރަފްކުރުމުގެ އިތުރުން ރޭގެ ހަފްލާގައި އެކުންފުނިން ވަނީ، އެކުންފުނީގެ ޚިދުމަތްތައް ކޮންމެ ތަނެެއްގައި ހުރެގެން ވެސް ލިބޭ މޯބައިލް އެޕްލިކޭޝަނެއް ތައާރަފްކޮށްފަ އެވެ.
އެ އެޕްލިކޭޝަން އިފްތިތާހުކޮށްދެއްވީ އެލައިޑުގެ ޗެއާމަން، މުހައްމަދު ރަޝީދު (ހިއަލީ) އެވެ.
އެލައިޑް އިންޝުރެންސްގެ މޯބައިލް އެޕްލިކޭޝަން މެދުވެރިކޮށް ލިބޭ ޚިދުމަތްތަކާ ބެހޭ ގޮތުން ވާހަކަ ދައްކަވަމުން އެ ކުންފުނީގެ މާކެޓިން މެނޭޖަރު ނިއުޝާދު ޝަރީފު ވިދާޅުވީ އެ އެޕްލިކޭޝަންގެ ސަބަބުން ޚިދުމަތް ހޯދުމަށް އެ ކުންފުނީގެ އޮފީހަށް ވަޑައިގެން ހޭދަކުރައްވާ ވަގުތު ސަލާމަތްކުރެވޭނެ ކަމަށެވެ. އަދި އެ އެޕްލިކޭޝަން މެދުވެރިކޮށް ލިބޭ ޚިދުމަތްތަކުގެ ތެރޭގައި ތާޑް ޕާޓީ މޮޓޯ އިންޝުރެންސް ނެގުމާއި ތާޑް ޕާޓީ މޮޓޯ އިންޝުރެންސް ޕޮލިސީ މުއްދަތު ހަމަވުމުން އާ ކުރުމާއި ރާއްޖެ އިން ބޭރަށް ކުރާ ދަތުރުތަކަށް ޚާއްސަ ޓްރެވަލް އިންޝުރެންސް ނެގުން ހިމެނެ އެވެ.
މީގެ އިތުރުން ޓްރެފިކް ބޭނުންތަކަށް އިންޝުރެންސް ސްޓިކާ އިލެކްޓްރޯނިކްކޮށް ދައްކާލުމާއި ޕޮލިސީތަކުގެ ސައްހަކަން ބަލާލުމުގެ ފުރުސަތު މި އެޕްލިކޭޝަނުން ފަހިކޮށްދެ އެވެ.
"ސްޓިކާއެއް ތަތްކޮށްގެން އުޅުމަކީ މި ޒަމާނުގެ ގޮތެއް ނޫން. ޓެކްނޮލޮޖީގެ ގޮތުން މިހާ ކުރިއަރާފައިވާ ޒަމާނެއްގައި ފޯނުން މިކަން ވެސް ކުރެވޭނެ ގޮތް ހެދުމަކީ އަޅުގަނޑުމެންގެ އަމާޒު،" ރޭގެ ހަފްލާގައި ނިއުޝާދު ވިދާޅުވި އެވެ.
ނިއުޝާދު ވިދާޅުވީ އެއްގަމު އުޅަނދުގެ އިންޝުއަރެންސް ސްޓިކާ އިލެކްޓްރޯނިކް ކުރުމަށް ޓްރާންސްޕޯޓް އޮތޯރިޓީއާ އެކު އެއްބަސްވުމަކަށް އާދެވިފައިވާ ކަމަށާއި އެކަން ތައާރަފްކުރުމަށް ފުރިހަމަ ކުރަން ޖެހޭ ކަންކަން ނިމުމާ އެކު، އުޅަނދުގައި ސްޓިކާ ތަތްކޮށްގެން އުޅުމުގެ ބަދަލުގައި އެލައިޑުގެ އެޕް މެދުވެރިކޮށް އެ އުޅަނދެއްގެ އިންޝުއަރެންސާ ބެހޭ މައުލޫމާތު ބަލައިލެވޭނެކަމަށެވެ.