07 Dec 2016, 09:15
ޖަކާޓާ(ޑިސެމްބަރު 7): އިންޑޮނޭޝިއާގެ އަޗޭ ޕްރޮވިންސު ކައިރިން ކަނޑު އަޑިއަށް މިއަދު ހެނދުނު އައި ބިންހެލުމެއްގައި 25 މީހަކު މަރުވެއްޖެ އެވެ.
އަޗޭ ޕްރޮވިންސުގެ ސުމަތުރާ ކައިރިއަށް 17.2 ކިލޯމީޓަރު އަޑިން އަައި 6.4 މެގްނިޓިއުޑުގެ އެބިންހެލުމުގައި ގިނަ އިމާރާތްތައް ބިމާހަމަވެފައިވާ ކަމަށް ރެޑް ކްރޮސް އިން ބުނެ އެވެ.
އެ ބިންހެލުމާ ގުޅިގެން ސުނާމީގެ ނުރައްކަލެއް ނެތް ކަމަށް އިންޑޮނޭޝިއާގެ މީޓިއޮރޮލޮޖިކަލް ސެންޓަރުން ވަނީ ބުނެފައެވެ.
އިންޑޮނޭޝިއާއަށް އިއްޔެ އައި ބިންހެލުމުގައި ގެއްލުންވި އިމާރާތެއް -- ފޮޓޯ: އޭއެފްޕީ
ޔޫއެސް ޖިއޮލޮޖިކަލް ސާވޭއިން ބުނި ގޮތުގައި ސުމަތުރާގެ ސިގްލީ އަވަށުގެ އައްސޭރިފަށަށް އެ ބިންހެލުން އައިސްފައި ވަނީ އިންޑޮނޭޝިއާ ގަޑިން ފަތިހު 5:30ގައެވެ.
ބިންހެލުމުގެ އަސަރު އެންމެ ބޮޑަށް ކުރި ޕިޑީ ޖާޔާ ޑިސްޓްރިކްޓުގެ ޑެޕިއުޓީ ޗީފް ސައިދު މުލްޔަދީ ވަނީ ބިންހެލުމުގެ ސަބަބުން މަރުވި މީހުންގެ އަދަދު 25ށް ވުރެ އިތުރު ވުމަކީ އެކަށީގެންވާ ކަމެއް ކަމަށް ވިދާޅުވެފައެވެ.
ސުމަތުރާއަށް މިއަހަރު ތެރޭގައި އިތުރު ބިންހެލުންތައް އައިސްފައިވެ އެވެ. ދެހާސްސާދަ ވަނަ އަހަރު ސުމަތުރާ ކައިރިން ކަނޑު އަޑިއަށް އައި ބިންހެލުމެއްގެ ސަބަބުން ސުނާމީއެއް އަރައި، އެޕްރޮވިންސުން 120،000 މީހުން މަރުވެފައިވެ އެވެ. (ބީބީސީ)