09 Dec 2016, 09:36
ރާއްޖެއިން ބޭރަށް ދަތުރުކުރާ ދިވެހީންނަށް ޓިކެޓު ވިއްކުމުގެ ކަންކަން އެމްއެމްއޭއިން ކުރަން ފެށިތާ ތިންވަނަ ހަފްތާގައި، 5،500 އަށް ވުރެ ގިނަ ޓިކެޓަށް 2.8 މިލިޔަނަށް ވުރެ ގިނަ ޑޮލަރު ވިއްކައިފިއެވެ.
ރާއްޖެއިން ބޭރަށް ދަތުރުކުރާ ދިވެހީންނަށް ޓިކެޓް ވިއްކުމުގެ ކަންކަން އެމްއެމްއޭއިން ކުރަން ފެށީ ނޮވެމްބަރު މަހުގެ 20 ވަނަ ދުވަހުން ފެށިގެންނެވެ.
މި މަހުގެ ހަތަރެއް ވީ އާދީއްދަ ދުވަހުން އިއްޔެގެ ނިޔަލަށް، އެމްއެމްއޭއިން ވަނީ ޖުމްލަ 5،697 ޓިކެޓަށް، ޖުމްލަ 2،826،556 ޑޮލަރު ވިއްކައިފައެވެ.
އެމްއެމްއޭއިން ޑޮލަރު ވިއްކި ފުރަތަމަ ހަފްތާ ކަމުގައިވާ، ނޮވެމްބަރު 20 އިން 24 އަށް، 5،635 ޓިކެޓަށް 2.7 މިލިޔަން ޑޮލަރު ވަނީ ވިއްކައިފައެވެ.
ނަމަވެސް ދެވަނަ ހަފްތާގައި ވިއްކި އަދަދު ކަށަވަރު ކުރެވިފައެއް ނުވެއެވެ.
ނޮވެމްބަރު 20 އިން ފެށިގެން އަންނަ އަހަރުގެ ޖެނުއަރީ މަހުގެ ހަތްވަނަ ދުވަހުގެ ނިޔަލަށް، ފުރާ މީހުންނަށް ޑޮލަރު ވިއްކުމުގެ ކަންކަން އެމްއެމްއޭއިން ކުރިޔަށް ގެންދާ އިރު، އެ ތާރީޚަށް ފަހު ފުރާ މީހުންނަށް ޑޮލަރު ވިއްކާނީ އެއާޕޯޓުންނެވެ.
ބަންދު ނޫން ކޮންމެ ދުވަހެއްގެ ހެނދުނު 9:00 އިން ހަވީރު 6:00 އަކާއި ދެމެދު އެމްއެމްއޭއަށް ދާ ފަރާތްތަކުގެ ޑޮކިއުމެންޓް ޗެކްކުރުމަށްފަހު ސްލިޕެއް ދޫކުރާ އިރު، ހަވީރު 4:00 އިން ފެށިގެން އެމްއެމްއޭއިން ޑޮލަރު ދޫކުރާނެއެވެ. ޑޮލަރު ވިއްކަނީ، އެ މީހަކު ފުރުމުގެ ހަތް ދުވަސް ކުރިންނެވެ. ކޮންމެ ޓިކެޓަކަށް އެމްއެމްއޭއިން 500 ޑޮލަރު ވިއްކާނެއެވެ.
އެމްއެމްއޭއިން އެޅި މި ފިޔަވަޅަކީ ޑޮލަރު ގަތުމަށް ދިގު ކިއު ހަދައިގެން ހުންނަން ޖެހުނު ޖެހުމަށް ނިމުމެއް ގެނުވާނެ ކަމެއް ކަމަށް އެމްއެމްއޭގެ ގަވަރުނަރު ވިދާޅުވެފައިވެއެވެ.
"ކުރިން އައިސް ކިޔޫ ހަދައި ތިބޭކަށް ނުޖެހޭނެ، ހެނދުނު ނުވައަކުން އިރުއޮއްސި ހަޔަކާ ދެމެދު އެމްއެމްއޭއަށް އައުމުން އެދުވަހު ޑޮލަރު ލިބޭނެ،" އެވެ.